ដោយ: គង់ លាងហួរ
អន្តរជាតិ: ផែនការនៃការនាំចេញផលិតផល សំបុកសត្វត្រចៀកកាំពីកម្ពុជាទៅទីផ្សារប្រទេសចិន កំពុងបង្ហាញក្តីសង្ឃឹមកាន់តែខ្ពស់សម្រាប់អ្នក នៅក្នុងចង្វាក់ផលិតកម្មមួយនេះ។
នៅថ្ងៃទី ២៨ ខែមេសានេះ កម្ពុជាគ្រោងបញ្ជូនឯកសារទាក់ទងនឹងសំណួរចំនួន៦ចុងក្រោយ ដែលភាគីចិនបានស្នើឱ្យកម្ពុជាពិនិត្យពេលកន្លងមក ទៅឱ្យភាគីចិនវិញ។
ផលិតផលសត្វត្រចៀកកាំ គឺជាទំនិញអាទិភាពមួយដែលក្រសួងកសិកម្ម រុក្ខាប្រមាញ់និងនេសាទ បានកំណត់ជាមុខទំនិញមានសក្តានុពល សម្រាប់នាំចេញទៅទីផ្សារប្រទេសចិន ដែលមានដូចជា ផ្លែមៀន ម្រេច ទុរេន និងក្រូចថ្លុង ជាដើម។
លោក ណាង សុធី ប្រធានសហព័ន្ធសម្បុកត្រចៀកកាំកម្ពុជា បានអះអាងថា ផែនការនាំចេញផលិតផល សំបុកសត្វត្រចៀកកាំរបស់កម្ពុជា ទៅកាន់ប្រទេសចិន កំពុងស្ថិតលើផ្លូវវិជ្ជមាន។
លោកអះអាងទៀតថា កាលពីថ្ងៃទី ២៥ មេសា លោក និងក្រុមការងារតំណាងឱ្យផ្នែកឯកជន បានចូលរួមប្រជុំជាមួយថ្នាក់ដឹកនាំនៃអគ្គនាយកដ្ឋានកសិកម្ម ដើម្បីពិនិត្យមើល និងផ្តល់ធាតុចូលបន្ថែមសម្រាប់ឆ្លើយតបសំណួរចំនួន៦ចុងក្រោយ ដែលភាគីចិនផ្ញើត្រឡប់មកឱ្យភាគីកម្ពុជា បំពេញបន្ថែមកាលពីពេលកន្លងមក។
លោកបន្តទៀតថា សំណួរដែលភាគីចិន បានផ្ញើឱ្យរដ្ឋាភិបាលកម្ពុជា បំពេញសម្រាប់ការពិនិត្យលទ្ធភាព នាំចេញផលិតផលសត្វត្រចៀកកាំ ទៅទីផ្សារចិននាពេលកន្លងមក គឺមានរាប់រយប៉ុន្តែក្នុងចំណោមនោះគឺមានតែសំណួរ៦ប៉ុណ្ណោះ ដែលភាគីចិនផ្ញើឱ្យកម្ពុជាពិនិត្យឡើងវិញ ក្រៅពីនោះគឺគ្មានបញ្ហាឡើយ។
ការស្នើសុំនាំចេញរបស់កម្ពុជា គឺមានទាំងសម្បុកដែលមិនទាន់សម្អាត និងសម្អាតរួចរាល់។
លោកណាង សុធី បញ្ជាក់ថា បើរដ្ឋាភិបាលចិនអនុញ្ញាតឱ្យកម្ពុជាអាចនាំចូលផលិតផល ពីសត្វត្រចៀកកាំដោយផ្ទាល់នោះ វានឹងជួយឱ្យសកម្មភាព នៃការវិនិយោគលើផ្ទះអភិរក្សត្រចៀកកាំ (ផ្ទះចិញ្ចឹម) កន្លែងសម្អាតសម្បុកត្រចៀកកាំ និងរោងចក្រកែច្នៃកម្រិតស្តង់ដានៅកម្ពុជា មានកាន់តែច្រើនឡើងបន្ថែមទៀត។
លោកបានបន្ថែមឱ្យដឹងទៀតថា “កាលពីពេលថ្មីៗនេះ ខ្ញុំនិងសហការីតំណាងឱ្យផ្នែកឯកជន បានចូលរួមប្រជុំជាមួយតំណាងក្រសួងកសិកម្ម ដើម្បីដាក់ធាតុចូលបន្ថែម សម្រាប់សំណួរទាំង៦ ដែលភាគីចិនបានឱ្យកម្ពុជាបំពេញថែម”។
រាល់សំណួរដែលភាគីចិន តម្រូវឱ្យកម្ពុជាបំពេញបន្ថែមទាំង៦នោះ គឺត្រូវបានរៀបចំរួចរាល់ហើយ ដោយក្រសួងគ្រោងនឹងបញ្ជូនទៅឱ្យភាគីចិនវិញនៅថ្ងៃទី ២៨ ខែមេសា នេះ ហើយចំពោះលទ្ធផលបែបណានោះយើងនឹងរង់ចាំការឆ្លើយតប៕