ដោយៈគង់ សិរីជេស៊ីកា
ភ្នំពេញៈ ក្រុមហ៊ុនសឹង្ហបុរីធំមួយ HLH Development(HLHD) និងក្រុមហ៊ុនSmart Winner បានព្រមព្រៀងវិនិយោគរួមគ្នាបង្កើត គម្រោងអភិវឌ្ឍចម្រុះថ្មីមួយកន្លែងតម្លៃប្រមាណ៥០លានដុល្លារ នៅក្រុងព្រះសីហនុ។
បើតាមការប្រកាសរបស់ក្រុមហ៊ុននេះបានឲ្យដឹងថា គំរោងនេះនឹងសាងសង់លើផ្ទៃដី១១,៥ហិកតា ក្នុងក្រុងព្រះសីហនុ។
គម្រោងនេះ មានទីតាំងនៅជិតកំពង់ផែស្វយ័ត ក្រុងព្រះសីហនុ នឹងត្រូវអភិវឌ្ឍទៅជាមជ្ឈមណ្ឌលផ្សារទំនើប លក់ដុំស្រដៀងគ្នានឹងផ្សារ Makro ទីផ្សារ seafoods និងកន្លែងចំអិនអាហាសមុទ្រ ស្រដៀងនឹងប្រទេសកូរ៉េដូច្នោះដែរ។
ដោយឡែក ដីដែលនៅសល់ នឹងត្រូវបានបែងចែកទៅជាដីឡូតិ៍តូចៗ សម្រាប់ការអភិវឌ្ឍន៍ចម្រុះ ដោយក្រុមហ៊ុននឹងបើកឱ្យដៃគូសហការផ្សេងទៀតជួល ឬក៏ទិញដាច់ពីក្រុមហ៊ុនក៏បាន។
ក្រោមលក្ខខណ្ឌនៃការបណ្តាក់ទុនរួមគ្នានេះ ក្រុមហ៊ុន Smart Winner ដែលជាម្ចាស់ដី នឹងរួមចំណែក២៥,២លានដុល្លារអាមេរិក ដែលជាតម្លៃដីផ្ទាល់ឬស្មើនឹង៥០,៤% នៃភាគហ៊ុន។ ទន្ទឹមនឹងនេះ HLHD នឹងវិនិយោគ១០លានដុល្លារអាមេរិក ឬស្មើនឹង ៤៩,៦% នៃភាគហ៊ុន ហើយក៏នឹងបន្ថែម៥លានដុល្លារអាមេរិកទៀត ជាប្រាក់ដើមប្រតិបត្តិការផងដែរ ។
ប្រធានទំនាក់ទំនងសាធារណៈ នៃក្រុមហ៊ុន HLH Cambodia លោក គួច លេងឃាងបានមានប្រសាសន៍ឲ្យដឹងថា ទឹកប្រាក់បន្ថែមនៃគម្រោងនេះ ដែលមានទំហំចន្លោះ ៨ ទៅ១០លានដុល្លារទៀត នឹងត្រូវប្រើប្រាស់សម្រាប់ការសាងសង់។
លោកបានបន្ថែមថា “គម្រោងនេះ គ្រោងនឹងបើកការដ្ឋាននៅត្រីមាសទី២ នៃឆ្នាំ ២០២២ ខណៈកាលបរិច្ឆេទបញ្ចប់គម្រោង ត្រូវបានគ្រោងទុកនៅចុងឆ្នាំ២០២៣”។
គម្រោងនេះជាគម្រោងអភិវឌ្ឍន៍ចម្រុះទី ៤ ហើយរបស់ HLH ក្នុងប្រទេសកម្ពុជា ឬជាគម្រោងទី ២ នៅខេត្តព្រះសីហនុ បន្ទាប់ពីគម្រោង D’Seaview៕