ដោយៈសុផារី
ភ្នំពេញៈ ឧត្តមក្រុមប្រឹក្សាសេដ្ឋកិច្ចជាតិ (SNEC) និងកម្មវិធីខ្សែច្រវ៉ាក់តំលៃកសិកម្មកម្ពុជា-អូស្ត្រាលី (CAVAC) កំពុងសិក្សាវាយតំលៃខ្សែច្រវ៉ាក់ដំណើការលើគម្រោង សួនកសិ-ឧស្សាហកម្ម ធំមួយនៅកម្ពុជា ដើម្បីបង្កើតទីផ្សារប្រមូលទិញផលិតផលកសិកម្ម ក្នុងស្រុកបន្ថែមទៀតនោះ និងបង្កើនឱកាសវិនិយោគ លើវិស័យកសិឧស្សាហកម្មកម្ពុជាបន្ថែម។
នៅក្នុងជំនួបពិភាក្សា នៅថ្ងៃទី២១ ខែកុម្ភៈ ឆ្នាំ២០២២ ដោយមានការចូលរួមពីឧកញ៉ា លឹម ហេង អនុប្រធានសភាពាណិជ្ជកម្មកម្ពុជា និងលោកឧកញ៉ាងួន ម៉េង តិច អគ្គនាយកសភាពាណិជ្ជកម្មកម្ពុជា លោក Martin Albani អ្នកជំនាញសិក្សាវាយតំលៃខ្សែច្រវ៉ាក់ដំណើការលើគម្រោងសួនកសិ-ឧស្សាហកម្មនៅកម្ពុជា បានលើកឡើងពីគម្រោង សួនកសិ-ឧស្សាហកម្ម ដែលបាននិងកំពុងសិក្សាវាយតំលៃខ្សែច្រវ៉ាក់ដំណើការ ដោយឧត្តមក្រុមប្រឹក្សាសេដ្ឋកិច្ចជាតិ (SNEC) និង កម្មវិធីខ្សែសង្វាក់តំលៃកសិកម្មកម្ពុជា-អូស្ត្រាលី (CAVAC) ។
ភាគីវិនិយោគិន បានស្នើសុំឱ្យតំណាងសភាពាណិជ្ជកម្មកម្ពុជា តំណាងវិស័យឯកជន ផ្តល់នូវអនុសាសន៍ ធាតុចូល យោបល់សំខាន់ៗ ចំពោះការសិក្សាវាយតំលៃខ្សែច្រវ៉ាក់ ដំណើការលើគម្រោងសួនកសិ-ឧស្សាហកម្ម នៅកម្ពុជា។ ទោះយ៉ាងណាក្តី ភាគីវិនិយោគិនមិនបានបង្ហាញ ពីទីតាំងនិងទំហំទឹកប្រាក់នៃការវិនិយោគនៅឡើយទេ។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ថា សួនកសិឧស្សាហកម្ម របស់ឧត្តមក្រុមប្រឹក្សាសេដ្ឋកិច្ចជាតិ(SNEC) និងកម្មវិធីខ្សែច្រវ៉ាក់តម្លៃកសិកម្មកម្ពុជា អូស្ត្រាលី (CAVAC) នឹងបង្កើតទីផ្សារ ប្រមូលទិញផលិតផលកសិកម្ម ក្នុងស្រុកបន្ថែមទៀតនោះ។
លោកបានអំពាវនាវដល់ប្រជាពលរដ្ឋ ដែលកំពុងប្រកបមុខរបរកសិកម្ម ក៏ដូចជា អ្នកមានបំណងចង់វិនិយោគ លើវិស័យកសិឧស្សាហកម្ម ឱ្យចូលរួមគាំទ្រដល់គម្រោង តាមរយៈសភាពាណិជ្ជកម្មកម្ពុជា។
លោកឧកញ៉ាបន្តថា “ដើម្បីបង្កើតទីផ្សារប្រមូលទិញ ផលិតផលកសិកម្មក្នុងស្រុកបន្ថែមទៀតនោះ សូមបងប្អូនដែលកំពុងប្រកបមុខរបរកសិកម្ម ក៏ដូចជា អ្នកមានបំណងចង់វិនិយោគ លើវិស័យកសិឧស្សាហកម្ម សូមចូលរួមគាំទ្រដល់គម្រោងដើម្បីបង្កើត សួនកសិឧស្សាហកម្ម របស់ឧត្តមក្រុមប្រឹក្សាសេដ្ឋកិច្ចជាតិ (SNEC) និងកម្មវិធីខ្សែច្រវ៉ាក់តម្លៃកសិកម្មកម្ពុជា អូស្ត្រាលី (CAVAC) បើបងប្អូនមានចំណាប់អារម្មណ៍ អាចចូលរួមគាំទ្រគម្រោងនេះតាមរយៈសភាពាណិជ្ជកម្មកម្ពុជា”៕
