ដោយៈគង់ ម៉ាលីនណា
ភ្នំពេញៈ ប្រជាពលរដ្ឋក្នុងស្រុកដំណាក់ចង្អើរ ខេត្តកែបបានទទួលចំណងដៃថ្មី តាមរយៈរដ្ឋបាលខេត្ត នោះគឺផ្លូវចាក់កៅស៊ូ DBST ប្រវែង ២,០៥៥ម៉ែត្រ ទទឹង១៨ម៉ែត្រ ស្ថិតនៅភូមិអង្កោល។
លោកសោម ពិសិដ្ឋ អភិបាល នៃគណៈអភិបាលខេត្តកែប បានអញ្ជើញជាអធិបតីក្នុងពិធីសម្ពោធដាក់ឲ្យប្រើប្រាស់ជាផ្លូវការផ្លូវមួយនេះ។
លោកសោម ពិសិដ្ឋបានមានប្រសាសន៍ថា ប្រជាពលរដ្ឋនៅមូលដដ្ឋាន ទទួលបានសមិទ្ធផលបន្តបន្ទាប់ពីរាជរដ្ឋាភិបាល សំដៅប្រែក្លាយពីទីជនបទ ផ្សារភ្ជាប់ទៅកាន់ទីប្រជុំជននានា និងជំរុញកំណើនសេដ្ឋកិច្ច បង្ករលក្ខណៈងាយស្រួលដល់ការធ្វើដំណើរ និងការដឹកជញ្ជូនកសិផលគ្រប់ប្រភេទ។
លោកបន្តទៀតថា “ផ្លូវមួយខ្សែនេះជាផ្លូវយុទ្ធសាស្ត្រ ក្នុងការតភ្ជាប់ប្រទាក់ក្រឡាគ្នារវាងក្រុងកែប និងផ្លូវលេខ១៣៣២ ដែលជាផ្លូវស្របមាត់សមុទ្រ នេះគឺជាចក្ខុវិស័យមួយរបស់ខេត្តកែប ដែលកើតចេញពីការខិតខំប្រឹងប្រែងរបស់រដ្ឋបាលខេត្ត ក៏ដូចជាស្ថាប័នពាក់ព័ន្ធ ធ្វើអោយសម្រេចបាននៅសមិទ្ធផលមួយនេះឡើង”។
លោកបន្តថា ដោយមានការយកចិត្តទុក្ខដាក់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន លោកតែងតែគិតគូរពីសុខទុក្ខ របស់បងប្អូនប្រជាពលរដ្ឋរបស់យើងជានិច្ច បើទោះបីក្នុងកាលៈទេសៈលោកទាំងពីរ កំពុងតែមមាញឹកក្នុងការទប់ស្កាត់ការរីករាលដាលនៃជំងឺកូវីដ-១៩ ក៏ដោយ ក៏លោកទាំងពីរតែងតែជំរុញការកសាងសមិទ្ធផលថ្មីៗ ក្នុងមូលដ្ឋានដើម្បីបំរើផលប្រយោជន៍ជូនប្រជាពលរដ្ឋ។
ជាមួយគ្នានេះ លោកសោម ពិសិដ្ឋ ក៏បានអំពាវនាវដល់បងប្អូនប្រជាពលរដ្ឋទាំងអស់ កុំអោយចូលរួមជាមួយអំពើល្មើសច្បាប់នានា ដូចជា ការកាប់បំផ្លាញព្រៃលិចទឹក ការលេងល្បែងស៊ីសង ការប្រើប្រាស់គ្រឿងញៀនជាដើម ។ល។ ជាពិសេសទៅទៀតនោះ ត្រូវការពារខ្លួន ដើម្បីជៀសផុតពីការឆ្លងនៃជំងឺកូវីដ-១៩ ដោយត្រូវអនុវត្តឲ្យបានខ្ជាប់ខ្ជួននូវវិធានការ ៣ការពារ ៣កុំ និងវិធានការនានា របស់ក្រសួងសុខាភិបាល៕
