ដោយៈ សុខុម
វ៉ាស៊ីនតោន: ការធ្វើកំណែទម្រង់ របស់ធនាគារពិភពលោក (World Bank) អាចបណ្តាលឱ្យធនាគារនេះ បញ្ចេញកម្ចីឥណទានរហូតដល់ទៅ៥០ពាន់លានដុល្លារអាមេរិក បន្ថែមទៀតនៅទសវត្សរ៍ក្រោយ។
នេះបើយោងតាមអ្វី ដែលរដ្ឋមន្ត្រីក្រសួងរតនាគារអាមេរិក លោកស្រី Janet Yellen បានថ្លែងប្រាប់ទីភ្នាក់ងារព័ត៌មាន AFP នៅមុនកិច្ចប្រជុំ បណ្ដាភាគីពាក់ព័ន្ធនៅសប្តាហ៍នេះ ដែលគេរំពឹងថានឹងការប្រកាសថ្មីៗ។
តាមការរំពឹងទុក បណ្ដាធនាគារកណ្តាល រដ្ឋមន្ត្រីហិរញ្ញវត្ថុ និងអ្នកចូលរួម មកពីប្រទេសសមាជិកជាង១៨០នឹងប្រមូលផ្តុំគ្នា នៅក្នុងរដ្ឋធានីវ៉ាស៊ីនតោន សហរដ្ឋអាមេរិក ដើម្បីចូលរួមកិច្ចប្រជុំរបស់មូលនិធិរូបិយវត្ថុអន្តរជាតិ (IMF) និងធនាគារពិភពលោកនៅសប្ដាហ៍នេះ។
ប្រធានបទដ៏សំខាន់មួយ នៃកិច្ចពិភាក្សាគឺការវិវិឌ្ឍរបស់ធនាគារពិភពលោក ស្របពេលមានការជំរុញឱ្យធនាគារនេះ ធ្វើការកែលម្អឱ្យកាន់តែប្រសើរឡើង និងឆ្លើយតបបញ្ហាប្រឈមជាសកលដូចជាបញ្ហាបម្រែបម្រួលអាកាសធាតុជាដើម។ សហរដ្ឋអាមេរិក គឺជាភាគហ៊ុនិកធំជាងគេបំផុតរបស់ World Bank Group។
លោកស្រី Janet Yellen បានលើកឡើងក្នុងបទសម្ភាសន៍ជាមួយទីភ្នាក់ងារព័ត៌មាន AFP កាលពីថ្ងៃព្រហស្បតិ៍ សប្ដាហ៍កន្លងទៅថា “ខ្ញុំរំពឹងថា ធនាគារពិភពលោក នឹងធ្វើបច្ចុប្បន្នភាពបេសកកម្មរបស់ខ្លួន ក្នុងការបន្ថែមការកសាងភាពធន់ ប្រឆាំងនឹងបម្រែបម្រួលអាកាសធាតុ វិបត្តិកូវីដ-១៩ និងជម្លោះ និងភាពផុយស្រួយដែលបង្កឡើងដល់គោលដៅស្នូល”។
លោកស្រីបានបន្ថែមថា ចាំបាច់ត្រូវមានការទទួលស្គាល់ថា បញ្ហាប្រឈមទាំងនេះ មិនមែនជារឿងដាច់ដោយឡែកពីគ្នានោះទេ ប៉ុន្តែវាមានទំនាក់ទំនងផ្សារភ្ជាប់គ្នា ដែលមិនអាចកាត់ផ្តាច់បាន។
លោកស្រី Janet Yellen បានបន្ថែមទៀតថា ទី២ នឹងមានការប្រកាសថាធនាគារពិភពលោក កំពុងពង្រីកសមត្ថភាពហិរញ្ញវត្ថុរបស់ខ្លួន ដើម្បីបំពេញគោលដៅទាំងនេះ និងទទួលយកការផ្លាស់ប្តូរ ឬ គាំទ្រការផ្លាស់ប្តូរ ដែលអាចបណ្តាលឱ្យធនាគារនេះ បន្ថែមសមត្ថភាពផ្ដល់កម្ចីឥណទាន៥០ពាន់លានដុល្លារ បន្ថែមទៀតនៅទសវត្សរ៍ក្រោយ។
ចំណាត់ការនេះ នឹងជាការបង្កើនធនធានយ៉ាងច្រើន រហូតដល់ទៅ២០% នៅក្នុងកម្រិតផ្តល់ប្រាក់កម្ចី ប្រកបដោយនិរន្តរភាពនៃធនាគារអន្តរជាតិសម្រាប់ការកសាងឡើងវិញ និងការអភិវឌ្ឍន៍ (IBRD)។ IBRD គឺជាបុត្រសម្ព័ន្ធផ្ដល់ប្រាក់កម្ចី ចំណូលមធ្យមរបស់ធនាគារពិភពលោក៕ Arab News៕
