ដោយៈលក្ខិណា
ភ្នំពេញៈ ក្នុងឆ្នាំ២០២១នេះ ការនាំចេញអង្កររបស់កម្ពុជា ទៅកាន់ទីផ្សារអន្តរជាតិបានធ្លាក់ចុះតាំងពីដើមឆ្នាំ ជាពិសេសគឺចាប់តាំងពីព្រឹត្តិការណ៍ សហគមន៍២០កុម្ភៈឆ្នាំ២០២១ ប៉ុន្តែការនាំចេញអង្ករកាលពីខែសីហាកន្លងទៅនេះ បានកើនឡើងបន្តិចវិញបើធៀបនឹងខែកក្កដា និងខែសីហា២០២០។
៉
យោងតាមរបាយការណ៍របស់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា នៅក្នុងខែសីហា២០២១នេះ ការនាំចេញអង្កររបស់កម្ពុជា ទៅកាន់ទីផ្សារអន្តរជាតិសម្រេចបាន៣៣.៥៨២តោន កើនឡើងប្រមាណ៥១,៧៥ភាគរយ ធៀបនឹងខែសីហា២០២០កន្លងទៅហើយ បើធៀបនឹងខែកក្កដា២០២១ កើនឡើងប្រមាណជាង៤ពាន់តោន។
លោកវេង សាខុនរដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ការនាំចេញអង្កររបស់កម្ពុជា ទៅកាន់ទីផ្សារអន្តរជាតិ ក្នុងរយៈពេល៨ខែដើមឆ្នាំ ២០២១នេះ មានបរិមានសរុបចំនួន៣៤៣.៤៤៧តោន ហើយបើធៀបនឹងរយៈពេលដូចគ្នា កាលពីឆ្នាំ២០២០កន្លង ទៅមានការថយចុះប្រមាណជាង១០,៤ម៉ឺនតោន ឬប្រមាន២៣,៣៧ភាគរយ។
បរិមាណអង្កររបស់កម្ពុចាបាននាំចេញ ទៅកាន់ទិសដៅសហភាពអឺរ៉ុបចំនួន២២ប្រទេសមានបរិមាណ៨៨.២៧១តោន ប្រទេសចិនមានបរិមាណសរុប១៦៥.៦១២តោន កើនឡើងប្រមាណ៣,៩៩ភាគរយ ដែលជាទីផ្សារធំជាងគេ ទិសដៅអាស៊ានមាន៧ប្រទេសមានបរិមាណសរុប ចំនួន៣៥.៥៥៣តោន ថយចុះរហូតដល់៤១,៦៥ភាគរយ និងទិសដៅដទៃទៀតចំនួន២២ ប្រទេសមានបរិមាណសរុប៥៤.០១១តោន។
ក្នុងរបាយការណ៍របស់លោកវេង សាខុនឱ្យដឹងទៀតថា ក្រុមហ៊ុនដែលនាំចេញអង្ករមានចំនួន៥៩ ក្រុមហ៊ុនហើយបរិមាណអង្ករ ដែលនាំចេញដោយក្រុមហ៊ុនធំៗចំនួនមានរហូតដល់២៤៧.៩០៣តោន និងក្រុមហ៊ុនដទៃទៀតមានត្រឹមតែ៩៥.៥៤៤តោន ។
ការនាំចេញអង្កររយៈពេល៨ខែដើម ឆ្នាំ២០២១នេះ មានទំហំទឹកប្រាក់ត្រលប់មកវិញ ប្រមាណ២៩១,៩២លានដុល្លារអាមេរិក ខណៈការនាំចេញស្រូវវិញមានទឹកប្រាក់ប្រមាណ៣៩៣,២១លានដុល្លារអាមេរិក។
លោកវេង សាខុនបញ្ជាក់ថា “ការនាំចេញអង្ករមានការថយចុះបែបនេះ ដោយសារតែកង្វះទូរកុងតឺន័រសម្រាប់ផ្ទុក និងតម្លៃដឹកជញ្ជូនកើនឡើងក្នុងឆ្នាំ២០២១នេះ”៕
