ដោយៈ ចំណាន
ភ្នំពេញៈ ក្រសួងសេដ្ឋកិច្ច និងហិរញ្ញវត្ថុ (MEF) និងធនាគារ ABA បានចុះអនុស្សរណៈយោគយល់គ្នា (MoU) ស្តីពីកិច្ចសហប្រតិបត្តិការក្នុងក្របខ័ណ្ឌនៃការអភិវឌ្ឍសេដ្ឋកិច្ចឌីជីថល និងបច្ចេកវិទ្យាហិរញ្ញវត្ថុ (Fintech) ដើម្បីជំរុញការអភិវឌ្ឍសេដ្ឋកិច្ចឌីជីថល និងប្រើប្រាស់បច្ចេកវិទ្យាហិរញ្ញវត្ថុ ឱ្យកាន់តែទូលំទូលាយនៅកម្ពុជា។
MoUនេះ ត្រូវបានចុះហត្ថលេខា រវាងលោក គង់ ម៉ារី អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងលោក AskhatAzhikhanov នាយកប្រតិបត្តិរបស់ធនាគារ ABA នៅថ្ងៃទី២៦ ខែមេសាកន្លងមកនេះ។
លោកគង់ ម៉ារី បានមានប្រសាសន៍ថា ការចុះអនុស្សរណៈយោគយល់គ្នា រវាងក្រសួងសេដ្ឋកិច្ច និងហិរញ្ញវត្ថុ និងធនាគារ ABA ស្តីពីក្របខ័ណ្ឌអភិវឌ្ឍន៍សេដ្ឋកិច្ចឌីជីថល និងបច្ចេកវិទ្យាហិរញ្ញវត្ថុនៅកម្ពុជា គឺទី១ សំដៅចែករំលែកចំណេះដឹង បទពិសោធន៍ និងការបណ្តុះបណ្តាល ទី២ ការចូលរួមការប្រើប្រាស់ថ្នាលឌីជីថលគន្លឺះ និងទី៣ ការគាំទ្រលើសកម្មភាព និងថ្នាលផ្សេងទៀតទាំងផ្នែកហិរញ្ញវត្ថុ និងមិនមែនហិរញ្ញវត្ថុសំដៅជំរុញ និងអភិវឌ្ឍសេដ្ឋកិច្ចឌីជីថល និងបច្ចេកវិទ្យាហិរញ្ញវត្ថុនៅកម្ពុជា។
លោកបញ្ជាក់ថា “កិច្ចសហការបែបនេះ នឹងបង្កើតជាគំរូនៃសហថាមពល (Synergy) និងសហបង្កើតថ្មី (Co-creation) រវាងរដ្ឋាភិបាលនិងប្រជាជន ដែលនឹងធ្វើឱ្យមានការបង្កើតនូវសេវា និងផលិតផលថ្មីសំដៅលើកកម្ពស់ ការផ្តល់សេវាសាធារណៈ ឱ្យកាន់តែមានប្រសិទ្ធភាពខ្ពស់ផ្អែកលើបច្ចេកវិទ្យា និងនវានុវត្តន៍”។
លោក AskhatAzhikhanov បានមានប្រសាសន៍ថា កិច្ចសហប្រតិបត្តិការជាមួយក្រសួងសេដ្ឋកិច្ច និងហិរញ្ញវត្ថុ គឺស្របតាមគោលដៅរួមក្នុងការជំរុញសេដ្ឋកិច្ច ប្រកបដោយថាមពល នៅក្នុងប្រទេសកម្ពុជា។
លោកបានបន្តថា “យើងជឿជាក់យ៉ាងមុតមាំថា កិច្ចសហប្រតិបត្តិការជាមួយក្រសួងសេដ្ឋកិច្ច និងហិរញ្ញវត្ថុនឹងអាចឱ្យយើងបង្កើតឱកាសកាន់តែច្រើនសម្រាប់អតិថិជន និងបង្កើនល្បឿននៃវឌ្ឍនភាពនៅក្នុងប្រព័ន្ធរួមបញ្ចូល Fintechទាំងមូល”៕
