ដោយ:លាងហួរ
សេអ៊ូល: តម្លៃផ្ទះនៅប្រទេសកូរ៉េខាងត្បូង បានដាំក្បាលចុះដល់កម្រិតទាបបំផុត ក្នុងរយៈពេលជាង១០ឆ្នាំ ជុំវិញការកើនឡើងយ៉ាងខ្លាំងនៃអត្រាការប្រាក់គោល។
អ្នកជំនាញផ្នែកអចលនទ្រព្យ បានព្យាករណ៍ថាតម្លៃលំនៅដ្ឋានមិនទាន់ធ្លាក់ចុះដល់កម្រិតទាបបំផុតនៅឡើយទេ ហើយនឹងបន្តធ្លាក់ចុះរហូតដល់ចុងឆ្នាំ២០២៣។
យោងតាមទិន្នន័យពីក្រុមប្រឹក្សាភិបាល អចលនទ្រព្យកូរ៉េបានឱ្យដឹងថា តម្លៃផ្ទះល្វែងជាមធ្យម នៅទូទាំងប្រទេសបានធ្លាក់ចុះ០,២៣ភាគរយនៅសប្តាហ៍នេះ ធៀបនឹងសប្តាហ៍មុន។
តួលេខនេះគូសបញ្ជាក់ពីការធ្លាក់ចុះយ៉ាងខ្លាំងបំផុត នៃតម្លៃមធ្យមនៃអាផាតម៉ិន ដែលជាប្រភេទលំនៅដ្ឋាន ដ៏សំខាន់នៅក្នុងប្រទេសកូរ៉េ ចាប់តាំងពីថ្ងៃទី៧ ខែឧសភា ឆ្នាំ២០១២ នៅពេលដែលក្រុមប្រឹក្សាភិបាលបានចាប់ផ្តើមចងក្រងទិន្នន័យពាក់ព័ន្ធ។
តម្លៃអាផាតម៉ិនជាមធ្យម នៅតំបន់The greater Seoul area ដែលមានប្រជាជនរស់នៅច្រើន បានធ្លាក់ចុះមកនៅត្រឹម០,២៨ភាគរយ ធៀបនឹងសប្តាហ៍មុន។
ក្រុមប្រឹក្សាភិបាលបានសរសេរ នៅក្នុងសេចក្តីប្រកាសព័ត៌មានមួយថា និន្នាការធ្លាក់ចុះនៃតម្លៃផ្ទះ នៅក្នុងទីក្រុងសេអ៊ូល ត្រូវបានគេសន្មតថាបណ្តាលមកពីការព្រួយបារម្ភ លើការដំឡើងអត្រាការប្រាក់បន្ថែម និងការធ្លាក់ចុះនៃទីផ្សារលំនៅដ្ឋាន៕
