ដោយ: គង់ លាងហួរ
អន្តរជាតិ: ស្ថាបនិកក្រុមហ៊ុន AirAsia លោក Tony Fernandes បានមានប្រសាសន៍ថា តម្លៃសំបុត្រយន្តហោះបានហក់ឡើងដល់កំពូលហើយ នៅក្នុងទីផ្សារដែលក្រុមហ៊ុនអាកាសចរណ៍ AirAsia កំពុងតែដំណើរការ ។
លោក Fernandes បានឱ្យដឹងនៅក្នុងបទសម្ភាសន៍មួយនៅខាងក្រៅវេទិកាសេដ្ឋកិច្ចកាតានៅទីក្រុងដូហាកាលពីថ្ងៃអង្គារថា “យើងមិនចង់ឲ្យតម្លៃហក់ឡើងខ្ពស់ជាងនេះទេ យើងចង់ឲ្យវាថយចុះ ហើយយើងចង់ជំរុញចរាចរណ៍បន្ថែមទៀត ដូច្នេះខ្ញុំគិតថា តម្លៃសំបុត្របានហក់ឡើងដល់កំពូលហើយ”។
ថ្លៃសំបុត្រយន្តហោះនៅទូទាំងពិភពលោកនៅតែបន្តកើនឡើង បន្ទាប់ពីជំងឺកូវីដ-១៩ ដោយសារសមត្ថភាព និងបុគ្គលិកមិនអាចតាមទាន់នឹងការងើបឡើងវិញយ៉ាងខ្លាំងនៃតម្រូវការ។
លោក Fernandes បានលើកឡើងថា
នៅតំបន់អាស៊ីអាគ្នេយ៍មានកំណើនរីកចម្រើនដ៏អស្ចារ្យ ហើយនៅតំបន់មជ្ឈិមបូព៌ាក៏កំពុងតែរីកដុះដាល និងរីកចម្រើនខ្លាំងផងដែរ។
លោក Fernandes បានបញ្ជាក់ប្រាប់ទូរទស្សន៍ Bloomberg Television ថា ក្រុមហ៊ុន AirAsia គ្រោងបង្កើតក្រុមហ៊ុនអាកាសចរណ៍របស់ខ្លួននៅក្នុងប្រទេសចំនួន២បន្ថែមទៀតនៅក្នុងតំបន់អាស៊ាន។ ជាក់ស្តែង កាលពីខែធ្នូ ឆ្នាំ២០២២ ក្រុមហ៊ុននេះបានប្រកាសពីគម្រោងឈានជើងចូលប្រទេសកម្ពុជា។
នៅក្នុងបទសម្ភាសន៍ដាច់ដោយឡែកមួយទៀត លោក Fernandes បានអះអាងថា ក្រុមហ៊ុន AirAsia កំពុងពិចារណាពង្រីកផ្លូវហោះហើរនៅតំបន់មជ្ឈិមបូព៌ា។
លោកបានមានប្រសាសន៍ថា “ការបើកបរជុំវិញប្រទេសកាតា ហើយសម្លឹងមើលទៅកាន់ទីក្រុង Abu Dhabi ទីក្រុងDubai និង Oman យើងគិតថា យើងអាចផ្តល់នូវតម្លៃសមរម្យដល់ប្រជាជនរស់នៅទីនេះ ដើម្បីធ្វើដំណើរមកកាន់តំបន់អាស៊ីអាគ្នេយ៍ ហើយសម្រាប់តំបន់អាស៊ីអាគ្នេយ៍ យើងអាចបើកទីផ្សារថ្មីមួយទាំងមូលបាន”៕
