ដោយ៖ សុផារី
ភ្នំពេញ៖ លោក Vivian Bala krishnan រដ្ឋមន្ត្រីក្រសួងការបរទេសសិង្ហបុរី ថ្ងៃទី១៦ ខែកុម្ភ: ឆ្នាំ២០២២នេះ បានមានប្រសាសន៍ថា កម្ពុជាជាតំបន់សុវត្ថិភាព ក្នុងការបើកការហោះហើរឡើងវិញ ហើយអ្នកវិនិយោគសិង្ហបុរីមានចំណាប់អារម្មណ៍មកវិនិយោគនៅកម្ពុជា ជាពិសេសនៅលើវិស័យពាណិជ្ជកម្ម លើវិស័យឃ្លាំងស្តុកទំនិញត្រជាក់ និងវិស័យដឹកជញ្ជូនផងដែរ។
នៅក្នុងជំនួបជាមួយសម្តេចតេជោនាយករដ្ឋមន្ត្រីកម្ពុជា លោក វីវៀន បានថ្លែងអំណរសាទរជូន ចំពោះសម្ដេចតេជោនាយករដ្ឋមន្ត្រី ដែលបានទទួលមេដាយសន្តិភាព ស៊ុនហាក់ ហើយបានមានប្រសាសន៍ថា នេះជាការទទួលស្គាល់ មិនត្រឹមតែនៅក្នុងប្រទេសកម្ពុជា ឬនៅក្នុងតំបន់ទេ គឺទូទាំងពិភពលោក។
លោក វីវៀន ក៏បានសំដែងនូវអំណរសាទរជូនសម្ដេចតេជោផងដែរ ដែលបានទទួលនូវជោគជ័យយ៉ាងត្រចះត្រចង់នៅ ក្នុងការទប់ស្កាត់ ការរីករាលដាលជំងឺកូវីដ ១៩ ដោយកម្ពុជាបានចាក់វ៉ាក់សាំងជូនប្រជាជន បានច្រើនជាងគេ នៅក្នុងតំបន់ ច្រើនជាងប្រទេសអភិវឌ្ឍន៍មួយចំនួន ហើយអត្រាស្លាប់ក៏មានទាបជាងគេដែរ នេះគឺជាកត្តាដែលអនុញ្ញាតឱ្យកម្ពុជាអាចបើកប្រទេសឡើងវិញបានយ៉ាងឆាប់រហ័ស។
លោកបានបន្តថា អ្នកវិនិយោគសិង្ហបុរី ក៏មានចំណាប់អារម្មណ៍មកវិនិយោគ នៅក្នុងព្រះរាជាណា ចក្រកម្ពុជាដែរ ជាពិសេសនៅលើវិស័យពាណិជ្ជកម្ម លើវិស័យឃ្លាំងស្តុកទំនិញត្រជាក់ ក៏ដូចជាវិស័យដឹកជញ្ជូនផងដែរ ។ ក្នុងន័យនេះលោក វីវៀន បានគោរពជម្រាបជូនសម្ដេចតេជោថា សិង្ហបុរី បន្តគាំទ្រនិង ជំរុញពង្រឹងពង្រីកកិច្ចសហប្រតិបត្តិការ ជាពិសេសទ្វេភាគី រវាងប្រទេសទាំងពីរ និងគាំទ្រកម្ពុជាជាប្រធានអាស៊ាន។
សម្ដេចតេជោ បានថ្លែងអំណរគុណជូនចំពោះ លោក វីវៀន ដែលបានសំដែងនូវការអបអរជូនចំពោះសម្ដេច និងការពាំនាំការផ្តាំផ្ញើសួរសុខទុក្ខអំពីលោកនាយករដ្ឋមន្ត្រី ហើយក៏បានថ្លែងអំណរគុណជូនសិង្ហបុរី ដែលបានគាំទ្រកម្ពុជាជាប្រធានអាស៊ាន ហើយចាត់ទុកកម្ពុជាជាតំបន់សុវត្ថិភាព ក្នុងការបើកការ ហោះហើរឡើងវិញ។
សម្ដេចតេជោ បានលើកទឹកចិត្តឱ្យមានការជំរុញការវិនិយោគ មកកម្ពុជាកាន់តែច្រើន ជំរុញការធ្វើពាណិជ្ជកម្មរវាងប្រទេសទាំងពីរ ឱ្យកាន់តែធំ និងពិនិត្យមើលលើកិច្ចសហប្រតិបត្តិការ លើវិស័យអប់រំ លើវិស័យសុខាភិបាល និងវិស័យដទៃទៀតដែលអាចធ្វើទៅបាន៕
