ដោយ៖ សុធីតា
ភ្នំពេញ៖ ក្នុងឆ្នាំថ្មី២០២៣ កម្ពុជា-ចិន បានដាក់ចេញផែនការជាច្រើន លើកិច្ចសហការជំរុញពាណិជ្ជកម្ម និងយន្តការសហប្រតិបត្តិការលើគ្រប់វិស័យ ដើម្បីឱ្យឈានដល់កម្រិតខ្ពស់ និងថ្មីៗបន្ថែម ជាពិសេសការបន្តជំរុញកិច្ចសហប្រតិបត្តិការ លើវិស័យឧស្សាហកម្ម សេដ្ឋកិច្ច និងពាណិជ្ជកម្មទ្វេភាគី ដើម្បីបំពេញឱ្យគ្នាទៅវិញទៅមកប្រកបដោយសក្តានុពល។
លោក FU Jinming អគ្គនាយករង នៃមន្ទីរពាណិជ្ជកម្មតំបន់ស្វយ័តក្វាងស៊ី នៃសាធារណរដ្ឋប្រជាមានិតចិន លើកឡើងនៅក្នុងវេទិកា ស្តីពីការជំរុញពាណិជ្ជកម្មនិងវិនិយោគកម្ពុជា-ចិន (ក្វាងស៊ី) នៅសប្តាហ៍មុនថា គិតត្រឹមខែវិច្ឆិកា ឆ្នាំ២០២២ ទំហំពាណិជ្ជកម្មនាំចេញ-នាំចូល រវាងក្វាងស៊ី និងកម្ពុជា មានចំនួន១.៦៩០លានយ័ន កើនឡើងយ៉ាងខ្ពស់ ក្នុងអត្រាជិត៧២% បើប្រៀបធៀបនឹងរយៈពេលដូចគ្នាកាលពីឆ្នាំ២០២១។
លោក FU Jinming បន្តថា យុគសម័យក្រោយវិបត្តិជំងឺកូរីដ-១៩ ក្វាងស៊ី និងកម្ពុជា សុទ្ធតែជួបប្រទះនូវកាលានុវត្តភាព ក្នុងការពន្លឿនការអភិវឌ្ឍ។ ក្នុងនោះ ចិនមានបំណងចាប់ដៃជាមួយគ្រប់មជ្ឈដ្ឋាននៅកម្ពុជា ដើម្បីធ្វើកិច្ចសហការស៊ីជម្រៅ ធ្វើការអភិវឌ្ឍរួមគ្នា និងបង្កើតវិបុលភាពរួមគ្នារួមមាន៖ បន្តជំរុញយន្តការកិច្ចសហប្រតិបត្តិការ រវាងមន្ទីរពាណិជ្ជកម្មក្វាងស៊ី ជាមួយអគ្គនាយកដ្ឋាន ជំរុញពាណិជ្ជកម្ម នៃក្រសួងពាណិជ្ជកម្មកម្ពុជា ដោយប្រើប្រាស់ឱ្យបានគ្រប់គ្រាន់ និងឱ្យបានល្អ នូវភាគលាភអភិវឌ្ឍន៍ នៃការចូលជាធរ មាននៃកិច្ចព្រមព្រៀង RCEP និងអនុវត្តឱ្យបានល្អនូវផែនការទ្វេភាគី ។
ការបន្តជំរុញកិច្ចសហប្រតិបត្តិការឧស្សាហកម្ម សេដ្ឋកិច្ច និងពាណិជ្ជកម្មទ្វេភាគី ក្នុងនោះវិស័យឧស្សាហកម្មក្វាងស៊ី និងកម្ពុជា បានបំពេញឱ្យគ្នាទៅវិញទៅមក ស្របតាមសក្តានុពល នៃកិច្ចសហការធំធេង និងការបន្តជំរុញការកសាងភាពតភ្ជាប់រវាងភាគីទាំងពីរ កិច្ចព្រមព្រៀង RCEP បានដាក់ចេញតម្រូវការកាន់តែ ច្រើន និងកាន់តែខ្ពស់ សម្រាប់ការដឹកជញ្ជូនឆ្លងដែនក្វាងស៊ី នឹងសកម្មក្នុងការកសារច្រកថ្មី និងក្រុមហ៊ុនក្វាងស៊ី ។
លោក កៅ កោសល អគ្គនាយកជំរុញពាណិជ្ជកម្ម នៃក្រសួងពាណិជ្ជកម្មកម្ពុជា បានវាយតម្លៃខ្ពស់ ចំពោះការអនុវត្ត នូវគោលនយោបាយជាយុទ្ធសាស្ត្រ តាមគំនិតផ្តួចផ្តើមរបស់ ឯកឧត្តម ស៊ី ជីនភីង ប្រធានាធិបតីចិន ក្នុងការកែទម្រង់ស៊ីជម្រៅ លើអភិ បាលកិច្ចប្រទេសចិន និងការដាក់ចេញនូវយុទ្ធសាស្ត្រខ្សែក្រវ៉ាត់ និងផ្លូវ សម្រាប់កិច្ចសហប្រតិបត្តិការអន្តរជាតិ ដែលមិនត្រឹមដើរតួនាទី ជាគន្លឹះ ក្នុងការជំរុញកំណើនសេដ្ឋកិច្ច និង ពាណិជ្ជកម្មចិនប៉ុណ្ណោះទេ តែក៏ជាការគិតគូរវែងឆ្ងាយ សំដៅលើកកម្ពស់ការតភ្ជាប់ និងកិច្ច សហប្រតិបត្តិការលើគ្រប់វិស័យ ទាំងហេដ្ឋារចនាសម្ព័ន្ធសេដ្ឋកិច្ច វិនិយោគ និងហិរញ្ញវត្ថុព្រមទាំងទំនាក់ទំនងរវាងប្រជាជន និងប្រជាជន ក្នុងចំណោមប្រទេសក្នុងតំបន់ និងលើសកលលោក ដែលបង្កើតបាននូវ ក្បាលម៉ាស៊ីនថ្មីមួយ ក្នុងការអូសទាញកំណើនសេដ្ឋកិច្ចពិភពលោក ថែមទៀត៕