ដោយៈ គង់ ម៉ាលីនណា
ភ្នំពេញៈ ក្រុមហ៊ុនCredit Bureau (Cambodia) Co., Ltd (CBC) ) បានដាក់ឱ្យដំណើរការសេវាវិភាគទិន្នន័យ កម្រិតខ្ពស់ដំបូងគេនៅក្នុងប្រទេស ដោយប្រើឧបករណ៍វិភាគទិន្នន័យធុរកិច្ច។
ការដាក់ដំណើរការសេវានេះ ធ្វើឡើងដោយគ្របដណ្តប់ស្ថាប័នហិរញ្ញវត្ថុជាសមាជិកទាំងអស់ ដើម្បីតាមដានកម្រិតហានិភ័យឥណទាន នៅតាមទីតាំងភូមិសាស្ត្រជាច្រើន។
ផែនទីហានិភ័យឥណទាន គឺជាដំណោះស្រាយចុងក្រោយគេបង្អស់ពី ក្រុមហ៊ុន CBC ដែលបង្កើតឡើងក្នុងទម្រង់ជា ផែនទីអន្តរកម្ម និងរស់រវើក ដែលអាចឱ្យបណ្តាអគ្គនាយក និងគណៈគ្រប់គ្រងរបស់ស្ថាប័ន ផ្តល់កម្ចី កំណត់សម្គាល់លើហានិភ័យ ឥណទានរបស់ស្ថាប័នខ្លួន ពីទីតាំងមួយទៅទីតាំងមួយទៀតបានយ៉ាងងាយស្រួល។
នាយកប្រធានប្រតិបត្តិនៃក្រុមហ៊ុន CBC លោក អឿ សុធារ័ត្ន បានឱ្យដឹងកាលពីចុងសប្តាហ៍មុនថា ក្នុងរយៈពេលប៉ុន្មានឆ្នាំមុននេះ យើងបានសង្កេតឃើញថា វិស័យហិរញ្ញវត្ថុនៅកម្ពុជា បានបត់បែនទៅតាមបរិបទនៃប្រព័ន្ធឌីជីថល និងបានធ្វើការផ្លាស់ប្ដូរយ៉ាងគំហុក លើផ្នែកវិភាគទិន្នន័យ។
លោកថ្លែងថា “ជាមួយនឹងការរីកចម្រើនជាលំដាប់ នៃទីផ្សារឥណទាន សព្វថ្ងៃនេះយើង មានសមាជិកសរុប១៨០ស្ថាប័ន ដែលជាគ្រឹះស្ថានធនាគារ មីក្រូហិរញ្ញវត្ថុ ឥណទានជនបទ និងក្រុមហ៊ុន ភតិសន្យាហិរញ្ញវត្ថុ”។
លោកបន្តថា ម្យ៉ាងវិញទៀត សមាជិករបស់យើងកំពុងតែពង្រីកប្រតិបត្តិការលើសេវា និងផលិតផលរបស់ខ្លួន ទៅកាន់តំបន់ទីផ្សារថ្មីៗ ដែលជាហេតុធ្វើឱ្យពួកគេ មានតម្រូវការលើការវិភាគហានិភ័យលើកម្ចី នៅតាមតំបន់ទាំងនោះ។ ដូច្នេះហើយទើបឧបករណ៍វិភាគនេះ គឺបង្កើតឡើង ដើម្បីបំពេញតម្រូវការរបស់សមាជិកយើង។
យោងតាមរបាយការណ៍ចុងក្រោយ របស់ធនាគារជាតិនៃកម្ពុជា (NBC)បានបង្ហាញថា ប្រាក់កម្ចីតាមធនាគារ និងគ្រឹះស្ថានមីក្រូហិរញ្ញវត្ថុបានកើនឡើងដល់៥១,៥ពាន់លានដុល្លារអាមេរិក គិតត្រឹមខែមិថុនាឆ្នាំនេះ ពោលគឺកើនឡើង២៣,៤ ភាគរយធៀបនឹងរយៈពេលដូចគ្នា កាលពីឆ្នាំមុន ខណៈដែលប្រាក់បញ្ញើរបស់អតិថិជន បានកើនឡើង១៦ភាគរយដល់៤២ ពាន់លានដុល្លារ។
យោងតាមរបាយការណ៍ដដែលបានបង្ហាញថា ប្រាក់កម្ចីមិនដំណើរការ (NPLs) នៅតាមធនាគារ និងគ្រឹះស្ថានមីក្រូហិរញ្ញវត្ថុ ស្ថិតក្នុងអត្រាអាចគ្រប់គ្រងចំនួន២,៦ ភាគរយ និង២,៣ភាគរយរៀងគ្នា៕