ដោយៈគង់ សូរិយា
ខេត្តកែបៈ ប្រជាពលរដ្ឋនៅក្នុងភូមិរនេស និងភូមិព្រៃតាកុយ ឃុំពងទឹក ស្រុកដំណាក់ចង្អេីរ ខេត្តកែបដែលកាន់កាប់ក្បាលដី ចំនួន២៦៧១ក្បាលដីបានទទួកវិញ្ញាបនបត្រសម្គាល់ម្ចាស់អចលនវត្ថុ។
លោក សុទ្ធ ពុទ្ធិម៉ានីន ប្រធានមន្ទីរ រៀបចំដែនដី នគរូបនីយកម្ម សំណង់ និងសុរិយោដីខេត្ត បានអោយដឹងក្នុងពេលចុះចែកវិញ្ញាបនបត្រខាងលើកាលពីថ្បងៃទី៦ មេសាថា ការចុះអនុវត្ត លើការចុះបញ្ជីដីធ្លីមានលក្ខណៈជាប្រព័ន្ធនៅខេត្តកែប ត្រូវបានចែកចេញជាពីរក្រុម ដែលមានសមាសភាពចំនួន១១រូប ក្នុងមួយក្រុមដែលក្រុមទីមួយ កំពុងចុះអនុវត្តការងារចុះវាស់វែងដីធ្លី មានលក្ខណៈជាប្រព័ន្ធ ជូនប្រជាពលរដ្ឋនៅក្នុងក្រុងកែប និងក្រុមទីពីរ កំពុងអនុវត្តនៅក្នុង ស្រុកដំណាក់ចង្អើរ។
លោកប្រធានមន្ទីរ បន្ថែមថា មកដល់ពេលនេះមន្ទីរ បានធ្វើការចុះបញ្ជីដីធ្លីមានលក្ខណៈជាប្រព័ន្ធ បានចំនួន ១៥ភូមិ ដោយ៦ភូមិនៅក្នុងក្រុងកែប និង៩ភូមិទៀត នៅក្នុងស្រុកដំណាក់ចង្អើរ ក្នុងនោះបានវាស់ចប់សព្វគ្រប់ បានចំនួន១៤ភូមិហើយ នៅសល់តែភូមិចំការបីមួយទេ ដែលមន្ទីរគ្រោងនឹងរៀបចំពិធីចុះបញ្ជីដីធ្លីមានលក្ខណៈជាប្រព័ន្ធ នាពាក់កណ្ដាលខែមេសានេះ។
លោកបន្តថា សម្រាប់ភូមិរនេស ដែលបានវាស់វែងរួចនេះមានចំនួន ១៣៤៤ក្បាលដី ដែលបែងចែកជាប្រភេទដីកសិកម្ម ចំនួន ៤៥០ក្បាលដី ប្រភេទដីលំនៅឋាន ចំនួន ៨៨៨ក្បាលដី និងដីគ្មានទិន្នន័យ ចំនួន ៥១ក្បាលដី។ ដោយឡែកភូមិព្រៃតាកុយ មានក្បាលដីសរុប ១៣២៦ក្បាលដី ក្នុងនោះដីកសិកម្ម ៥២៦ក្បាលដី ដីលំនៅឋាន៨០០ក្បាលដី និងដីគ្មានទិន្នន័យ ៦៣ក្បាលដី។
មានប្រសាសន៍សំណេះសំណាលជាមួយប្រជាពលរដ្ឋ នៅក្នុងឱកាសនោះ លោកបណ្ឌិត សោម ពិសិដ្ឋ អភិបាល នៃគណៈអភិបាលខេត្តកែប បានលេីកឡេីងថា ក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឱ្យប្រជាពលរដ្ឋ រស់នៅយ៉ាងសុខសាន្ត និងមានជីវភាពរស់នៅកាន់តែប្រសើរឡើង ពីមួយឆ្នាំទៅមួយឆ្នាំ រួមជាមួយគ្នានេះ ការពង្រឹងការអនុវត្តច្បាប់ និងការគោរពសិទ្ធិមនុស្ស ជាពិសេសបញ្ហាវិវាទដីធ្លីត្រូវបានដោះស្រាយជាបន្តបន្ទាប់។
លោកបញ្ជាក់ថា “ពីមុនមកប្រជាជនយើង មិនមានប័ណ្ណកម្មសិទ្ធដីធ្លីឡើយ ធ្វើឱ្យពួកគាត់មិនអាចប្រើប្រាស់ដីឱ្យអស់សក្តានុពល ដើម្បីទាញផលប្រយោជន៍ពីដីធ្លីនោះឡើយ”។
តាមរយៈការអនុវត្តចុះបញ្ជីដីជាលក្ខណៈប្រព័ន្ធ ប្រជាពលរដ្ឋក្នុងខេត្តកែប ចំនួន១៥ភូមិ បានទទួលប័ណ្ណកម្មសិទ្ធរួចរាល់។ ដោយឡែកថ្ងៃនេះមន្ទីររៀបចំ ដែនដី នគរូបនីយកម្ម សំណង់ និងសុរិយោដីខេត្តកែប បានផ្តល់វិញ្ញាបនបត្រសំគាល់ម្ចាស់អចលនវត្ថុ ដែលបានចុះបញ្ជីដីធ្លីជាលក្ខណៈប្រព័ន្ធរួចរាល់ ភូមិរនេស និងភូមិ ព្រៃតាកុយ ឃុំពងទឹក ស្រុកដំណាក់ចង្អើរ ខេត្តកែប បន្តទៀត៕