រដ្ឋាភិបាលឥណ្ឌូណេស៊ី គ្រោងស្នើ បង្កើតកិច្ចព្រមព្រៀង ពាណិជ្ជកម្ម សេរី មាន កម្រិត ជាមួយ សហរដ្ឋអាមេរិក

ដោយ: គង់ លាងហួរ
ហ្សាការតាៈ ឥណ្ឌូណេស៊ីគ្រោងស្នើកិច្ចព្រមព្រៀងពាណិជ្ជកម្មសេរីសម្រាប់សារធាតុរ៉ែមួយចំនួន ដែលត្រូវដឹកជញ្ជូនទៅកាន់សហរដ្ឋអាមេរិក ដូច្នេះក្រុមហ៊ុននៅក្នុងខ្សែសង្វាក់ផ្គត់ផ្គង់អាគុយរថយន្តអគ្គិសនីដែលកំពុងប្រតិបត្តិការនៅក្នុងប្រទេសអាចទទួលបានអត្ថប្រយោជន៍ពីឥណទានពន្ធរបស់សហរដ្ឋអាមេរិក។

ទីក្រុងវ៉ាស៊ីនតោនបានចេញសេចក្តីណែនាំថ្មីមួយសម្រាប់ឥណទានពន្ធ EV ក្រោមច្បាប់កាត់បន្ថយអតិផរណា (IRA) ដែលទាមទារតម្លៃជាក់លាក់នៃសមាសធាតុថ្មដែលត្រូវផលិត ឬប្រមូលផ្តុំនៅអាមេរិកខាងជើង ឬដៃគូពាណិជ្ជកម្មសេរីណាមួយ។

ឥណ្ឌូណេស៊ីមិនមានកិច្ចព្រមព្រៀងពាណិជ្ជកម្មសេរីជាមួយសហរដ្ឋអាមេរិកទេ ប៉ុន្តែផលិតផលនីកែលរបស់ខ្លួនកាន់តែមានសារៈសំខាន់នៅក្នុងខ្សែសង្វាក់ផ្គត់ផ្គង់ថ្មអាគុយ។

ប្រទេសអាស៊ីអាគ្នេយ៍មួយនេះ បាននិងកំពុងព្យាយាមបង្កើនទុនបម្រុងនីកែលរបស់ខ្លួន ដែលជាទុនបំរុងដ៏ធំបំផុតរបស់ពិភពលោក ដើម្បីទាក់ទាញការវិនិយោគពីក្រុមហ៊ុនផលិតអាគុយ និង EV រួមទាំងក្រុមហ៊ុនអាមេរិកដូចជា Tesla និង Ford ជាដើម។

នៅពេលសាកសួរអំពីគោលការណ៍ណែនាំថ្មីរបស់ច្បាប់ IRA រដ្ឋមន្ត្រីឥណ្ឌូនេស៊ី លោក Luhut Pandjaitan ដែលបាននិងកំពុងដឹកនាំកិច្ចខិតខំប្រឹងប្រែងដើម្បីទាក់ទាញក្រុមហ៊ុនអាមេរិកបានបញ្ជាក់ប្រាប់សន្និសីទសារព័ត៌មានថា ទីក្រុងហ្សាការតានឹងស្នើកិច្ចព្រមព្រៀងពាណិជ្ជកម្មសេរី (FTA) ដែលមានកម្រិតជាមួយទីក្រុងវ៉ាស៊ីនតោន។

លោក Luhut បានបន្តថា “យើងមិនមានកិច្ចព្រមព្រៀង FTA ជាមួយពួកគេនោះទេ ហើយឥឡូវនេះ យើងកំពុងស្នើសុំ FTA មានកំណត់ជាមួយពួកគេដោយបន្ថែមថា លោកនឹងជួបជាមួយនាយកប្រតិបត្តិក្រុមហ៊ុន Ford និង Tesla ដើម្បីពិភាក្សាអំពីបញ្ហានេះនៅពេលធ្វើដំណើរទៅសហរដ្ឋអាមេរិកនៅចុងសប្តាហ៍នេះ”៕