ដោយគង់ ម៉ាលីន
ភ្នំពេញៈ ទីបំផុត ប្លង់គោលអភិវឌ្ឍន៍ទីក្រុងកោះនរាលំអិត បានដាក់តាំងបង្ហាញជាផ្លូវការហើយ ខណៈសកម្មភាពរៀបចំហេដ្ឋារចនាសម្ព័ន្ឋទីក្រុងនេះបាន និងកំពុងដំណើរការយ៉ាងសកម្ម។
អគ្គនាយករងក្រុមហ៊ុនOCIC លោកទូច សំណាងធ្លាប់បានមានប្រសាសន៍ឲ្យដឹងកាលពីពេលថ្មីៗនេះថា ការរៀបចំហេដ្ឋារចនាសម្ព័ន្ឋសំរាប់កសាងទីក្រុងកោះនរា ដែលមានទំហំផ្ទៃដីជាង១០០ហិកតា នឹងបញ្ចប់តាមផែនការនៅឆ្នាំ២០២៣ខាងមុខនេះ ដោយគ្រោងចំណាយទុកវិនិយោគ ប្រមាណ២០០០លានដុល្លារអាមេរិក (គិតតែការរៀបចំហេ ដ្ឋារចនាសម្ព័ន្ឋ)។
លោកបន្តថា “ផែនការអភិវឌ្ឍន៍ទីក្រុងកោះនរា មានសភាពស្រដៀងគ្នានឹងទីក្រុងកោះពេជ្រនាពេលបច្ចុប្បន្ននេះ ដោយវានឹងក្លាយជាមជ្ឈមណ្ឌលពាណិជ្ជកម្ម លំនៅដ្ឋានលំដាប់អន្តរជាតិ”។លោកបន្តថា “ជាមួយគ្នានេះការបើកការដ្ឋានសម្ភោធស្ពានឆ្លងពីកោះពេជ្រ ទៅកាន់ទីក្រុងកោះនរា ក្រោមអធិបតីភាពរបស់សម្តេចតេជោ នឹងប្រព្រឹត្តិទៅតាមការគ្រោងទុក”។
លោកទូច សំណាងបានបន្តថា បច្ចុប្បន្នសកម្មភាព នៃការសាងសង់រចនាសម្ព័ន្ឋ ការចាក់គ្រឹះចេញពីទន្លេ ដើម្បីកសាងទីក្រុងនេះបាន និងកំពុងទទួលបានជោគជ័យ ដោយមិនបង្កឲ្យមានផលប៉ះពាល់បរិស្ថានណាមួយឡើយ ព្រោះក្រុមហ៊ុនបានសិក្សាពីបរិស្ថាន និងផលប៉ះពាល់ច្បាស់លាស់ណាស់ ទើបសម្រេចកសាងទីក្រុងនេះឡើង ព្រោះទីតាំងទីក្រុងនេះជាអតីតកោះចាស់ ដែលបានបាក់ចូលទឹកទន្លេកំឡុងទសវត្សរ៍កន្លងមកនេះ៕
