ដោយ: លាងហួរ
ភ្នំពេញ: គម្រោងវិនិយោគថ្មីចំនួន៤ នៅក្នុងតំបន់សេដ្ឋកិច្ចពិសេសក្រុងព្រះសីហនុ (SSEZ) ក្នុងខេត្តព្រះសីហនុ និងតំបន់សេដ្ឋកិច្ចពិសេសភ្នំពេញ (PPSEZ) ទទួលបានទុនវិនិយោគសរុប ប្រមាណ១៦,៣លានដុល្លារ។
យោងតាមសេចក្តីប្រកាសព័ត៌មាន ដែលចេញផ្សាយដោយក្រុមប្រឹក្សាអភិវឌ្ឍន៍កម្ពុជា (CDC) បានឱ្យដឹងថា គម្រោងទាំង៤ ដែលទើបបានអនុម័តនេះ នឹងផ្តោតលើការផលិតបន្ទះក្តារ ថង់ប្លាស្ទិក ផលិតផលក្រដាស ផលិតផលបោះពុម្ព និងវេចខ្ចប់។
គម្រោងចំនួន៣ មានទីតាំងនៅតំបន់សេដ្ឋកិច្ចពិសេស ក្រុងព្រះសីហនុ ដោយគម្រោងមួយទៀត មានទីតាំងនៅតំបន់សេដ្ឋកិច្ចពិសេសភ្នំពេញ ហើយគម្រោងទាំងនោះ នឹងបង្កើតការងារបានចំនួន៧៤០កន្លែង សម្រាប់អ្នកស្រុក។
ការវិនិយោគដំណាលគ្នានៅក្នុងតំបន់ SSEZ និងតំបន់ PPSEZ បានបង្ហាញឱ្យឃើញថា សេដ្ឋកិច្ចកម្ពុជាកំពុងដំណើរការយ៉ាងល្អប្រសើរ ហើយកាលពីពេលថ្មីៗនេះ ផ្លូវល្បឿនលឿនតភ្ជាប់ពីរាជធានីភ្នំពេញ និងក្រុងព្រះសីហនុ ក៏បានបើកដំណើរការ នៅចន្លោះតំបន់សេដ្ឋកិច្ចទាំង២ផងដែរ។
ផ្លូវល្បឿនលឿនភ្នំពេញ-ព្រះសីហនុ គឺជាប្រវត្តិសាស្ត្រមួយ ដែលបង្ហា ញពីមិត្តភាពកម្ពុជា-ចិន និងជាធាតុផ្សំនៃគំនិតផ្តួចផ្តើមខ្សែក្រវ៉ាត់មួយ ផ្លូវមួយ របស់ប្រទេសចិន។
ផ្លូវនេះមានប្រវែង១៩០គីឡូម៉ែត្រ និងបានចំណាយថវិកាសាងសង់ រហូតដល់ ២០០០លានដុល្លារអាមេរិក និងមានតម្លៃថ្លៃខ្លាំង បើធៀបនឹងផ្លូវហាយវេផ្សេងទៀត នៅក្នុងប្រទេសកម្ពុជា៕
