ប្រទេសថៃអនុញ្ញាតឱ្យក្រុមហ៊ុនក្នុងស្រុកចំនួន២ដើម្បីរុករក និងផលិតប្រេងឥន្ធនៈនៅឈូងសមុទ្រ

ដោយ: គង់ លាងហួរ

អន្តរជាតិ: នាយកដ្ឋានឥន្ធនៈរ៉ែ បានផ្តល់អាជ្ញាប័ណ្ណរុករក និងផលិតប្រេងដល់ក្រុមហ៊ុន Chevron Offshore Thailand និងក្រុមហ៊ុន PTT Exploration and Production Plc (PTTEP)។

យោងតាមការចុះដោយកាសែត Bangkok Post បានឱ្យដឹងថា នេះជាផ្នែកមួយ នៃកិច្ចខិតខំប្រឹងប្រែងរបស់ប្រទេសថៃ ដើម្បីបង្កើនការផ្គត់ផ្គង់ឧស្ម័នពីឈូងសមុទ្រថៃ និងកាត់បន្ថយវិក្កយបត្រថាមពលក្នុងរយៈពេលវែង។

ក្រុមហ៊ុនទាំង២ខាងលើ ដែលបានបំពេញតាមលក្ខណៈវិនិច្ឆ័យអប្បបរមាដែលបានកំណត់ នឹងដំណើរការនៅក្នុងប្លុកប្រេងចំនួន៣៖ ទី១គឺ ប្លុក G2/65 ដែលគ្របដណ្តប់លើផ្ទៃទឹក១៥.០៣០គីឡូម៉ែត្រក្រឡា និងត្រូវបានប្រគល់ជូនដល់ក្រុមហ៊ុនChevron។

ចំណែកឯ ប្លុក G1/65 និង G3/65 ដែលគ្របដណ្ដប់លើផ្ទៃទឹកសរុបចំនួន២០.១៣៣គីឡូម៉ែត្រក្រឡា នឹងត្រូវបានរុករកដោយក្រុមហ៊ុនបុត្រសម្ព័ន្ធខួងយកប្រេង និងឧស្ម័នរបស់ PTT ។

លោក Chatit Huayhongtong ប្រធានក្រុមហ៊ុន Chevron Thailand បានអះអាងថា ក្រុមហ៊ុនបានត្រៀមខ្លួនរួចជាស្រេច ក្នុងការចូលទៅក្នុងតំបន់នេះ និងធ្វើការស្ទង់មតិរញ្ជួយដី ដើម្បីស្វែងរកថាតើប្លុកនេះ មានសក្តានុពលសម្រាប់ផលិតប្រេងដែរឬទេ។

លោក Montri Rawanchaikul នាយកប្រតិបត្តិក្រុមហ៊ុន PTTEP បានមានប្រសាសន៍ថា បច្ចេកវិទ្យាថ្មីនឹងពន្លឿនការរុករក និងផលិតនៅប្លុកប្រេងថ្មី ដែលនឹងគាំទ្រដល់ផែនការបង្កើនការផ្គត់ផ្គង់ឧស្ម័នក្នុងស្រុក ដែលអាចឱ្យប្រទេសថៃ ពឹងផ្អែកតិចលើការនាំចូលឧស្ម័នធម្មជាតិរាវ (LNG) ៕