ដោយៈ គង់ ម៉ាលីនណា
ភ្នំពេញៈ មន្រ្តីជាន់ខ្ពស់ក្រសួងសាធារណៈការ និងដឹកជញ្ជូន បានជួបពិភាក្សាការងារជាមួយ តំណាងធនាគារអភិវឌ្ឍន៍អាស៊ី(ADB)លើបញ្ហាគ្រប់គ្រងប្រព័ន្ឋចម្រោះទឹកកខ្វក់ នៅតាមបណ្តាខេត្តនានា។
កិច្ចប្រជុំនេះដឹកនាំដោយលោក រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជួបពិភាក្សាការងារជាមួយតំណាងធនាគារអភិវឌ្ឍន៍អាស៊ី (ADB) ដោយមានការចូលរួមពីថ្នាក់ដឹកនាំក្រសួង និងមន្ត្រីជំនាញ នៃអគ្គនាយកដ្ឋានប្រព័ន្ធចម្រោះទឹកកខ្វក់។
កិច្ចប្រជុំនេះរៀបចំឡើងក្នុងគោលបំណង ដើម្បីពិគ្រោះយោបល់លើតម្រូវការ សម្រាប់ការអភិវឌ្ឍន៍វិស័យទឹកកខ្វក់ និងអនាម័យក្នុងព្រះរាជាណាចក្រកម្ពុជា។
អង្គប្រជុំបានពិភាក្សាអំពីផែនការ អភិវឌ្ឍន៍នៅតាមបណ្តារាជធានី-ខេត្តមួយចំនួន ទាក់ទងនឹងគម្រោងសាងសង់ អាងប្រព្រឹត្តកម្មទឹកកខ្វក់ ទីលានគ្រប់គ្រងសំណល់ភក់ ទីលានទុកដាក់សំរាម និងសំណល់រឹង និងការងារផ្សេងៗទៀត ដូចជាការរៀបចំគោលនយោបាយ យុទ្ធសាស្ត្រ បទដ្ឋានបច្ចេកទេស និងឯកសារគតិយុត្តិនានាដែលពាក់ព័ន្ធទៅនឹងការគ្រប់គ្រងវិស័យទឹកកខ្វក់ និងអនាម័យ ដែលបានអនុវត្ត កំពុងអនុវត្ត និងត្រូវអនុវត្តនាពេលអនាគត៕
