ដោយៈ សុខុម
ភ្នំពេញ: កម្ពុជា បានអំពាវនាវឱ្យក្រុមហ៊ុន និងសហគ្រាសក្នុងស្រុកចូលរួមក្នុងពិព័រណ៍នាំចូលអន្តរជាតិចិន (CIIE) លើកទី៦ ដែលនឹងប្រារព្ធឡើងនៅថ្ងៃទី៥-១០ ខែវិច្ឆិកា ខាងមុខនេះនៅទីក្រុងសៀងហៃ ប្រទេសចិន ឱ្យបានច្រើនកុះករ។
ក្រសួងពាណិជ្ជកម្មបានចេញ សេចក្ដីថ្លែងការណ៍កាលពីថ្ងៃព្រហស្បតិ៍ ទី១ ខែមិថុនា ថា ក្រសួងនឹងដឹកនាំគណៈប្រតិភូពាណិជ្ជកម្មចូលរួមក្នុងពិព័រណ៍នេះ ដោយធ្វើការកត់សម្គាល់ថា ពិព័រណ៍នេះនឹងក្លាយជាឱកាសដ៏ល្អ សម្រាប់អ្នកតាំងពិព័រណ៍ ដើម្បីស្វែងរកដៃគូអាជីវកម្មថ្មីៗនៅក្នុងប្រទេសចិន និងនៅទូទាំងពិភពលោក។
សេចក្តីថ្លែងការណ៍ដដែលលើកឡើងថា “ពិព័រណ៍នាំចូលអន្តរជាតិចិន (CIIE) គឺជាព្រឹត្តិការណ៍ពាណិជ្ជកម្មដ៏ធំមួយ របស់ប្រទេសចិន ហើយបានក្លាយជាវេទិកាធុរកិច្ច ដ៏សំខាន់សម្រាប់កិច្ចសហប្រតិបត្តិការអន្តរជាតិក្នុងវិស័យសេដ្ឋកិច្ច ពាណិជ្ជកម្ម ការវិនិយោគ និងទំនាក់ទំនងការទូតរវាងប្រទេសចិន និងគ្រប់ប្រទេសដែលចូលរួម”។
លោក ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មមានប្រសាសន៍ថា កម្ពុជា តែងតែចូលរួមពិព័រណ៍នេះជារៀងរាល់ឆ្នាំចាប់តាំងពីឆ្នាំ២០១៨ មក។
លោកបានប្រាប់ទីភ្នាក់ងារព័ត៌មាន Xinhua ថា “ពិព័រណ៍នេះគឺជាឱកាសដ៏ល្អ សម្រាប់បណ្ដាក្រុមហ៊ុនបរទេស ដើម្បីបង្ហាញផលិតផល និងសេវាកម្មរបស់ខ្លួន និងធ្វើការទំនាក់ទំនងជាមួយបណ្ដាដៃគូក្នុងស្រុក។ ពិព័រណ៍នេះក៏មានសារៈសំខាន់ ក្នុងការជួយជំរុញទំហំពាណិជ្ជកម្ម និងការវិនិយោគបន្ថែមទៀតរវាងកម្ពុជា និងប្រទេសចិន ផងដែរ”៕ Xinhua៕
