ដោយ៖ សុផារី
ភ្នំពេញៈ ក្រោយជាប់គាំង ដោយសារវត្តមានជំងឺកូវីដ១៩ កាលពីដើមឆ្នាំ២០២០ ទីផ្សារអាផាតមិនក្នុងរាជធានីភ្នំពេញបានចាប់ផ្តើមបង្ហាញសញ្ញាវិជ្ជមានឡើងវិញខ្លះៗហើយ ដោយតម្រូវការ និងតម្លៃជួលបានកើនឡើងវិញ។
យោងតាមរបាយការណ៍របស់ក្រុមហ៊ុនអចលនទ្រព្យ CBRE Cambodia ដែលចេញផ្សាយកាលពីថ្ងៃទី០៧ ខែកក្កដា ឆ្នាំ២០២២ បានឱ្យដឹងថា នៅក្នុងឆមាសទី១ឆ្នាំ២០២២នេះ មានគម្រោងអាផាតមិនចំនួន៣ បានបញ្ចប់ការសាងសង់ និងដាក់ចូលទីផ្សារ ដែលមានបន្ទប់ស្នាក់នៅសរុប៤៧៩បន្ទប់។
គម្រោងទាំងនោះ រួមមាន Citadines Flatiron Phnom Penh (កម្រិតA) ស្ថិតក្នុងខណ្ឌទួលគោក Jasmine Residents (កម្រិតA) នៅក្នុងខណ្ឌបឹងកេងកងនិង TK Central (កម្រិតB) ស្ថិតក្នុងខណ្ឌទួលគោក។
យោងតាមរបាយការណ៍ដដែលឱ្យដឹងថា គិតត្រឹមដំណាច់ឆមាសទី១ ឆ្នាំ២០២២ ក្នុងរាជធានីភ្នំពេញ មានអាផាតមិនប្រភេទA និងប្រភេទB សរុបប្រមាណ៤ពាន់យូនីត។ ក្នុងនោះ អាផាតមិនជាង៤០០យូនីត ត្រូវបានបញ្ចប់ការសាងសង់ និងបានបើកដំណើរការ ហើយ២១ភាគរយនៃការផ្គត់ផ្គង់សរុប នៃអាផាតមិន ក្នុងក្រុងភ្នំពេញ ត្រូវបានគ្រប់គ្រង ដោយប្រតិបត្តិករអន្តរជាតិ។
សម្រាប់តម្លៃជួល ក្នុងត្រីមាសទី២ ឆ្នាំ២០២២ អាផាតមិនកម្រិត A មានតម្លៃជាមធ្យមពី១០ទៅ៣០ដុល្លារអាមេរិក ក្នុងមួយម៉ែត្រការ៉េក្នុងមួយខែ កើនឡើង២,៤ភាគរយ បើធៀបនឹងរយៈពេលដូចគ្នាកាលពីឆ្នាំ២០២១។ ចំណែកអាផាតមិនកម្រិត B មានតម្លៃជួលចន្លោះពី៧ទៅ២២ដុល្លារ ក្នុងមួយម៉ែត្រការ៉េក្នុងមួយខែ កើនឡើង១,៥ភាគរយ ប្រៀបធៀបនឹងរយៈពេលដូចគ្នា ក្នុងឆ្នាំ២០២១។
អ្នកនាង គឹម គិនកេសា អ្នកគ្រប់គ្រងជាន់ខ្ពស់ក្រុមហ៊ុន CBRE Cambodia បាននិយាយថា ទីផ្សារអាផាតមិនពឹងផ្អែកខ្លាំងលើជនបរទេសជួលស្នាក់នៅ ដូច្នេះនៅពេលចំនួនជនបរទេសធ្វើដំណើរមកកម្ពុជាកើនឡើង ទីផ្សារនេះប្រាកដជាមានដំណើរការល្អឡើងវិញដែរ។
អ្នកនាងបន្តថា ភាពធូរស្រាលនៃការឆ្លងរាលដាលជំងឺកូវីដ ១៩ ការបើកប្រទេសបានឆាប់រហ័ស និងការកែសម្រួលលក្ខខណ្ឌមួយចំនួន ដើម្បីទាក់ទាញអ្នកវិនិយោគ និងភ្ញៀវទេសចរបរទេស បានធ្វើឱ្យចំនួនជនបរទេសធ្វើដំណើរមកកម្ពុជាមានចំនួនកាន់តែច្រើន៕