សិក្សាបីចំណុចនេះ ដើម្បីប្រើប្រាស់ហិរញ្ញវត្ថុរបស់អ្នកកាន់តែមានប្រសិទ្ឋភាព

ដោយៈម៉ាលីនណា

ភ្នំពេញៈ តើអ្វីទៅជាចំណេះដឹងហិរញ្ញវត្ថុ ឬFinancial Literacy​? វាមានសារៈសំខាន់ដល់កម្រិតណាទៅ សម្រាប់ឆាកជីវិតប្រចាំថ្ងៃរបស់ប្រជាពលរដ្ឋ។

ចំណេះដឹងផ្នែកហិរញ្ញវត្ថុ គឺជាចំណេះដឹង ជំនាញ សមត្ថភាពគ្រប់​គ្រងលុយកាក់ និងការសម្រេចចិត្តថា ត្រូវធ្វើដូចម្ដេចជាមួយលុយ​កាក់ខ្លួន ឱ្យមានប្រសិទ្ធភាព។ អ្នកដែលមានចំណេះដឹងផ្នែកហិរញ្ញវត្ថុស៊ីជម្រៅ គឺពួកគាត់អាចចេះ ចាត់ចែងលុយកាក់ទាំងអម្បាលម៉ាន ប្រកបដោយប្រសិទ្ធភាព បានន័យថា បើទោះបីមានរឿងអ្វីក៏ដោយ ក៏បញ្ហាទាំងនោះមិនប៉ះពាល់ ដល់ផ្នែកហិរញ្ញវត្ថុរបស់គាត់ដែរ។
នេះជាបទពិសោធន៍ និងមេរៀនដ៏សំខាន់ធ្វើឱ្យយើងដឹងថា ចំណេះដឹងហិរញ្ញវត្ថុមានសារៈសំខាន់ប៉ុនណា។

➊.ចៀសផុតពីការធ្លាក់ខ្លួនទៅក្នុងបំណុល

ចំណេះដឹងផ្នែកហិរញ្ញវត្ថុ បានបំភ្លឺឲ្យយើងឃើញថា យើងមិនអាចចាយលើសពីអ្វីដែលរកបានទេ ហើយយើងក៏មិនគួររបង្កើតបំណុ​ល អាក្រក់ (ខ្ចីលុយទៅទិញសម្ភារៈ ដែលមិនផ្ដល់ផលចំណេញ) និងមិនត្រូវផ្ដល់អាទិភាពលើចំណង់ ធំជាងតម្រូវការដែរ ព្រោះទាំងអស់នេះជាមាគ៌ានាំទៅរកបំណុល។

ចំណេះដឹងហិរញ្ញវត្ថុ បានបង្រៀនឱ្យយើងម្នាក់ៗឲ្យបានស្គាល់ពី emergency fund និង sinking fund ជាដើម។ ជាក់ស្ដែង កាលពីរដ្ឋាភិបាលដាក់ចេញវិធានការបិទខ្ទប់ យើងមិនបានដឹងទុកមុនថាមាន lockdown ឬការបិទខ្ទប់មានរយៈពេលយូរប៉ុនណានោះទេ។

ដូចនេះ បើសិនយើងបានត្រៀមទុកemergency fund យើងអាចយកវាមកទ្រទ្រង់ ចំណាយចាំបាច់ផ្សេងៗ ដូចជា ចំណាយទៅលើម្ហូបអាហារ ទឹកភ្លើង ថ្លៃបន្ទប់ជួល ថ្នាំសង្កូវ ជាដើម។

➋. បង្កើនការប្រុងប្រយ័ត្នជាមួយការចាយវាយ

ក្នុងអំឡុងពេលការរីករាតត្បាតជំងឺកូវីដ ចំណូលរបស់បុគ្គលចំនួនអាចនឹងត្រូវបានកាត់បន្ថយ ឬបាត់បង់ចំណូលទាំងស្រុង។ នេះហើយជាចំណុចផ្ដើម នៃអស្ថិរភាពនៃចរន្តចំណូល។

ចំណេះដឹងហិរញ្ញវត្ថុ ពាក់ព័ន្ធនឹងចំណាយសំខាន់ណាស់ ព្រោះវាត្រួសត្រាយពីវិធីសាស្ត្រ គន្លឹះកាត់បន្ថយចំណាយ ចំណាយដោយមានផែនការច្បាស់លាស់ (budgeting) ការចាយវាយឲ្យមានខ្ទង់ ឬចាយតែទៅលើអ្វីដែលចាំបាច់ជាដើម។

គ្រប់សម័យកាលទាំងអស់ មិនថាមុនកូវីដក្ដី អំឡុងពេលកូវីដក្ដី ឬក្រោយពេលកូវីដចប់ទៅក្ដី ចំណេះដឹងទាក់ទងការចាយវាយ ពិតជាសំខាន់ ជាពិសេសរដូវកាលកូវីដនេះតែម្ដង។ យើងម្នាក់ៗត្រូវតឹងរឹងជាមួយវិន័យចាយលុយ តែហ៊ានចាយខុសបន្តិច នឹងកើតមានភាពស្ដាយក្រោយជាមិនខាន។

អ្នកកុំមើលស្រាលចំណាយតូចៗ ដែលអ្នកគិតថាកំប៉ិកកំប៉ុក (ប្រ​ហោងធ្លាយតូចមួយ អាចធ្វើឲ្យសំពៅទាំងមូលលិចបាន)។

➌. ផ្លាស់ប្ដូរទម្លាប់ចាយវាយតាមស្ថានការណ៍

ចំណេះដឹងហិរញ្ញវត្ថុ នឹងផ្ដល់ភាពបត់បែនដល់បុគ្គលម្នាក់ៗ ក្នុងការគ្រប់គ្រងលុយកាក់ ឲ្យមានប្រសិទ្ធភាព ស្របតាមកាលៈទេសៈ។ ឧទា​ហរណ៍ថា យើងធ្លាប់តែមានទម្លាប់ ចាយវាយលុយកាក់តាមរូបមន្ត 50/30/20។

ប៉ុន្តែក្នុងស្ថានភាពបិទខ្ទប់ ទម្លាប់ដែលថ្លាប់តែចាយ 30% លើការកម្សាន្ត និង 20% សន្សំ អាចនឹងត្រូវប្ដូរមកជាការចាយវាយ 50/50 គឺសម្រាប់ចំណាយចាំបាច់ 50% និង50%ទៀតទុកសន្សំ ឬបន្ថែមទៅក្នុងកញ្ចប់ប្រាក់ emergency fund របស់យើង។

ដោយឡែក ក្រៅពីចេះចាយវាយ និងសន្សំឱ្យបានត្រឹមត្រូវ ចំណេះ​ដឹងហិរញ្ញវត្ថុ ក៏បានបង្រៀនយើងឱ្យ ចេះបែងចែកលុយកាក់ ចេះវិនិយោគ និងព្យាយាមបង្កើនចំណូលបន្ថែម តាមមធ្យោបាយផ្សេងៗទៀត៕