ដោយ: គង់ លាងហួរ
សៀមរាប: ឧទ្យានអង្គរដ៏ល្បីល្បាញរបស់ប្រទេសកម្ពុជាបានទាក់ទាញភ្ញៀវទេសចរបរទេសចំនួន២៨៧.៤៥៤នាក់ក្នុងឆ្នាំ២០២២ ដោយរកចំណូលបាន១១,៥លានដុល្លារអាមេរិក ពីការលក់សំបុត្រចូលទស្សនា។
លោក តុប សុភ័គ រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានមានប្រសាសន៍ថា ចំនួនភ្ញៀវទេសចរអន្តរជាតិ មកទស្សនាអង្គរបានងើបឡើងវិញ ជាបណ្តើរៗ ហើយបន្ទាប់ពីប្រទេសកម្ពុជាបានគ្រប់គ្រង ដោយជោគជ័យនូវជំងឺកូវីដ១៩ និងបានបើកច្រកព្រំដែនឡើងវិញ យ៉ាងពេញលេញ។
លោកបញ្ជាក់បានប្រាប់សារពត៌មានចិន Xinhua ថា បច្ចុប្បន្ន ប្រាសាទអង្គរបានទាក់ទាញភ្ញៀវបរទេស ចន្លោះពី១.៨០០ទៅ២.០០០នាក់ ក្នុងមួយថ្ងៃ ដែលតួលេខនេះជាកំណើនគួរឱ្យកត់សម្គាល់ពី៧០នាក់ ក្នុងមួយថ្ងៃ ក្នុងអំឡុងពេលជំងឺរាតត្បាត នៅឆ្នាំ២០២០ និង២០២១។
លោក តុប សុភ័គ បានបន្តថា ទោះបីជាយ៉ាងណាក្តី ចំនួនភ្ញៀវទេសចរ បច្ចុប្បន្ននៅតែមានកម្រិតទាប បើប្រៀបធៀបទៅនឹងសម័យមុនជំងឺរាតត្បាត ដែលបានកត់ត្រាភ្ញៀវទេសចរអន្តរជាតិ រហូតដល់៩.០០០នាក់ ក្នុងមួយថ្ងៃ។
លោកបានអះអាងថា “យើងជឿជាក់ថា នឹងមានភ្ញៀវទេសចរបរទេស កាន់តែច្រើនមកកម្ពុជា ជាពិសេស មកកាន់អង្គរ ក្នុងរយៈពេលប៉ុន្មានឆ្នាំខាងមុខនេះ ដោយសារក្រុមហ៊ុនអាកាសចរណ៍ជាច្រើន បានបើកជើងហោះហើរមកកាន់កម្ពុជាឡើងវិញ”។
ស្ថិតនៅភាគពាយព្យនៃខេត្តសៀមរាប ឧទ្យានបុរាណវិទ្យាអង្គរ មានទំហំ៤០១គីឡូម៉ែត្រការ៉េ និងបានចុះក្នុងបញ្ជីបេតិកភណ្ឌពិភពលោក របស់អង្គការអប់រំ វិទ្យាសាស្ត្រ និងវប្បធម៌ របស់អង្គការសហប្រជាជាតិ (UNESCO) ក្នុងឆ្នាំ១៩៩២ គឺជាគោលដៅទេសចរណ៍ពេញនិយមបំផុត នៅក្នុងប្រទេសកម្ពុជា។
នៅក្នុងអំឡុងពេល មុនការរាតត្បាត នៃជំងឺកូវីដ១៩ ប្រាសាទអង្គរបានទទួលភ្ញៀវអន្តរជាតិ រហូតដល់ទៅ២,២លាននាក់ ក្នុងឆ្នាំ២០១៩ ដោយរកចំណូលបាន៩៩លានដុល្លារពីការលក់សំបុត្រ៕
