ដោយៈគង់ ម៉ាលីនណា
កែបៈ ឥណ្ឌាកំពុងសម្លឹងឃើញសក្តានុពលខេត្តកែប ដើម្បីទាក់ទាញ និងបង្កើនសក្តានុពលលើវិស័យទេសចរណ៍ និងកសិកម្មជាមួយរដ្ឋបាលខេត្តកែប ដែលជាតំបន់ ទេសចរណ៍ឆ្នេរសមុទ្រ។
ក្នុងកិច្ចប្រជុំទ្វេភាគីរវាងលោក សោម ពិសិដ្ឋ អភិបាលខេត្តកែប និងលោកស្រី Devyani Khobragade ឯកអគ្គរដ្ឋទូតឥណ្ឌាប្រចាំកម្ពុជា កាលពីសប្តាហ៍មុននៅសាលាខេត្តកែប លោកស្រី Khobragade លើកឡើងថា នេះគឺជាជំនួបដើម្បីបង្កើនចំណងមិត្តភាពជាមួយខេត្តជាប់មាត់សមុទ្រ។ លោកស្រីបន្តថា អភិបាលខេត្តកែបបានឯកភាពធ្វើការរួមគ្នា ដើម្បីបង្កើន និងពង្រីកកិច្ចសហប្រតិបត្តិការ ក្នុងវិស័យទេសចរណ៍ កសិកម្ម និងការកសាងសមត្ថភាព និងបង្កើនឱកាសសេដ្ឋកិច្ចអតិបរមា។
លោកស្រីបន្ថែមថា “ភាគីទាំង២ ក៏បានពិភាក្សាគ្នា ដើម្បីបង្កើតចំណងមិត្តភាពខេត្តជាបងប្អូនស្រីផងដែរ”។
ជាមួយគ្នានេះ លោក សោម ពិសិដ្ឋ បានលើកឡើងដែរថា ឥណ្ឌាបានមកស្វែងយល់ពីសក្តានុពលរបស់ខេត្ត និងសិក្សាអំពីគម្រោងអភិវឌ្ឍន៍របស់ខេត្ត ទៅលើវិស័យទេសចរណ៍ កសិកម្ម និងអប់រំ ជាដើម។
ទន្ទឹមនឹងនេះ លោកអភិបាលខេត្តក៏បានលើកឡើង ពីសក្តានុពលសំខាន់ៗ និងបង្ហាញចក្ខុវិស័យដែលខេត្ត បានដាក់ចេញសម្រាប់ធ្វើការអភិវឌ្ឍក្នុងខេត្ត នាពេលខាងមុខ។
លោកថា “ភាគីឥណ្ឌាសន្យាថា នឹងទទួលយកគម្រោងណាមួយ ប្រសិនបើខេត្តស្នើសុំឱ្យមានការគាំទ្រពីឥណ្ឌា”។លោកបន្តថា “ខ្ញុំសង្ឃឹមថាលោកស្រីឯកអគ្គរដ្ឋទូតឥណ្ឌាប្រចាំកម្ពុជា នឹងពិនិត្យរាល់គម្រោងដែលខេត្តបានដាក់ចេញ ដើម្បីពិនិត្យ និងជួយគាំទ្រ ពិសេសគម្រោងអភិវឌ្ឍន៍លើវិស័យទាំង៣ខាងលើ”៕
