ក្រុមហ៊ុនលំដាប់យក្ស China Yangtze Power ទិញយកស្ថានីយវារីអគ្គិសនី២ក្នុងតម្លៃដល់ទៅ១២ពាន់លានដុល្លារអាមេរិក

ដោយ សុខុម

ប៉េកាំងៈ ក្រុមហ៊ុនលំដាប់យក្ស China Yangtze Power Co Ltd ដែលជាក្រុមហ៊ុនថាមពលវារីអគ្គិសនីធំបំផុតក្នុងពិភពលោក គ្រោងទិញយកស្ថានីយវារីអគ្គិសនីធំចំនួន២ក្នុងតម្លៃសរុបរហូតដល់ទៅ១២ពាន់លានដុល្លារអាមេរិក ដោយបង្កើនសមត្ថភាពរបស់ខ្លួនដល់ទៅជាងពាក់កណ្តាល។

តាមរយៈឯកសារមួយផ្ញើទៅកាន់ផ្សារហ៊ុនក្រុងសៀងហៃ (Shanghai Stock Exchange) កាលពីថ្ងៃព្រហស្បតិ៍ ទី៣០ ខែមិថុនា ក្រុមហ៊ុន China Yangtze Powerបង្ហាញថា ក្រុមហ៊ុននេះនឹងទិញយកក្រុមហ៊ុន Three Gorges Jinshajiang Yunchuan Hydropower ដែលជាម្ចាស់ស្ថានីយវារីអគ្គិសនីដ៏ធំ២នៅទន្លេ Yangtze River ពោលគឺស្ថានីយ Wudongde និងស្ថានីយ Baihetan។ នេះបើយោងតាមសារព័ត៌មាន CNA ចុះផ្សាយកាលពីថ្ងៃសុក្រ ទី០១ ខែកក្កដា។

ជាមួយនឹងកិច្ចព្រមព្រៀងនេះ ក្រុមហ៊ុន China Yangtze Power ដែលដំណើរការស្ថានីយថាមពលវារីអគ្គិសនីធំបំផុតរបស់ពិភពលោករួចទៅហើយ ពោលគឺស្ថានីយ Three Gorges Dam នោះនឹងត្រូវទិញយកស្ថានីយវារីអគ្គិសនីធំបំផុតទី២ និងស្ថានីយធំបំផុតទី៤ ក្នុងប្រទេសចិន។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

ក្រុមហ៊ុននេះនិយាយថា ការទិញយកនេះនឹងបង្កើនសមត្ថភាពផលិតអគ្គិសនីសរុបរបស់ខ្លួនពី៤៥,៦លានគីឡូវ៉ាត់ (kW) នាពេលបច្ចុប្បន្នឱ្យឈានដល់៧១,៨លានគីឡូវ៉ាត់នាពេលអនាគត ដោយកើនឡើង៥៧%។

កិច្ចព្រមព្រៀងនេះត្រូវបានប្រកាសតាំងពីខែធ្នូ ចុងឆ្នាំ២០២១ ប៉ុន្តែតម្លៃនៃការទិញលក់នេះទើបតែត្រូវបានទម្លាយឱ្យដឹងកាលពីថ្ងៃព្រហស្បតិ៍ ទី៣០ ខែមិថុនា ប៉ុណ្ណោះ៕

LEAVE A REPLY

Please enter your comment!
Please enter your name here