ដោយ៖ សុខុម
ញូវយ៉ក: ភាគហ៊ុនបច្ចេកវិទ្យាបញ្ញាសិប្បនិមិត្ត (AI) បានហក់ឡើងស្រឺតៗនៅក្នុងការជួញដូរកាលពីថ្ងៃពុធ ទី២៤ ខែឧសភា ដែលធ្វើឱ្យមូលធនភាវូបនីយកម្មទីផ្សារ (Market Capitalization) ឬ ថ្លៃទីផ្សារនៃចំនួនសរុបភាគហ៊ុនដែលកំពុងចរាចរលើទីផ្សារ កើនឡើងជិត៣០០ពាន់លានដុល្លារ បន្ថែមទៀត។
ការហក់ឡើងនូវតម្លៃភាគហ៊ុនបច្ចេកវិទ្យា AI នេះកើតមានឡើង បន្ទាប់ពីក្រុមហ៊ុនផលិតបន្ទះឈីប Nvidia Corp បានព្យាករកំណើនប្រាក់ចំណូលដ៏រឹងមាំ ហើយនិយាយថា ខ្លួនកំពុងជំរុញការផលិតបន្ទះឈីប AI របស់ខ្លួនដើម្បីបំពេញតម្រូវការកើនឡើងក្នុងទីផ្សារ។ នេះបើយោងតាមសារព័ត៌មាន CNA ចុះផ្សាយនៅថ្ងៃព្រហស្បតិ៍ ទី២៥ ខែឧសភា នេះ។
ភាគហ៊ុនរបស់ក្រុមហ៊ុន Nvidia បានហក់ឡើងរហូតដល់ទៅ២៨% បន្ទាប់ពីការជួញដូរក្នុង១ភាគហ៊ុនតម្លៃ៣៩១,៥០ដុល្លារ ដែលជាកម្រិតខ្ពស់បំផុតមិនធ្លាប់មានរបស់ខ្លួន។ ការហក់ឡើងនេះបានបង្កើនតម្លៃទីផ្សារភាគហ៊ុនរបស់ខ្លួនប្រមាណ២០០ពាន់លានដុល្លារ ឈានរហូតដល់ជាង៩៦០ពាន់លានដុល្លារ ដោយក្លាយជាក្រុមហ៊ុនផលិតបន្ទះឈីបដ៏មានតម្លៃបំផុតរបស់ពិភពលោក និងជាក្រុមហ៊ុនដែលមានតម្លៃបំផុតទី៥ ប្រចាំនៅសង្កាត់ហិរញ្ញវត្ថុ Wall Street។
ក្រុមហ៊ុន Nvidia បានព្យាករប្រាក់ចំណូលប្រចាំត្រីមាសច្រើនជាង៥០%លើសពីការប៉ាន់ប្រមាណរបស់ Wall Street ដោយនាយកប្រតិបត្តិលោក Jensen Huang បានចេញសេចក្តីថ្លែងការណ៍ថា ក្រុមហ៊ុននេះ “កំពុងបង្កើនការផ្គត់ផ្គង់របស់យើងយ៉ាងខ្លាំងដើម្បីបំពេញកំណើនតម្រូវការ” បន្ទះឈីបមជ្ឈមណ្ឌលទិន្នន័យរបស់ខ្លួន។
ភាគហ៊ុនរបស់ក្រុមហ៊ុនសាជីវកម្មផ្សេងៗទៀតទាក់ទងនឹងបច្ចេកវិទ្យា AI បានហក់ឡើងក្រោយក្រុមហ៊ុន Nvidia បញ្ចេញរបាយការណ៍វិជ្ជមាន ដោយបានបន្ថែមតម្លៃទីផ្សារភាគហ៊ុនជិត១០០ពាន់លានដុល្លារ បន្ថែមទៀត បន្ទាប់ពីបិទការជួញដូរ។
ចំណាប់អារម្មណ៍លើបច្ចេកវិទ្យា AI បានកើនឡើងខ្លាំងនៅឆ្នាំនេះ បន្ទាប់ពីក្រុមហ៊ុនថ្មីថ្មោង OpenAI បានដាក់ឱ្យដំណើរការ ChatGPT ដោយទាក់ទាញអ្នកប្រើប្រាស់បានជាង១លាននាក់ក្នុងរយៈពេលត្រឹមតែមួយសប្តាហ៍។ ដោយប្រើប្រាស់ទិន្នន័យចាស់ៗ បច្ចេកវិទ្យា AI អាចបង្កើតមាតិកាថ្មីៗដូចជាអត្ថបទ រូបភាព និងកូដកម្មវិធីសូហ្វវែដែលមានលក្ខណៈពេញលេញ៕ Reuters៕
