ដោយៈ ម៉ាលីនណា
ភ្នំពេញៈ ក្រុមហ៊ុនផ្សារមូលបត្រកម្ពុជា (CSX) បានស្វាគមន៍ការចុះបញ្ជីភាគហ៊ុនសញ្ញាបណ្ណបៃតង នាពេលខាងមុខរបស់ក្រុមហ៊ុន Green Sustainable Venture (Cambodia)-(GSV) ដែលគ្រោងនឹងចុះបញ្ជី។
នេះនឹងក្លាយជាក្រុមហ៊ុនទី២ លើការចុះបញ្ជីសញ្ញាបណ្ណបៃតងនៅផ្សារហ៊ុនកម្ពុជា។
CSX កាលពីថ្ងៃទី៧ ខែមីនា ឆ្នាំ ២០២៣ បានអនុម័តលទ្ធភាពស្របច្បាប់លើការដាក់ពាក្យសុំ ចុះបញ្ជីសញ្ញាបណ្ណបៃតងរបស់ក្រុមហ៊ុនGSV ដើម្បីចុះបញ្ជីជាផ្លូវការ ប៉ុន្តែក្រុមហ៊ុនចាំបាច់ត្រូវទទួលបានការយល់ព្រមលើការបោះផ្សាយ លក់ជាលើកដំបូងជាសាធារណៈពីនិយតករមូលបត្រកម្ពុជា (SERC) និងបំពេញតាមលក្ខខណ្ឌតម្រូវការចុះបញ្ជីបន្ថែមទៀតរបស់ CSX។
លោកហុង សុហួរ អគ្គនាយកនៃផ្សារមូលបត្រកម្ពុជាបានមានប្រសាសន៍ឲ្យដឹងថា ការអនុម័តការត្រួតពិនិត្យ ភាពស្របច្បាប់លើការដាក់ពាក្យស្នើសុំ ចុះបញ្ជីរបស់ក្រុមហ៊ុនGSV គឺជាការត្រួសត្រាយផ្លូវសម្រាប់ក្រុមហ៊ុនមួយនេះ ដើម្បីត្រៀមខ្លួន និងរៀបចំឯកសារពាក់ព័ន្ធផ្សេងទៀត ដើម្បីបំពេញតាមលក្ខខណ្ឌ តម្រូវការបន្ថែមទៀតពី SERC និង CSX។
លោកថ្លែងថា “យើងស្វាគមន៍ចំពោះក្រុមហ៊ុន ដែលបានចុះបញ្ជីនៅផ្សារមូលបត្រកម្ពុជា ដោយសារក្រុមហ៊ុននេះ អនុវត្តតាមបេសកកម្មរបស់រាជរដ្ឋាភិបាល ក្នុងការកសាងសង្គមអាជីវកម្មបៃតង”។លោកបន្តថា “ការចុះបញ្ជីក្រុមហ៊ុននឹងបញ្ជាក់ថា ពួកគេកំពុងប្រតិបត្តិការអាជីវកម្មដោយគោរពដល់បរិស្ថាន”។
លោកបន្តថា ដោយមានការចូលរួមច្រើន ពីក្រុមហ៊ុនឯកជនលើការចុះបញ្ជីសញ្ញាបណ្ណបៃតង នឹងដើរតួនាទីជាគំរូមួយ ដើម្បីទាក់ទាញក្រុមហ៊ុនផ្សេងៗទៀតឱ្យចុះបញ្ជី ហើយអាចស្វែងរកមូលនិធិបន្ថែមទៀតសម្រាប់ការពង្រីក អាជីវកម្មរបស់ពួកគេ តាមរយៈទីផ្សារមូលធន៕
