ការដឹកនាំគឺជារឿងសំខាន់មួយដែលទាមទារឱ្យមាននៅក្នុងខ្លួនមនុស្សម្នាក់ ដើម្បីឈានទៅរកភាពជោគជ័យ និងសម្រេចកិច្ចការ។ សូមរើសពណ៌របស់ប្រអប់ណាមួយ ដើម្បីដឹងពីចំនុចពិសេសនៃការដឹកនាំរបស់អ្នកថាមានលក្ខណៈដូចម្តេចខ្លះ?
ពណ៌ខៀវ
អ្នកមានសុទិដ្ឋិនិយម និងមានភាពច្នៃប្រឌិត នៅក្នុងការដឹកនាំក្រុម។ មិនតែប៉ុណ្ណោះ អ្នកជាមេដឹកនាំម្នាក់ដែលមានចិត្តសណ្តោសប្រណី យោគយល់ និងអាណិតអាសូរចំពោះមនុស្សជុំវិញខ្លួនជានិច្ច។ ជាពិសេស អ្នកជាមនុស្សដែលប្រើអារម្មណ៍ច្រើន ការគិតពិចារណា ប្រើលើបេះដូងជាងខួរក្បាល ដោយសារអ្នកជាមនុស្សពោរពេញដោយមនោសញ្ចេតនា និងតែងស្វែងរកភាពសុខដុម ក្តីសុខមកកាន់ក្រុមការងារ។
ពណ៌មាស
ពណ៌នេះបង្ហាញថាអ្នកជាមេដឹកនាំដែលមានភាពស្មោះត្រង់ចំពោះកូនចៅ និងក្រុមការងារទាំងមូល។ ការគោរពទៅលើវិន័យ និងមានភាពសុក្រឹតទៀងត្រង់ទៅលើច្បាប់ ព្រោះអ្នកមិនមែនបង្គាប់បញ្ជា ឬដាក់វិនិ័យសម្រាប់តែក្រុមមួយមុខទេ តែអ្នកក៏អនុវត្តច្បាប់វិន័យនោះដូចគេឯងដូចគ្នា។ ការទទួលខុសត្រូវ រៀបចំ គឺមានពេញខ្លួនរបស់អ្នក ហើយបើសិនជាក្រុមការងារឬអ្នកមានថ្នាក់ទាបជាងខ្លួនធ្វើល្អ នោះអ្នកនឹងស្ងើចសរសើរ ព្រមទាំងទទួលយកភាពល្អនោះដោយរីករាយ។
ពណ៌ទឹកក្រូច
ភាពដឹកនាំរបស់អ្នកមានក្រឹតក្រមល្អ ដោយសារអ្នកទទួលស្វាគមន៍ការផ្លាស់ប្តូរ ការរិះគន់ និងហេតុផលជាច្រើនទៀត។ អ្នកជាមនុស្សចូលចិត្តផ្សងព្រេង ហ៊ានប្រថុយ ដែលមិនខ្លាចនឹងការខុស ឬខូចខាត ដោយចាត់ទុកថា វាជាបទពិសោធន៍។ ម្យ៉ាង អ្នកជាប្រភេទមនុស្សចូលចិត្តការប្រកួតប្រជែង ដោយមិនគិតឱ្យបានច្បាស់យូរនោះឡើយ។
ពណ៌បៃតង
អ្នកប្រើប្រាស់ហេតុផលច្រើន ព្រោះអ្នកជាមនុស្សដែលមានវិចារណញាណឯករាជ្យ គិតស៊ីជម្រៅ។ ការផ្តោត សមាធិ ការវិភាគ គឺជាធាតុផ្សំពិសេសដែលធ្វើឱ្យអ្នកក្លាយជាមេដឹកនាំមួយដ៏គួរឱ្យគោរព ហើយក៏គួរឱ្យខ្លាចដែរ។ រាល់គម្រោងនិងគំនិតរបស់អ្នក តែងតែមានប្រសិទ្ធភាពជានិច្ច ដែលចំនុចទាំងអស់នេះបង្ហាញថា អ្នកជាថ្នាក់ដឹកនាំចាស់ទុំ។
