ដោយ៖ ម៉ាណេត
ភ្នំពេញ៖ កម្ពុជាទទួលបានគម្រោងវិនិយោគចំនួន២៨ ដែលមានទុនវិនិយោគ ២១២.៣២ លានដុល្លារ គិតចាប់តាំងពីដើមខែកក្កដា រហូតមកដល់ចុងខែកញ្ញានេះ ហើយគម្រោងវិនិយោគទាំង២៨នេះ នឹងបង្កើតការងាររាប់ពាន់កន្លែងដល់ប្រជាជនស្រុក។
គម្រោងទាំង ២៨ នេះ ត្រូវបានអនុវម័ត ដោយរាជរដ្ឋាភិបាល តាមរយៈគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា។
អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានថ្លែងប្រាប់កាលពីថ្មីៗនេះថា គម្រោងដែលក្រុមប្រឹក្សាអភិវឌ្ឍន៍កម្ពុ ជាបានអនុម័តកន្លងមកនេះ ដែលភាគច្រើនជាគម្រោងថ្មីៗ ដោយមិនមែនបន្សល់ទុកតាំងពីឆ្នាំចាល់នោះទេ។
លោកឧកញ៉ាបន្តថា ”និយាយដោយចំ វាមានថ្មីខ្លះ និងចាស់ខ្លះ តែភាគច្រើន វាជាគម្រោងវិនិយោគថ្មីៗ ព្រោះក្រុមប្រឹក្សាអភិវឌ្ឍន៍កម្ពុជាបានទុកពេល៤៥ថ្ងៃ ទើបចេញអាជ្ញាបណ្ណ។ លោកបន្ថែមថា“នេះមានន័យថា ក្រុមប្រឹក្សាអភិវឌ្ឍន៍កម្ពុជានឹងចេញអាជ្ញាបណ្ណយ៉ាងយូត្រឹមរយៈពេល២ខែ បន្ទាប់ពីទទួលបានសំណើរសុំវិនិយោគ” ។
លោកឧកញ៉ាបន្តថា “អីចឹងខ្ញុំជឿថា អាជ្ញាបណ្ណទាំងអស់ភាគច្រើន ជាគម្រោងវិនិយោគថ្មីៗ ដែលត្រៀមវិនិយោគនៅក្នុងប្រទេសកម្ពុជាយើង ខណៈពេលយើងមាន EBA និង GSP ស្រាប់ ហើយនឹងបន្តិចទៀតខាងមុខ យើងមានកិច្ចព្រមព្រៀងពាណិជ្ជកម្មជាមួយនឹងប្រទេសចិន កូរ៉េ និងបណ្តាប្រទេសដែលទៀត” ។
លោកឧកញ៉ាបន្ថែមថា កត្តាទាំងនេះ វានឹងទាក់ទាញនូវការវិនិយោគ ស្របពេលដែលរាជរដ្ឋាភិបាល កំពុងតែកំណែទម្រង់ស៊ីជម្រៅផ្នែកសេដ្ឋកិច្ចជាតិ និងដាក់ចេញនូវផែនការកាត់បន្ថយថ្លៃដើមជាច្រើនផ្សេងទៀត ដែលកន្លងមកនេះ។
លោកឧកញ៉ាលឹម ហេងបានបញ្ជាក់ទៀតថា “គោលនយោបាយទាំងអស់នេះ គឺជាការទាញនូវវិនិយោគិនបរទេស មិនមែនតែទាក់ទាញវិនិយោគិនចិននោះទេ សូម្បីតែវិនិយោគិនអាមេរិក អឺរ៉ុប កូរ៉េ និងជប៉ុនជាដើម។ បន្ថែមពីនេះ វិនិយោគិនជប៉ុនក៏កំពុងសម្រុកមកវិនិយោគនៅក្នុងប្រទេកម្ពុជាផងដែរ” ។
របាយការណ៍ធនាគារពិភពលោក (World Bank) ដែលគេទំព័រ Cambodiafinancialtimes.com ទទួលបានក្នុងសប្តាហ៍នេះ បានឱ្យដឹងថា សកម្មភាពសេដ្ឋកិច្ចផ្ទៃក្នុងរបស់កម្ពុជាបានចាប់ផ្តើមកម្រើកបណ្តើរៗឆ្ពោះទៅរកប្រក្រតីភាពឡើងវិញហើយក្រោយពីមានការសម្រាលលើវិធានការរក្សាគម្លាតសុវត្ថិភាពសង្គម។
ធនាគារពិភពលោក បានឱ្យដឹងថា តម្រូវការក្នុងស្រុករួមមានការធ្វើដំណើរនិងសកម្មភាពទេសចរណ៍ក្នុងស្រុកផងកំពុងតែងើបឡើងវិញ។ កម្ពុជានិងចិនបានប្រកាសបញ្ចប់ការចរចកិច្ចព្រមព្រៀងពាណិជ្ជកម្មសេរីរវាងប្រទេសទាំងពីរ (CCFTA)រួចហើយៗកិច្ចព្រមព្រៀងនេះទំនងជានឹងចូលជាធរមានក្នុងឆ្នាំ២០២១ ។
ធនាគារពិភពលោក បានឱ្យដឹងទៀតថា នៅក្នុងពាក់កណ្តាលឆ្នាំដំបូងនៃឆ្នាំ២០២០ គម្រោងវិនិយោគផ្ទាល់ពីបរទេសដែលទទួលការអនុម័តរួចមានតម្លៃសរុបកើនប្រហែល ៤០ភាគរយប្រៀបធៀបទៅនឹងរយៈកាលដូចគ្នាក្នុងឆ្នាំ២០១៩ ។
នៅមុនពេលមានវិបត្តិសកលកើតឡើងដោយសារការផ្ទុះរាលដាលជំងឺកូវីដ-១៩ កម្ពុជាមានសេដ្ឋកិច្ចដែលមានកំណើនដល់ទៅ ៧,១ភាគរយក្នុងឆ្នាំ២០១៩ ៕