ដោយ៖ លក្ខិណា
ភ្នំពេញ៖ ក្រុមហ៊ុនម៉ាកយីហោល្បីៗ របស់សហរដ្ឋអាមេរិក ដែលកំពុងមានវត្តមាននៅក្នុងប្រទេសកម្ពុជា បានបង្ហាញពីបំនងនៃការវិនិយោគបន្ថែមទៀត ដើម្បីពង្រីកវិសាលភាពកិត្តិសព្ទរបស់ខ្លួន ។
នៅក្នុងកិច្ចពិភាក្សារវាងរដ្ឋមន្ត្រីនិងប្រតិភូក្រុមប្រឹក្សាធុរកិច្ចសហរដ្ឋអាមេរិក អាស៊ាន កាលពីថ្ងៃទី២៨ កញ្ញា ២០២០កន្លងទៅនេះ តំណាងក្រុមហ៊ុនយីហោរបស់សហរដ្ឋអាមេរិកជាច្រើនដូចជា ក្រុមហ៊ុន ConocoPhillips ក្រុមហ៊ុន Ford Motor ក្រុមហ៊ុន Amazon ក្រុមហ៊ុន Herbalife Nutrition ក្រុមហ៊ុន Pernod Ricard ក្រុមហ៊ុនVisa និងក្រុមហ៊ុន Google បានបង្ហាញពីចំណាប់អារម្មណ៍ក្នុងការបណ្ដាក់ទុនវិនិយោគបន្ថែមទៀត ដើម្បីពង្រីកអាជីវកម្មរបស់ខ្លួននៅក្នុងប្រទេសកម្ពុជា ជាពិសេសជួយគាំទ្រក្នុងការស្ដារសេដ្ឋកិច្ចកម្ពុជាឱ្យងើបឡើងជំងឺកូវីដ១៩ បានបញ្ចប់ ។
នៅក្នុងកិច្ចប្រជុំតាមវីដេអូអនឡាញ លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានមានប្រសាសន៍ស្វាមន៍នូវគ្រប់ក្រុមហ៊ុនរបស់សហរដ្ឋអាមេរិក និងប្រទេសដទៃទៀត ដែលមានបំណងចូលមកវិនិយោគនៅក្នុងប្រទេសកម្ពុជា ដោយកម្ពុជានឹងរង់ចាំស្វាគមន៍ព្រមទាំងសម្រួលដល់ការវិនិយោគទាំងឡាយរបស់ក្រុមហ៊ុនទាំងអស់ ។
លោកបានមានប្រសាសន៍ថា សក្ដានុពលពាណិជ្ជកម្មទ្វេរភាគីកម្ពុជា អាមេរិកបានបន្តកើនឡើងជាលំដាប់ ជាក់ស្ដែងគិតត្រឹមខែកក្កដា ២០២០ ទំហំពាណិជ្ជកម្មសរុបរវាងសហរដ្ឋអាមេរិក និងកម្ពុជា មានជាង២,៦ពាន់លានដុល្លារអាមេរិក កើនឡើងប្រមាន១៧,០៤ភាគរយ ធៀបនឹងរយៈពេល៧ខែដូចគ្នាឆ្នាំ ២០១៩ ។
លោក បានថ្លែងថា “កម្ពុជាបានធ្វើកំណែទម្រង់ទាំងក្នុងក្របខ័ណ្ឌ ស្ថាប័ន និងគតិយុត្តិដែលមានដូចជា ការចូលជាធរមាននៃច្បាប់ស្ដីពីពាណិជ្ជកម្មតាមប្រព័ន្ធអេឡិចត្រូនិកនិងច្បាប់ស្ដីពីការការពារអ្នកប្រើប្រាស់ ការផ្លាស់ប្តូររចនាសម្ព័ន្ធ និងមុខងាររបស់កាំកុងត្រូលទៅជាអគ្គនាយកនៃការការពារអ្នកប្រើប្រាស់ការប្រកួតប្រជែងនិងការបង្ក្រាបការក្លែងបន្លំ ប្រកបដោយភាពជោគជ័យ” ។
លោកបន្តថា កាលពីពេលថ្មីៗនេះដែរ កម្ពុជាក៏បានដាក់ចេញនូវកម្មវិធីថ្មីមួយ សម្រាប់ការចុះបញ្ជីពាណិជ្ជកម្ម ចុះបញ្ជីពន្ធដារ និងការចុះបញ្ជីការងារក្នុងពេលតែមួយ ដើម្បីបង្កើនភាពងាយស្រួលដល់វិនិយោគជាមួយនឹងការចុះបញ្ជីពាណិជ្ជកម្មនិងដាក់ដំណើរការឯកសារពាក់ព័ន្ធនឹងការចុះបញ្ជីរបស់ពួកគេផងដែរ ៕
