ដោយ តារា
ភ្នំពេញ៖ អាជ្ញាធរខេត្តកែបបានទទួលគំរោងអភិវឌ្ឍន៍ហេដ្ឋារចនាសម្ព័ន្ឋសំខាន់ៗចំនួន៤ នៃផែនការអភិវឌ្ឈន៍របស់មហាអនុតំបន់ទន្លេមេគង្គ ដែលស្ថិតក្នុងគំរោងដំណាក់កាលទី១ និងទី២។
តាមរយះគម្រោងនេះ ខេត្តកែបទទួលបានគម្រោងជារូបវ័ន្តសំខាន់ៗចំនួន៤ រួមមាន ទី១- គម្រោងសាងសង់អាងប្រព្រឹត្តកម្មទឹកកខ្វក់នៅផ្សារក្តាម ទី២-គម្រោងសាងសង់ទីលានកប់សម្រាម, ទី៣-គម្រោងសាងសង់កំពង់ផែទេសចរណ៍ នៅលើកោះទន្សាយ និងទី៤-គម្រោងកសាងផ្លូវបេតុងប្របមាត់សមុទ្រ។
ព៌តមានដ៏សំខាន់នេះ ត្រូវបានបង្ហាញក្នុងកិច្ចប្រជុំកាលពីថ្ងៃទី២៣ ខែកញ្ញា ឆ្នាំ២០២១ នេះ ដែលកិច្ចប្រជុំនេះ មានការចូលលោកស្រី អ៊ុល ភីរុណ និងលោក វ៉ៅ សុខា អភិបាលរងខេត្ត ក្រោមអធិបតីភាពរបស់លោក បណ្ឌិត ថោង ខុន រដ្ឋមន្ត្រីក្រសួងទេសចរណ៍ តាមរយះប្រព័ន្ធបច្ចេកវិទ្យា Zoom Meeting។
ខេត្តកែបត្រូវបានរដ្ឋាភិបាល រៀបចំផែនការអភិវឌ្ឈន៍ទេសចរណ៍ រយៈពេលវែង២០២០ ២០៣៥រួចហើយ ដោយរដ្ឋាភិបាលបានដាក់ចេញនូវគោលដៅជាច្រើន ហើយក្នុងចំណោមគោលដៅទាំងនោះ មានគោលដៅសំខាន់មួយ ដែលរដ្ឋាភិបាលគ្រោងប្រែក្លាយ ខេត្តកែបជាតំបន់ទេសចរណ៍លំហែរកាយកម្រិតខ្ពស់៕
