ដោយ: គង់ លាងហួរ
ភ្នំពេញ: សមាគមធុរកិច្ចអឺរ៉ុបកណ្តាល និងខាងកើត(CEEBAC ) ត្រូវបានដាក់ឱ្យដំណើរការជាផ្លូវការ នៅក្នុងប្រទេសកម្ពុជា ដើម្បីជំរុញពាណិជ្ជកម្ម និងការវិនិយោគនៅកម្ពុជា ជាពិសេសជំរុញការនាំចេញ ខណៈដែលទីផ្សារអឺរ៉ុប តំណាងឱ្យប្រហែល២០ភាគរយ នៃការនាំចេញសរុបរបស់កម្ពុជា។
CEEBAC ត្រូវបានសម្ពោធជាផ្លូវការ កាលពីថ្ងៃទី១១ ខែឧសភា ដែលនឹងស្ថិតក្រោមសភាពាណិជ្ជកម្មអឺរ៉ុប (EuroCham) ដើម្បីបម្រើជាសាខានៅកម្ពុជា ដោយចូលរួមជាមួយសភាពាណិជ្ជកម្ម និងឧស្សាហកម្មបារាំងនៅកម្ពុជា សភាពាណិជ្ជកម្មអង់គ្លេសនៅកម្ពុជា សមាគមធុរកិច្ចអ៊ីតាលី-កម្ពុជា និង Benelux Cambodia។
លោក Tassilo Brinzer ប្រធានសភាពាណិជ្ជកម្មអឺរ៉ុប EuroCham បានថ្លែងក្នុងពិធីសម្ពោធជាផ្លូវការនេះថា CEEBAC នឹងពង្រឹងបន្ថែមទៀតនូវទំនាក់ទំនងដ៏រឹងមាំរវាងកម្ពុជា និងអឺរ៉ុប។
លោកបន្តថា “អឺរ៉ុបកណ្តាល និងខាងកើត គឺជាតំបន់កំណើនសេដ្ឋកិច្ច ប្រកបដោយនវានុវត្តន៍របស់អឺរ៉ុប សម្រាប់ការធ្វើពាណិជ្ជកម្ម ការវិនិយោគ និងការផ្លាស់ប្តូរវប្បធម៌ជាមួយកម្ពុជា។
លោកថ្លែងថា “ការដាក់ឱ្យដំណើរការCEEBAC នឹងផ្តល់នូវវេទិកាមួយផ្សេងទៀត ដើម្បីពង្រឹងភាពជាដៃគូសេដ្ឋកិច្ច រវាងបណ្តសប្រទេសជាច្រើនទៀតនៅអឺរ៉ុប និងកម្ពុជា ព្រមទាំងផ្តល់ឱកាសសម្រាប់ការចូលរួមទ្វេរភាគីបន្ថែមទៀត ជាមួយនឹងការគាំទ្រពី EuroCham Cambodia។
លោក Tomas Pokorny នាយកប្រតិបត្តិ Pi Pay និងជាសហគ្រិន មកពីសាធារណរដ្ឋឆែក បានមានប្រសាសន៍ឱ្យដឹងថា “CEEBAC នឹងដើរតួនាទីយ៉ាងសំខាន់ ក្នុងការបង្កើនទំនាក់ទំនងកាន់តែរឹងមាំ រវាងប្រទេសកំណើតរបស់លោកជាមួយកម្ពុជា”។
លោក Pokorny លើកឡើងថា “ជាការពិតណាស់ ការគាំទ្ររបស់រដ្ឋាភិបាលគឺជារឿងល្អ ប៉ុន្តែប្រសិនបើអ្នកមានការគាំទ្រផ្នែកពាណិជ្ជកម្ម ពីស្ថាប័នឯកជនផងដែរនោះ វាមិនពិបាកក្នុងការកសាងទំនាក់ទំនងសេដ្ឋកិច្ចនោះទេ”។
លោកក៏មើលឃើញពីឱកាស ក្នុងវិស័យម្ហូបអាហារ និងភេសជ្ជៈ ជាពិសេសទឹកដោះគោ សាច់ ស្រា និងទំនិញស្ងួត។ លោក Tomas Pokorny បានលើកយកឧទាហរណ៍មួយគឺ ស្រាបៀរ Budweiser Budvar ដែលជាស្រាបៀររបស់ប្រទេសឆែក ដែលបច្ចុប្បន្នកំពុងដាក់លក់នៅតាមហាងនានារបស់កម្ពុជា មួយផ្នែកដោយសារការខិតខំប្រឹងប្រែងពីស្ថានទូតសាធារណរដ្ឋឆែក និងក្រុមហ៊ុន KS Logistics។
លោកបន្ថែមទៀតថា ទីតាំងភូមិសាស្ត្រដ៏ល្អរបស់កម្ពុជា បានធ្វើឱ្យប្រទេសនេះ ក្លាយជាដៃគូដ៏មានសក្តានុពលខ្លាំង ហើយកម្ពុជាអាចប្រែក្លាយទៅជា មជ្ឈមណ្ឌលពាណិជ្ជកម្មសម្រាប់តំបន់ និងដើរតួនាទីកាន់តែសំខាន់ផងដែរ៕