ដោយ វុត្ថា
ភ្នំពេញៈ ក្រុមអ្នកជំនាញអចលនទ្រព្យបានអះអាងថា វិស័យអចលនទ្រព្យនៅក្នុងខណ្ឌសែនសុខ និងនៅតាមបណ្តាទីកន្លែងផ្សេងៗទៀតរបស់ទីក្រុងភ្នំពេញ នៅតែមានសក្តានុពលខ្ពស់ និងសេចក្តីត្រូវការរបស់ប្រជាពលរដ្ឋខ្មែរ និងជនបរទេស។
ប្រធានសមាគមអ្នកវាយតម្លៃ និងភា្នក់ងារអចលវត្ថុកម្ពុជាលោកច្រឹក សុខនីមបានប្រាប់គេហទំព័រ Propertyarea.asia នៅថ្ងៃទី១២ ខែសីហា ឆ្នាំ ២០២០នេះ ឱ្យដឹងថា កំណើនវិស័យអចលនទ្រព្យ នៅតែមានសារៈសំខាន់ ដើម្បីឆ្លើយតបទៅនឹងការផ្គត់ផ្គង់សម្រាប់កំណើននូវប្រជាពលរដ្ឋនខ្មែរ និងបណ្តាជនជាតិបរទេស។
លោកបន្ថែមទៀតថា “មនុស្សជាច្រើន នៅតែមិនអាចមើលរំលងបាននោះ គឺតំបនខាងជើង ឈាងខាងលិចរបស់រាជធានីភ្នំពេញជាពិសេស ម្តុំខណ្ឌសែនសុខបាននិងកំពុងធ្វើការអភិវឌ្ឍន៍លំនៅឋាន និងអគារខ្ពស់ៗជាច្រើន” ។ លោកបញ្ជាក់ថា “ការណ៍នេះបានធ្វើឱ្យតម្លៃ និងកំណើនសេដ្ឋកិច្ច ក្នុងវិស័យអចលនទ្រព្យរបស់ទីក្រុងភ្នំពេញ ទទួលបាននូវការគាំទ្រយ៉ាងខ្លាំង និងបាននឹងកំពុងរីកលូតលាស់” ។
លោកបញ្ជាប់បន្ថែមទៀថា កំណើនទាំងអស់នេះ បាននិងកំពុងរុញច្រានដល់ការផ្គត់ផ្គត់លំនៅឋាន នៅក្នុងទីក្រុងភ្នំពេញ ហើយកំណើននេះនៅតែបន្តរីកចំរើនបន្ថែមទៀត និងដើរតួនាទីយ៉ាងសំខាន់ ក្នុងការបំរើដល់ការផ្គត់ផ្គង់ និងសេដ្ឋកិច្ចនៅក្នុងប្រទេសកម្ពុជាប្រកបដោយចីរភាព។
នាយិកាប្រចាំប្រទេសក្រុមហ៊ុន CBRE Cambodia លោកស្រី អាន សុធីតាឱ្យដឹងដែរថា តំបន់សែនសុខ បាននិងកំពុងអភិវឌ្ឍន៍យ៉ាងខ្លាំង លើផ្នែកហេដ្ឋារចនាសម្ព័ន្ធពីសំណាក់រាជរដ្ឋាភិបាល និងវិស័យឯកជន ដែលក្នុងនោះវិស័យអចលនទ្រព្យ និងសំណង់បានបង្ហាញពីភាពលេចធ្លោជាងគេផងដែរ។
លោកស្រីបានបញ្ជាក់ថា “ខណ្ឌសែនសុខ បានក្លាយទៅជាតំបន់ដែលមានប្រជាប្រិយភាពខ្ពស់ ក្នុងវិស័យសំណង់លំនៅដ្ឋានកម្រិតមធ្យម និងកំពុងឈានទៅរកកម្រិតខ្ពស់ជាបណ្ដើរៗ ហើយក៏បានត្រៀមខ្លួនរួចរាល់ជាស្រេច ក្នុងទទួលយកវត្តមានថ្មីនៃវិស័យខុនដូ ដែលកំពុងមានតម្រូវការនាពេលបច្ចុប្បន្ននេះផងដែរ” ។
បច្ចុប្បន្នខណ្ឌសែនសុខ បានក្លាយជាតំបន់ដែលមានសក្ដានុពខ្ពស់ សម្រាប់បម្រើដល់វិស័យពាណិជ្ជកម្ម ជាក់ស្ដែងបច្ចុប្បន្នក្រៅពីជាតំបន់ ដែលប្រមូលផ្តុំទៅលំនៅដ្ឋានកម្រិតមធ្យម និងកម្រិតខ្ពស់ ក៏មានមជ្ឈមណ្ឌលពាណិជ្ជកម្មធំៗ ដូចជាផ្សារទំនើប AEON2 ផ្សារ Makro ផ្សារ Global House ផ្សារទំនើបជីបម៉ុង មណ្ឌលវិមានសែនសុខ រួមជាមួយនឹងអាគារពាណិជ្ជកម្មអន្តរជាតិមួយចំនួនទៀត ដែលជំរុញឱ្យវិស័យអចលនទ្រព្យ នៅក្នុងតំបន់នេះ កាន់តែមានសក្តានុពលខ្ពស់៕