ដោយៈប៊ី
ភ្នំពេញៈ ក្រុមហ៊ុនផេសថិក (ខេមបូឌា) ឬ Pestech ដែលមាននិមិត្តសញ្ញាភាគហ៊ុន PEPC នឹងធ្វើការចុះបញ្ជី និងចាប់ផ្តើមជួញដូរនៅលើផ្សារមូលបត្រកម្ពុជា (ផ.ម.ក.) ចាប់ពីថ្ងៃទី១២ សីហា ឆ្នាំ២០២០ នេះតទៅ។
ក្រុមហ៊ុន Pestech Cambodia ដែលជាក្រុមហ៊ុនបុត្រសម្ព័ន្ធ១០០ភាគរយរបស់ក្រុមហ៊ុន Pestech International Bhd ដែលមានមូលដ្ឋាននៅប្រទេសម៉ាឡេស៊ី សង្ឃឹមថានឹងអាចប្រមូលប្រាក់ បានប្រមាណ៣លានដុល្លារពីការចុះបញ្ជីនេះ។
ប្រធានក្រុមហ៊ុន លោក Lim Paul បានមានប្រសាសន៍ថា ការចុះបញ្ជីនៅផ្សារមូលបត្រកម្ពុជា នឹងផ្តល់ឱកាសដល់សាធារណជនកម្ពុជា ក្នុងការវិនិយោគក្នុងឧស្សាហកម្មថាមពល ស្របពេលមានកំណើនតម្រូវការអគ្គិសនីនៅក្នុងតំបន់មេគង្គ។
លោកបន្តថា “វាជាវេទិកាមួយដើម្បីទាក់ទាញវិនិយោគិន និងដៃគូរយៈពេលវែងជាយុទ្ធសាស្ត្រ ដើម្បីបង្កើនផលប័ត្រផលិតផលរបស់ក្រុមហ៊ុន” ។
IPO របស់ក្រុមហ៊ុន Pestech ដែលជាក្រុមហ៊ុនបុត្រសម្ព័ន្ធ ១០០ភាគរយរបស់ក្រុមហ៊ុន Pestech International Bhd ដែលមានមូលដ្ឋាននៅប្រទេសម៉ាឡេស៊ី នឹងមានចំនួន ៣,៩លានហ៊ុន នឹងតម្លៃរំពឹងទុក ០.៧៦ដុល្លារក្នុងមួយហ៊ុន។ ចំនួនសរុបត្រូវបានគេរំពឹងថា នឹងប្រមូលបានមានទឹកប្រាក់ ៣លានដុល្លារ។
ការប្រើប្រាស់ថាមពលរបស់ប្រទេសកម្ពុជា បានកើនឡើងពី ៤.០៥១ ជីហ្គាវ៉ាត់ក្នុងឆ្នាំ២០១៣ ដល់ ១២.០១៥ ជីហ្គាវ៉ាត់ កាលពីឆ្នាំមុនក្នុងអត្រាកំណើនប្រចាំឆ្នាំ១៩,៩ ភាគរយ ហើយតម្រូវការត្រូវបានព្យាករណ៍ថា នឹងកើនឡើង១៦ភាគរយ ស្មើនឹង១៣.៩៨១ ជីហ្គាវ៉ាត់នៅឆ្នាំនេះ។
លោកបន្តថា “ផែនការអភិវឌ្ឍន៍ថាមពលរបស់កម្ពុជា ដើម្បីបង្កើនសមត្ថភាពផលិតថាមពលក្នុងស្រុកពី១,៦៥៧ មេហ្កាវ៉ាត់ក្នុងឆ្នាំ២០១៥ ដល់៤៤៩៨មេហ្កាវ៉ាត់នៅឆ្នាំ ២០២៥ ហើយរដ្ឋាភិបាលគ្រោងនឹងបង្កើត បណ្តាញបញ្ជូនអគ្គិសនី១.៧៥០គីឡូម៉ែត្របន្ថែមទៀតនៅឆ្នាំ២០២៥ ដែលនឹងបង្កើនបណ្តាញអគ្គិសនី ទូទាំងប្រទេស៧៧,២ភាគរយ ថ្មើនឹង៤.០១៧ គីឡូម៉ែត្រ” ។
លោក Lim បាននិយាយថា “ក្រុមហ៊ុន Pestech កម្ពុជាមានទីតាំងល្អ និងទទួលបានអត្ថប្រយោជន៍ ពីកំណើនការប្រើប្រាស់អគ្គិសនី និងពីផែនការរបស់រដ្ឋាភិបាលកម្ពុជា ក្នុងការអភិវឌ្ឍហេដ្ឋារចនាសម្ព័ន្ធអគ្គិសនី ក្នុងរយៈពេល៥ឆ្នាំខាងមុខ” ។
ក្រុមហ៊ុនផេសថិក (ខេមបូឌា) ដែលបង្កើតឡើងនៅក្នុងឆ្នាំ ២០១០ ជាក្រុមហ៊ុនបច្ចេកទេសថាមពលអគ្គីសនី ដែលផ្តល់សេវាសំខាន់លើការ ផ្តល់ជូនវិស្វកម្មប្រព័ន្ធថាមពល និងដំណោះស្រាយបច្ចេកទេសដូចជា ការគូសប្លង់ លទ្ធកម្ម ការសាងសង់ ការដំឡើង និងការដាក់ប្រើប្រាស់នូវអនុស្ថានីយ៍មានតង់ស្យុងខ្ពស់ និងតង់ស្យុងខ្ពស់ខ្លាំង និងបណ្តាញបញ្ជូនអគ្គីសនីដែលមាន តង់ស្យុងខ្ពស់ និងតង់ស្យុងខ្ពស់ខ្លាំង ក៏ដូចជាប្រព័ន្ធថាមពលខ្សែកាបក្រោមដីសម្រាប់ការបញ្ជូន និងការចែកចាយថាមពលអគ្គីសនី និងការជួញដូរបង្គុំ និងបរិក្ខារប្រព័ន្ធថាមពលដែលជាកម្មសិទ្ធិ និងមិនមែនកម្មសិទ្ធិ៕
