ដោយៈ ម៉ាណេត
ភ្នំពេញៈ ទោះជារងផលប៉ះពាល់ពីវិបត្តិសេដ្ឋកិច្ចសាកល ប៉ុន្តែវិស័យសំណង់នៅកម្ពុជានៅតែស្រូបទាញការនាំចូលសម្ភារៈសំណង់ជាច្រើនពីបរទេស ដោយទំហំទឹកប្រាក់មានចំនួនរហូតដល់ជាង៥៦៥លានដុល្លារ ក្នុងរយៈពេល៦ខែឆ្នាំនេះ។
យោងតាមរបាយការណ៍៍របស់អគ្គនាយកដ្ឋានគយ និងរដ្ឋាករបានបង្ហាញដែលគេហទំព័រ Cambodiafinancialtimes.com ទទួលបាន កាលពីថ្ងៃទី១៣ សីហាកន្លងមកបានឲ្យដឹងថា កម្ពុជាបាននាំចូលសម្ភារៈសំណង់ (Construction Equipment) ដែក និងស៊ីម៉ងត៍ នៅក្នុងតម្លៃសរុប៥៦៥,៩១លានដុល្លារក្នុងឆមាសទី១ ឆ្នាំ២០២០ ខណៈការនាំចូលផលិតផលទាំងអស់នេះ ក្នុងរយៈពេលពេញ១ឆ្នាំ២០១៩ មានទឹកប្រាក់១៥០៦,៥៥លានដុល្លារ។ នេះបើយោងតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា។
ទិន្នន័យដដែលបានឱ្យដឹងផងដែរថា ក្នុងចំណោមទឹកប្រាក់ខាងលើនេះ កម្ពុជាបាននាំចូលសម្ភារៈសាងសង់ មានទំហំទឹកប្រាក់ជាង៣៨១លានដុល្លារ ស្មើនឹង៦៧២, ៧៨៥តោន។ ដែកតម្លៃ ១៤០,៨លានដុល្លារក្នុងបរិមា ណ២១៧,១៥១តោន និងស៊ីម៉ងត៍តម្លៃ៤៣,២៧លានដុល្លារ ស្មើនឹង៦៨១,៨១៧ តោនចាប់ពីខែមករា ដល់ខែមិថុនា ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម ធ្លាប់បានគេទំព័រ Propertyarea.asia ថា នៅក្នុងឆ្នាំ២០២០នេះ សកម្មភាពវិនិយោគក្នុងវិស័យសំណង់ ភាគច្រើនជាសកម្មភាពរបស់អ្នកក្នុងស្រុក ដោយឡែកសម្រាប់លំហូរទុនចូលពីក្រៅស្រុកគឺមានតិចតួចបំផុត។
លោកបានបន្តថា “វិបត្តិសេដ្ឋកិច្ច ដែលកំពុងកើតមាននៅពេលនេះ បានជះឥទ្ធិពលគ្រប់ប្រទេស ដែលបណ្តាលឱ្យប៉ះពាល់ដល់គម្រោងវិនិយោគទាំងអស់។លោក បានបន្តថា “ប៉ុន្តែក្រោយពេលវិបត្តិនេះត្រូវបានទប់ស្កាត់ គម្រោងវិនិយោគនានានឹងចាប់ផ្តើមរៀបចំឡើងវិញ ហើយតាមខ្ញុំគិត ប្រសិនបើវិបត្តិជំងឺដែលកំពុងរាលដាលនេះ ត្រូវបានបញ្ចប់នៅត្រឹមចុងឆ្នាំនេះ នោះសកម្មភាពវិនិយោគ នៅក្នុងវិស័យសំណង់អាចនឹងចាប់ផ្តើមនៅពាក់កណ្តាលឆ្នាំបន្ទាប់” ៕
