ដោយៈសុខុម
ប៉េកាំង: ក្រុមហ៊ុនចិន China Mobile ដែលជាប្រតិបត្តិករបណ្តាញទូរស័ព្ទចល័តធំជាងគេបំផុត ក្នុងពិភពលោក មានគម្រោងកៀរគរប្រមូលដើមទុនឱ្យបានរហូត ដល់ទៅ៨,៨ពាន់លានដុល្លារអាមមេរិក នៅពេលក្រុមហ៊ុននេះ ចុះបញ្ជីភាគហ៊ុនរបស់ខ្លួននៅក្រុងសៀងហៃ។
យោងតាមសារព័ត៌មាន BBC ចុះផ្សាយកាលពីថ្ងៃទី២១ ធ្នូ ឱ្យដឹងថា ក្រុមហ៊ុននេះ ត្រូវបានលុបឈ្មោះចេញពីផ្សារភាគហ៊ុនញូវយ៉ក ឬ New York Stock Exchange ដោយសារតែវិធានានា ដែលត្រូវបានដាក់អំឡុងពេលលោក ដូណាល់ ត្រាំ កាន់តំណែងជាប្រធានាធិបតី។
ក្រៅពីក្រុមហ៊ុននេះ ក៏នៅមានក្រុមហ៊ុនចិន ដែលចុះបញ្ជីនៅសហរដ្ឋអាមេរិកជាច្រើនទៀតដែលបានចាកចេញ ឬគ្រោងនឹងចាកចេញពីសង្កាត់ហិរញ្ញវត្ថុដ៏ល្បីល្បាញ Wall Street។
ក្រុមហ៊ុនចិន China Telecom និងក្រុមហ៊ុនចិន China Unicom ដែលជាគូប្រជែងរបស់ China Mobile បានផ្លាស់ចេញមកកាន់ប្រទេសកំណើតរបស់ខ្លួនរួចទៅហើយ។
ក្រុមហ៊ុនទាំង៣ ដែលត្រូវបានលុបឈ្មោះចេញ ពីបញ្ជីផ្សារភាគហ៊ុនក្រុងញូវយ៉ក បន្ទាប់ពីមានសេចក្ដីសម្រេចអំឡុង សម័យកាលលោក ដូណាល់ ត្រាំ កាន់អំណាច ដើម្បីរឹតបន្តឹងការវិនិយោគ នៅក្នុងបណ្ដាក្រុមហ៊ុនប ច្ចេកវិទ្យាចិន។
គោលនយោបាយនេះ នៅតែរក្សាទុកមិនផ្លាស់ប្តូរក្រោមរដ្ឋការរបស់ប្រធានាធិបតី ចូ បៃឌិន ខណៈភាពតានតឹងរវាងរដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងប៉េកាំងនៅតែបន្តកើតមាន៕ BBC៕