ដោយ: គង់ លាងហួរ
ភ្នំពេញ: យោងតាមសេចក្តីប្រកាសព័ត៌មាន របស់ក្រសួងទេសចរណ៍នៅថ្ងៃសុក្រនេះ បានឱ្យដឹងថា ប្រទេសកម្ពុជាបានកំណត់គោលដៅភ្ញៀវទេសចរចិន រហូតដល់១លាននាក់នៅឆ្នាំ២០២៣នេះ។
សេចក្តីប្រកាសព័ត៌មានបានបន្តថា នៅឆ្នាំ២០២៣ កម្ពុជាត្រូវបានគេព្យាករណ៍ថា នឹងទទួលបានភ្ញៀវទេសចរអន្តរជាតិចន្លោះពី ៣ ទៅ ៤ លាននាក់ ក្នុងនោះមានភ្ញៀវទេសចរចិន ចន្លោះពី៨០ម៉ឺន ទៅដល់១លាននាក់។
លើសពីនេះទៀត ភ្ញៀវទេសចរជិត៣០ភាគរយ នៃភ្ញៀវទេសចរចិនសរុប ដែលនឹងចូលមកកម្ពុជា ត្រូវបានគេជឿថា ពួកគេនឹងទៅទស្សនាឧទ្យានបុរាណអង្គរដ៏ល្បីល្បាញ នៅក្នុងខេត្តសៀមរាប ដោយឧទ្យានបុរាណនេះ ធ្លាប់ទទួលបានភ្ញៀវទេសចរចិន ត្រឹមតែ១៨.៧៦៣នាក់ប៉ុណ្ណោះក្នុងឆ្នាំ២០២២។
កាលពីពេលថ្មីៗនេះ លោកសុខ សង្វារ អនុរដ្ឋលេខាធិការក្រសួងទេសចរណ៍ បានបើកកិច្ចប្រជុំជាមួយអាជ្ញាធរមូលដ្ឋាន និងប្រតិបត្តិករទេ សចរណ៍នៅក្នុងខេត្តសៀមរាប ដើម្បីត្រៀមខ្លួនជាស្រេច សម្រាប់ការវិលត្រឡប់របស់ភ្ញៀវទេសចរចិនផងដែរ។
លោកបានមានប្រសាសន៍ថា “កម្ពុជាបានស្វាគមន៍ជាបណ្តើរៗនូវការបន្តជើងហោះហើរត្រង់ ពីប្រទេសចិនមកកាន់ទីក្រុងភ្នំពេញ និងខេត្តព្រះសីហនុរបស់កម្ពុជា បន្ទាប់ពីប្រទេសចិន បានបង្កើនប្រសិទ្ធភាពយុទ្ធសា ស្ត្រប្រឆាំងនឹងជំងឺកូវីដ-១៩ នៅថ្ងៃទី ៨ ខែមករា និងបន្តដំណើរទេសចរណ៍ជាក្រុមឡើងវិញនៅថ្ងៃទី ៦ ខែកុម្ភៈ”។
លោក សុខ សង្វារ បានបន្ថែមថា “ខេត្តសៀមរាបត្រូវបានរំពឹងថានឹងស្វាគមន៍ ការបន្តជើងហោះហើរត្រង់ជាលើកដំបូង ពីប្រទេសចិននៅដើមខែមីនាខាងមុខនេះ”។
មន្ត្រីរូបនេះបានណែនាំដល់អាជ្ញាធរមូលដ្ឋាន និងធុរកិច្ចទាក់ទងនឹងទេសចរណ៍ ឱ្យដាក់បញ្ចូលឡើងវិញនូវយុទ្ធសាស្ត្រ “China Ready” ដែលត្រូវបាន ដាក់ឱ្យដំណើរការជាលើកដំបូងក្នុងឆ្នាំ២០១៦។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានមានប្រសាសន៍ថា “ការវិលត្រឡប់មកវិញ នៃភ្ញៀវទេសចរចិនក៏បានផ្តល់ក្តីសង្ឃឹមខ្ពស់ សម្រាប់ឧស្សាហកម្មទេសចរណ៍ និងកំណើនសេដ្ឋកិច្ចរបស់កម្ពុជាផងដែរ”។
លោកស្រីបានបញ្ជាក់ប្រាប់សារពត៌មាន Xinhua ថា “ខ្ញុំគិតថា ឧទ្យានបុរាណវិទ្យាអង្គរ និងទីក្រុងឆ្នេរសមុទ្រខេត្តព្រះសីហនុ នឹងនៅតែជាគោលដៅ ដ៏ទាក់ទាញបំផុតសម្រាប់ភ្ញៀវទេសចរចិន”៕