ដោយៈម៉ាណេត
ភ្នំពេញៈ រដ្ឋាភិបាលសហរដ្ឋមេរិក បានផ្តល់ជំនួយចំនួនជិត៣,៥ ពាន់លានដុល្លារ ជួយដល់តំបន់ទន្លេមេគង្គ ដើម្បីជាការឆ្លុះបញ្ចាំងពីសារៈសំខាន់ នៃតំបន់ទន្លេមេគង្គ និងការប្តេជ្ញាចិត្តរបស់អាមេរិក ចំពោះដៃគូនៅតំបន់ទន្លេមេគង្គ។
ថ្លែងនៅក្នុងសន្និសីទឥណ្ឌូប៉ាស៊ីហ្វិកស្តីពី ការពង្រឹងអភិបាលកិច្ចទន្លេហូរឆ្លងកាត់ព្រំដែនកាលពីសប្តាហ៍មុន លោក David R. Stilwell ឧបការីរដ្ឋមន្ត្រីរបស់សហរដ្ឋអាមេរិក បានលើកឡើងថា ភាពជាដៃគូរបស់សហរដ្ឋមេរិក ជាមួយប្រទេសកម្ពុជា ឡាវ ភូមា ថៃ និងវៀតណាម បានរីកចម្រើនគួរឲ្យកត់សម្គាល់ ចាប់តាំងពីសហរដ្ឋអាមេរិកបានបង្កើតគម្រោងគំនិតផ្តួចផ្តើមស្តីពីតំបន់មេគង្គក្រោម នៅឆ្នាំ ២០០៩ ។
លោក ថា “វាជាសំណាងល្អមួយ ដែលយើងអាចប្រជុំគ្នាបាន បើទោះបីជាយើងមិនអាចជួបគ្នាទល់មុខក្តី ពីព្រោះទន្លេមេគង្គមានសារៈសំខាន់សម្រាប់យើងទាំងអស់គ្នា” ។
លោកបានបន្តថា នៅក្នុងរយៈពេល១១ឆ្នាំមកនេះ រដ្ឋាភិបាលសហរដ្ឋមេរិកបានផ្តល់ថវិកាចំនួនជិត៣,៥ពាន់លានដុល្លារ ជាជំនួយបរទេស ជួយដល់តំបន់ទន្លេមេគង្គ រួមនឹងថវិការាប់ពាន់លានដុល្លារទៀត ជាហិរញ្ញប្បទានផ្លូវការរបស់រដ្ឋាភិបាលសហរដ្ឋមេរិក និងការវិនិយោគនៃវិស័យឯកជនអាមេរិក។
ឆ្នាំនេះ មានការពង្រីកបន្តទៀត ជាមួយនឹងការសម្ពោធ កាលពីខែមុន នូវគម្រោង ភាពជាដៃគូរវាងសហរដ្ឋមេរិក និងតំបន់ទន្លេមេគង្គ។
លោក Stilwell មានប្រសាសន៍ថា “នៅពេលនេះ កិច្ចសហការរបស់យើងធំ មានភាពជ្រាលជ្រៅ និងមានលក្ខណៈជាយុទ្ធសាស្ត្រច្រើនជាងមុន ហើយមានធនធានច្រើនជាងមុន ដែលជាការឆ្លុះបញ្ចាំង ពីសារៈសំខាន់នៃតំបន់ទន្លេមេគង្គ និងការប្តេជ្ញាចិត្តរបស់យើង ចំពោះដៃគូនៅតំបន់ទន្លេមេគង្គ” ។
គម្រោងនៃភាពជាដៃគូ មេគង្គ សហរដ្ឋអាមេរិក ផ្តល់កិច្ចសហប្រតិបត្តិការស្តីពីអភិបាលកិច្ច តាមដងទន្លេដែលហូរឆ្លងព្រំដែន ជាបញ្ហាចំពោះមុខ។ ហើយវាធ្វើឡើងក្នុងពេលសំខាន់។
លោកបានថ្លែងទៀតថា“បញ្ហាប្រឈមក្នុងតំបន់ ទាក់ទងនឹងធនធានទឹករួមគ្នាមានកាន់តែធំឡើង ចាប់តាំងពីពេលដែលលោក Pompeo រដ្ឋមន្ត្រីការបរទេសសហរដ្ឋអាមេរិក បានប្រកាសពីបំណងរបស់យើង ក្នុងការរៀបចំសន្និសីទនេះ នៅក្នុងឆ្នាំ ២០១។ នៅពេលនោះ លោករដ្ឋមន្ត្រីបានសម្តែងកង្វល់ច្រើន លើនិន្នាការដ៏គួរឲ្យបារម្ភ។ ពេលនេះ យើងប្រឈមនឹងវិបត្តិនេះ” ៕
