ដោយ៖ សុផារី
ភ្នំពេញ៖ ផ្សារមូលបត្រកម្ពុជា នៅព្រឹកថ្ងៃទី២ ខែវិចិ្ឆកា ឆ្នាំ២០២២ បានរៀបចំសិក្ខាសាលាស្តីពី “ហិរញ្ញប្បទានប្រកបដោយនិរន្តភាព” ដោយស្របតាមផែនការយុទ្ធសាស្រ្តស្តីពីការអភិវឌ្ឍបៃតងឆ្នាំ២០១៣-២០៣០ និងកិច្ចគាំទ្រពីស្ថាប័នពាក់ព័ន្ធ ក្នុងការអភិវឌ្ឍហិរញ្ញប្បទាននិរន្តរភាពតាមរយៈការកៀរគរទុនពីផ្សារមូលបត្រកម្ពុជា។
សិក្ខាសាលានេះ រៀបចំឡើងក្នុងគោលបំណងលើកកម្ពស់ការយល់ដឹងពីហិរញ្ញប្បទាននិរន្តរភាពរួមមានសញ្ញាបណ្ណបៃតងជាមួយនឹងអត្ថប្រយោជន៍ទៅដល់ភាគីពាក់ព័ន្ធ។
កាលពីពេលថ្មីៗនេះ ផ្សារមូលបត្រកម្ពុជា (CSX) បានសម្ពោធដាក់ឱ្យប្រើប្រាស់ជាផ្លូវការប្រព័ន្ធបើកគណនីជួញដូរតាមអនឡាញ ដែលនឹងអនុញ្ញាតឱ្យវិនិយោគិនអាចបើកគណនីបាននៅគ្រប់ទីកន្លែង និងអាចសម្រួលដល់វិនិយោគិនបានច្រើន និងបង្កើនការជួញដូរផងដែរ។
លោក ហុង សុហួរ អគ្គនាយក CSX បានថ្លែងថា ដោយមើលឃើញពីនិន្នាការនៃការប្រែប្រួលមកការនិយមប្រើប្រាស់តាមប្រព័ន្ធបច្ចេកវិទ្យា CSX តែងតែព្យាយាមធ្វើទំនើបកម្មនូវកម្មវិធីផ្សេងៗសំដៅបង្កលក្ខណៈភាពងាយស្រួលដល់សាធារណជនក៏ដូចជាវិនិយោគិនអាចធ្វើការជួញដូរបានកាន់តែច្រើន។
លោកឱ្យដឹងថា ផ្សារមូលបត្រកម្ពុជាយើងបានខិតខំដាក់ចេញនូវទំនើបកម្មឌីជីថលជាលំដាប់ដូចជាការបង្កើត APP CSX Trade ដែលយើងបានសម្ពោធកាលពីសិក្ខាសាលាថ្នាក់ជាតិខួប ១០ ឆ្នាំរបស់ផ្សារមូលបត្រកម្ពុជា ការបង្កើតនូវប្រព័ន្ធបើកគណនីជួញដូរតាមអនឡាញ ដែលជាជំហានសំខាន់ថ្មីរបស់ផ្សារមូលបត្រកម្ពុជា និងការធ្វើទំនើបកម្មនូវបណ្ណាល័យព័ត៌មានរួម Phsarhun APP ជំនាន់ទី ២ ដែលផ្តល់ភាពងាយស្រួលកាន់តែខ្លាំង ដល់វិនិយោគិនរបស់យើងនៅក្នុងការស្វែងយល់ពីផ្សារហ៊ុន។ ផ្សារមូលបត្រកម្ពុជាក៏នឹងបន្តខិតខំការធ្វើទំនើបកម្មប្រព័ន្ធនានា ដើម្បីសម្រួលដល់វិនិយោគិនក្នុងការវិនិយោគ៕