ធនាគារកណ្ដាលវៀតណាមស្នើឱ្យពន្លឿនកញ្ចប់ឥណទានលំនៅដ្ឋានសង្គមកិច្ចក្នុងទំហំទឹកប្រាក់៥ពាន់លានដុល្លារ

ដោយៈ សុខុម

ហាណូយ: ធនាគារកណ្ដាលវៀតណាម (SBV) បានអំពាវនាវឱ្យពន្លឿនការអនុវត្តកញ្ចប់ឥណទាន គេហដ្ឋានចំនួន៥,១១ពាន់លា​នដុល្លារអាមេរិក។ នេះបើយោងតាមសារព័ត៌មាន Vietnam News ចុះផ្សាយកាលពីថ្ងៃពុធ ទី៥ ខែមេសា។

កញ្ចប់នេះគ្របដណ្តប់ លើការអភិវឌ្ឍលំនៅដ្ឋានសង្គម ផ្ទះសម្រា​ប់កម្មករ និងការជួសជុលកែលម្អអាផាតម៉ិនចាស់ៗ ជាមួយនឹងអត្រាការប្រាក់អនុគ្រោះ ទាបជាងអត្រាការប្រាក់ជាមធ្យម សម្រាប់ធនា​គារពាណិជ្ជរដ្ឋធំៗទាំង៤ ប្រមាណ១,៥%%ទៅ២%។

រដ្ឋមន្ត្រីខុទ្ទការល័យរដ្ឋាភិបាលវៀតណាម លោកTran Van Son លើកឡើងថា នាពេលឆាប់ៗនេះ ក្រសួងសំណង់នឹងចេញបញ្ជីឈ្មោះគម្រោង និងលក្ខខណ្ឌសម្រាប់ការទទួលបានកម្ចីអនុគ្រោះ។

លោក Phạm Thanh Ha ទេសាភិបាលរង នៃធនាគារកណ្ដាលវៀតណាម SBV បានលើកឡើង ក្នុងកិច្ចប្រជុំរបស់រដ្ឋាភិបាលកាលពីថ្ងៃច័ន្ទ ទី៣ ខែមេសា ធនាគារកណ្តាលវៀតណាម ក្នុងខែនេះបានផ្ញើឯកសារទៅកាន់សាខានានារបស់ខ្លួន និងធនាគារពាណិជ្ជពាក់ព័ន្ធអំពីកញ្ចប់ឥណទាននេះ ដោយបញ្ជាក់ថា ធនាគាររដ្ឋធំៗទាំង៤ដែលទទួលរ៉ាប់រងផ្ដល់កម្ចីនេះរួមមានធនាគារ Agribank ធនាគារ BIDV ធនាគារ Vietcombank និងធនាគារ VietinBank ។

កម្ចីអនុគ្រោះ នឹងត្រូវផ្តល់ឱ្យបណ្ដាក្រុមហ៊ុនអភិវឌ្ឍន៍ និងអ្នកទិញគម្រោងលំនៅដ្ឋានសង្គមកិច្ច  គម្រោងលំនៅដ្ឋានសម្រាប់កម្មករ និងគម្រោងជួសជុល កែលម្អអគារផ្ទះល្វែងចាស់ៗ។

សម្រាប់បណ្ដាក្រុមហ៊ុនអភិវឌ្ឍន៍ អត្រាអនុគ្រោះនឹងត្រូវអនុវត្តសម្រាប់រយៈពេល៣ឆ្នាំ គិតចាប់ពីថ្ងៃទូទាត់ និង៥ឆ្នាំសម្រាប់អ្នកទិញផ្ទះ៕ Vietnam News៕