ដោយៈ លក្ខិណា
ភ្នំពេញៈ ក្នុងការធ្វើអាជីវកម្ម មានបញ្ហាជាច្រើនត្រូវប្រឈម ប្រៀបដូចជាការផ្សងព្រេងមួយចានទឹក មួយចានគោកអ៊ីចឹង។ ដូច្នេះហើយ អ្នកត្រូវតែមានគោលដៅច្បាស់លាស់ រួមជាមួយនឹងការត្រៀមខ្លួនឲ្យបានរួចជាស្រេ ចក្នុងការទប់ទល់នឹងឧបសគ្គទាំងនោះ ជាពិសេសត្រូវមានគម្រោងក្នុងការដោះស្រាយបញ្ហា ចៀសវាងនូវការគេចវេសមិនទទួលខុសត្រូវ និងដោះស្រាយឲ្យបានទាន់សភាពការណ៍។
ចំណុចទាំង៦ខាងក្រោមនេះ គឺជាយោបល់ក្នុងការ គ្រប់គ្រងអាជីវកម្មពេលមានបញ្ហាដែលអ្នកអាចសិក្សា និងដកបទពិសោធន៍បាន
១. ហ៊ានប្រឈមមុខជាមួយនឹងបញ្ហា
ជាការពិតណាស់ អ្នកមិនអាចដឹងមុនទេថា បញ្ហាដែលអ្នកនឹងជួបប្រទះគឺជាបញ្ហាអ្វី ប៉ុន្តែជាជាងការរត់គេច អ្វីដែលគួរធ្វើនោះគឺត្រូវហ៊ានប្រឈមមុខដោះស្រាយ និងប្រាប់ការពិតដល់សាធារណជន ពីរឿងដែលបានកើតឡើង និងមធ្យោបាយដោះស្រាយ ដែលក្នុងនោះអាចរួមបញ្ចូលទាំងផលប៉ះពាល់ ការខូតខាត ឬសំណងជាដើម។
២.ដោះស្រាយជាមួយក្រុមអ្នកសារព័ត៌មាន
ជាទូទៅ នៅពេលដែលក្រុមហ៊ុនជួបបញ្ហា ក្រុមអ្នកសារព័ត៌មានប្រាកដជាទាក់ទងទៅនាយកប្រតិបត្តិ ឬអ្នកនាំពាក្យរបស់ក្រុមហ៊ុន ដើម្បីធ្វើបទសម្ភាសន៍បកស្រាយ ពីបញ្ហាដែលកំពុងកើតមានឡើង។ ដូច្នេះ ដើម្បីដោះស្រាយនូវចម្ងល់ និងឆ្លើយតបទៅកាន់មតិ របស់អ្នកសារព័ត៌មានទាំងអស់ ឲ្យទាន់ពេលវេលា និងមានតម្លាភាព អ្នកគប្បីបង្កើតឲ្យមានក្រុមការងារមួយ ដែលរង់ចាំគ្រប់គ្រងបញ្ហា និងថាបញ្ហានីមួយត្រូវដោះស្រាយជាមួយអ្នកសារព័ត៌មានដូចម្តេច ទើបមិនប៉ះពាល់ដល់ផលប្រយោជន៍រួមរបស់ដល់ក្រុមហ៊ុន។
៣. ផ្តល់សន្និសីទសារព័ត៌មានជាសាធារណៈ
ជាជាងដោះស្រាយដោយបិទព័ត៌មាន ឬលាក់បាំងបញ្ហាពីមហាជន ក្រុមហ៊ុនគិតគូថា តើគួរតែលើកយកបញ្ហាមកដាក់ លើតុអោយមហាជនជ្រាប ដូចជា បញ្ហាការទិញផលិតផលខូចគុណភាព ឬ បែកបាក់ដែលធ្វើឲ្យផ្ដល់ផលប៉ះពាល់ ដល់អ្នកប្រើប្រាស់ទាំងឡាយ ហើយក្រុមហ៊ុនក៏គួរតែមានទំនួលខុសត្រូវ និងផ្តល់នូវសំណងសងថ្លៃខូចខាត ដល់អតិថិជនផងដែរ។
៤. ប្រឹក្សាយោបល់ជាមួយមេធាវី_ឬអ្នកប្រឹក្សាផ្នែកច្បាប់
បើសិនបញ្ហាធំ ឈានដល់ការប្ដឹងផ្ដល់ ក្រុមហ៊ុនគួរតែប្រឹក្សាយោបល់ជាមួយមេធាវី ឬអ្នកប្រឹក្សាផ្លូវច្បាប់ ដើម្បីស្វែងរកវិធីសាស្រ្ដដោះស្រាយ ជាជាងច្រានចោលពាក្យបណ្ដឹង ដែលបានដាក់មកលើក្រុមហ៊ុន ពីព្រោះការធ្វើបែបនេះដើម្បីការពារមុខមាត់ និងស្តារទំនុកចិត្តដល់អតិថិជន នៅពេលក្រោយៗមកទៀត។
៥. ស្តារទំនុកចិត្តរបស់អតិថិជន
បើសិនជាអតិថិជនមានការខឹងសម្បា និងអន់ចិត្តចំពោះសេវាកម្ម ឬផលិតផលរបស់អ្នក ក្នុងនាមជាម្ចាស់ក្រុមហ៊ុន អ្នកគួរតែមានចិត្តអត់ធ្មត់ និងព្យាយាមយល់ពីចិត្ត របស់អតិថិជនរបស់អ្នក។ ដូច្នេះ អ្នកគួរតែផ្តល់ជាសំណង កាដូបន្តិចបន្តួច ឬផ្តល់ជូនការធានារ៉ាប់រង ដើម្បីជាការលួងចិត្ត និងស្តារទំនុកចិត្តរបស់អតិថិជនរបស់អ្នកឡើងវិញ។
៦. ការផ្សព្វផ្សាយពាណិជ្ជកម្មឡើងវិញ
នៅពេលដែលបញ្ហាបានដោះស្រាយ និងស្ងប់ស្ងាត់វិញហើយ ក្រុមហ៊ុនគួរពិចារណា ធ្វើការផ្សព្វផ្សាយឡើងវិញពីផលិតផល ដោយលើកយកចំណុចសំខាន់ៗមួយចំនួន ដូចជា ការផ្តល់សំណងខូចខាត ក្នុងករណីផលិតផលខូតគុណភាពឬបាក់បែក ការផ្តល់នូវការធានារ៉ាប់រងលើផលិតផល ការសូមអភ័យទោស និងបង្ហាញពីកិច្ចខិតខំប្រឹងប្រែង ពង្រឹងសមត្ថភាពគ្រប់គ្រងបញ្ហាមិនឲ្យមានបញ្ហាដដែលកើតឡើង៕
