ដោយ: គង់ លាងហួរ
ភ្នំពេញ: វិស័យទូទាត់តាមប្រព័ន្ធឌីជីថលរបស់កម្ពុជា ដែលដំណើរការ ដោយតួអង្គឧស្សាហកម្មសំខាន់ៗ ត្រូវបានគេរំពឹងថា នឹងឈានទៅមុខកាន់តែច្រើននៅឆ្នាំនេះ ហើយការទូទាត់សរុបអាចឈានដល់៤,៧៣ពាន់លានដុល្លារ។
ការរីកចម្រើននៃវិស័យនេះទទួលបានសន្ទុះ បន្ទាប់ពីជំងឺរាតត្បា ត ហើយពេលនេះកំពុងត្រូវបានជួយជំរុញផងដែរ ដោយការកើនឡើងនៃការប្រើប្រាស់អ៊ីនធឺណិត និងទូរស័ព្ទនៅក្នុងប្រទេសកម្ពុជា។
យោងតាមការប៉ាន់ប្រមាណនាពេលថ្មីៗនេះ របស់ធនាគារជាតិនៃកម្ពុជា (NBC) បានឱ្យដឹងថា ប្រតិបត្តិការអនឡាញបាន និងកំពុងកើនឡើងយ៉ាងឆាប់រហ័ស ក្នុងរយៈពេលប៉ុន្មានឆ្នាំចុងក្រោយនេះ ខណៈដែលចំនួននៃការជាវទូរស័ព្ទចល័ត បានកើនឡើងដល់១៩,៦លាន និងការជាវអ៊ីនធឺណិតចំនួន១៨លាននៅក្នុងប្រទេស។
យោងតាម Statista ដែលជាវេទិកាអនឡាញមានឯកទេសផ្នែកទីផ្សារ និងទិន្នន័យអ្នកប្រើប្រាស់ បានឱ្យដឹងកាលពីពេលថ្មីៗនេះថា វិស័យ fintech របស់កម្ពុជាកំពុងរីកចម្រើនជាលំដាប់ នៅពីក្រោយការទទួលយកការទូទាត់ តាមបែបឌីជីថលយ៉ាងឆាប់រហ័ស។
ការរីកចម្រើនរបស់ប្រទេសកម្ពុជា បានកើតឡើងក្នុងរយៈពេលមួយទសវត្សរ៍ចុងក្រោយនេះ ទាក់ទងនឹងហេដ្ឋារចនាសម្ព័ន្ធ កំណើន GDP និងការវិនិយោគផ្ទាល់ពីបរទេស ដែលបានធ្វើឱ្យកម្ពុជាក្លាយជាគោលដៅចម្បងសម្រាប់ក្រុមហ៊ុន fintech ដើម្បីរីកចម្រើន ដោយបន្ថែមថា តម្លៃប្រតិបត្តិការសរុបតាមរយៈឌីជីថល ការទូទាត់នៅកម្ពុជា នឹងឈានដល់៤,៧៣ពាន់លានដុល្លារនៅឆ្នាំ២០២៣នេះ៕