ដោយៈម៉ាណេត
ភ្នំពេញៈ ប្រព័ន្ធធនាគារបានអភិវឌ្ឍយ៉ាងឆាប់រហ័ស និងប្រកបដោយស្ថិរភាព ក្រោយពីការកែទម្រង់វិស័យធនាគារ ត្រូវបានបញ្ចប់ដោយជោគជ័យចាប់ពីឆ្នាំ២០០០មក។ ប្រព័ន្ធធនាគារក៏ត្រូវបានធ្វើទំនើបកម្មជាបន្តបន្ទាប់ ស្របតាមនិម្មាបនកម្មហិរញ្ញវត្ថុអន្តរជាតិ និងបានរួមចំណែកស្នូលក្នុងការរក្សាស្ថិរភាពម៉ាក្រូសេដ្ឋកិច្ច គាំទ្រកំណើនសេដ្ឋកិច្ច, លើកកម្ពស់បរិយាបន្នសេដ្ឋកិច្ចនិងសង្គម និងកាត់បន្ថយភាពក្រីក្រ។
ក្នុងរយៈពេលពីរទសវត្សរ៍ចុងក្រោយនេះ អត្រាអតិផរណាត្រូវបានគ្រប់គ្រងឱ្យមានកម្រិតទាបប្រមាណ២,៥% ជាមួយនឹងស្ថិរភាពល្អប្រសើរ នៃអត្រាប្តូរប្រាក់ក្នុងរង្វង់ ៤.០៥០រៀលក្នុងមួយដុល្លារអាមេរិក ស្របពេលដែលទុនបម្រុងអន្តរជាតិដុលត្រូវបានគរពូន ឱ្យមានកម្រិតខ្ពស់ជាលំដាប់ រហូតដល់២០ពាន់លានដុល្លារអាមេរិក ស្មើនឹងប្រមាណ ១០ខែ នៃការនាំចូលទំនិញនិងសេវា ដែលខ្ពស់ជាង៣ដងនៃកម្រិតអប្បបរមា ដែលប្រទេសកំពុងអភិវឌ្ឍន៍គួរមាន (៣ខែ)។ នេះបើយោងតាមរបាយការណ៍របស់ធនាគារជាតិនៃកម្ពុជា។
របាយការណ៍បានឱ្យដឹងថា “ទ្រព្យសកម្មវិស័យធនាគារបានកើនឡើងយ៉ាង ឆាប់រហ័សពីប្រមាណត្រឹមតែ០,៥ ប៊ីលានដុល្លារអាមេរិកក្នុងឆ្នាំ១៩៩៨ ដល់៥៦ប៊ីលានដុល្លារអាមេរិកនាពេលបច្ចុប្បន្ន គឺកើនឡើងប្រមាណ១១២ដង។ ឥណទានប្រព័ន្ធធនាគារដែលត្រូវបានបែងចែកទៅ កាន់គ្រប់វិស័យនៃសេដ្ឋកិច្ច និងប្រាក់បញ្ញើក្នុងស្រុកបានកើនឡើង ១៦៥ដង ប្រហាក់ប្រហែលគ្នា គឺពីចំនួនប្រមាណតែ០,២ពាន់លានដុល្លារអាមេរិក ដល់ជាង ៣៣ពាន់លានដុល្លារអាមេរិក” ។
ប្រព័ន្ធធនាគារក៏បានប្រើប្រាស់បច្ចេកវិទ្យាហិរញ្ញវត្ថុ (Fintech) ក្នុងប្រតិបត្តិការ ជាពិសេសសម្រាប់ការទូទាត់ ដែលបានលើកកម្ពស់បរិយាបន្នហិរញ្ញវត្ថុកម្ពុជា ជាលំដាប់។ ជាក់ស្តែងប្រជាជនពេញវ័យដែលទទួលបានសេវា ហិរញ្ញវត្ថុផ្លូវការកើនឡើងដល់ប្រមាណជាង ៧០% ធៀបនឹងពីរទសវត្សរ៍មុន (តិចជាងប្រមាណ ១០% ប៉ុណ្ណោះ)។
លោក ជា ចាន់តូ ទេសាភិបាលធនាគារជាតិនៃកម្ពុជា ធ្លាប់បានលើកឡើងថា សមិទ្ធផលដែលសម្រេចបានក្នុងរយៈពេល៤១ឆ្នាំនេះ កើតចេញពីកិច្ចខិតខំប្រឹងប្រែងរួមរបស់រាជរដ្ឋាភិបាល ធនាគារជាតិនៃកម្ពុជា និងភាគីពាក់ព័ន្ធទាំងអស់ ក្រោមម្លប់សន្តិភាព ដែល សម្តេចតេជោនាយករដ្ឋមន្ត្រី បានស្ថាបនាឡើង និងថែរក្សារហូតមកដល់បច្ចុប្បន្ន៕