ដោយៈគង់ ម៉ាលីន
ភ្នំពេញៈ ធនាគារសហគ្រាសធុនតូច និងមធ្យមកម្ពុជា (SME bank) បានប្រកាសដាក់ឱ្យដំណើរការជាផ្លូវការ “គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យម ជំហានទី២”។
គំរោងនេះ ធ្វើឡើងក្នុងគោលបំណងជួយជំរុញសកម្មភាព អាជីវកម្មរបស់ SMEs ក្នុងស្រុកឱ្យបន្តដំណើរការរបស់ខ្លួន ក្នុងអំឡុងពេលដ៏លំបាកនៃការរីករាលដាលជំងឺកូវីដ ១៩ ក្នុងសហគមន៍។
យោងតាមសេចក្តីប្រកាសព័ត៌មាន ដែលបានចេញផ្សាយកាលពីថ្ងៃទី១៦ ខែសីហាបានឱ្យដឹងថា ធនាគារសហគ្រាសធុនតូច និងមធ្យមកម្ពុជាបានដាក់ឱ្យដំណើរការ”គម្រោងសហហិរញ្ញប្បទាន ទ្រទ្រង់សហគ្រាសធុនតូច និង មធ្យម ជំហានទី២” បន្ទាប់ពីទទួលបានលទ្ធផលវិជ្ជមានក្នុងគម្រោងទី១ រួចមក។
សេចក្តីប្រកាសព័ត៌មានដដែលបានឱ្យដឹងថា ក្នុងនាមរដ្ឋាភិបាលកម្ពុជា ក្រសួងសេដ្ឋកិច្ច និងហិរញ្ញវត្ថុសូមជូនដំណឹង ទៅដល់ម្ចាស់សហគ្រាសធុនតូច និងមធ្យម ជ្រាបថា ក្រោមគំនិតផ្តួចផ្តើមរបស់រាជរដ្ឋាភិបាល និងតាមរយៈកិច្ចសហប្រតិបត្តិការជាមួយគ្រឹះស្ថានហិរញ្ញវត្ថុ ចូលរួមក្នុងការអនុវត្តគម្រោងសហហិរញ្ញប្បទាន ទ្រទ្រង់សហគ្រាសធុនតូច និងមធ្យមជំហានទី២ បន្ទាប់ពីទទួលបានភាពជោគជ័យនៃគម្រោងទី១ ដើម្បីចូលរួមស្តារសេដ្ឋកិច្ចឡើងវិញ និងជួយដល់SMEs ដែលកំពុងត្រូវការហិរញ្ញវត្ថុសម្រាប់ទ្រទ្រង់អាជីវកម្មបន្ត។ គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យមជំហានទី២ ត្រូវបានបង្កើតឡើង និងដាក់ឱ្យដំណើរការជាផ្លូវការចាប់ពីពេលនេះតទៅ។
គម្រោងសហហិរញ្ញប្បទាននេះ មានគោលបំណងផ្តល់ឥណទានមានការប្រាក់ទាបដើម្បីជំរុញការអភិវឌ្ឍសហគ្រាសធុនតូច និងមធ្យមក្នុងវិស័យអាទិភាព ដូចជា ឧស្សាហកម្ម សេវាកម្ម និងពាណិជ្ជកម្មសម្រាប់ជំនួសឱ្យការនាំចូល បម្រើសេចក្តីត្រូវការក្នុងស្រុក ឬបម្រើធាតុចូលក្នុងការផលិតរបស់ក្រុមហ៊ុនធំៗជាដើម៕
