ដោយ ម៉ាណេត
ភ្នំពេញៈ គម្រោងលំនៅដ្ឋានជាច្រើន នៅតែបន្តដំណើរការសាងសង់ ដែលធ្វើឱ្យកើនឡើង នូវកំណើនលំនៅដ្ឋានថ្មីចូលទៅក្នុងទីផ្សារ ខណៈតម្រូវការជាក់ស្ដែងមិនទាន់គ្រប់គ្រាន់នោះទេ បើប្រៀបធៀបទៅនឹងលំហូរ នៃចំនួនប្រជាជនចូលមករស់នៅ និងប្រកបមុខរបរនៅទីក្រុងភ្នំពេញ។
លោកម៉ាន់ ចាន់ឌី អគ្គនាយកក្រុមហ៊ុន Premium Group និងជាអ្នកអភិវឌ្ឍន៍ក្នុងវិស័យលំនៅដ្ឋាន នាពេលបច្ចុប្បន្នបានប្រាប់គេទំព័រ Propertyarea.asia កាលពីពេលថ្មីៗថា ដំណើរការនៃការសាងសង់លំនៅដ្ឋាន ក្រុមហ៊ុនអភិវឌ្ឍន៍ ដែលមានគម្រោងច្បាស់លាស់ និងមានទីផ្សារនៅតែបន្តដំណើរការរបស់ខ្លួន ដោយមិនអាចឈប់ពាក់កណ្តាលទីបាននោះទេ ទោះជាស្ថិតនៅក្នុងស្ថានភាពនាពេលនេះក៏ដោយ។
លោកបានបញ្ជាក់ថា “គ្រប់ការសាងសង់ ក៏ដូចជាការអភិវឌ្ឍន៍គម្រោងលំនៅដ្ឋានទាំងអស់ គឺសុទ្ធតែធ្វើឡើងទៅតាមផែនការ ហើយភាគច្រើននៃគម្រោង ដែលបានចាប់ ផ្តើមសាងសង់ ក៏សុទ្ធតែមានអតិថិជនក្នុងដៃ” ។ លោកបនន្តថា “ដូច្នេះក្រុមហ៊ុនអភិវឌ្ឍន៍ភាគច្រើន មិនមានភាពប្រឈមខ្ពស់ ទៅនឹងស្ថានភាពសព្វនេះនោះទេ ដែលវាខុសពីផ្នែកដទៃនៃវិស័យអចលនទ្រព្យផ្សេងទៀត” ។
លោកម៉ាន់ ចាន់ឌីបានបន្តថា យើងទទួលស្គាល់ថា ក្នុងដំណាក់កាលនេះមានគម្រោងអភិវឌ្ឍន៍ជាច្រើន បានបន្តដំណើរការសាងសង់ ដែលធ្វើឱ្យកើនឡើងនូវកំណើនលំនៅដ្ឋានថ្មីក្នុងរាជធានីភ្នំពេញ និងតាមតំបន់ជាយក្រុងកាន់តែច្រើន ប៉ុន្តែវានៅមិនទាន់គ្រប់គ្រាន់ទៅនឹងតម្រូវការជាក់ស្ដែងនោះទេ បើប្រៀបធៀបទៅនឹងលំហូរនៃចំនួនប្រជាជនចូលមករស់នៅ និងប្រកបមុខរបរនៅទីក្រុងភ្នំពេញ។
លោកស្រីតាំង ហ៊ួរ អ្នកជំនាញអចលនទ្រព្យ និងជានាយិកាក្រុមហ៊ុនអចលនទ្រព្យ Amaktak Property Service បានមានប្រសាសន៍ប្រាប់គេហទំព័រ Property Area Asia ថា មូលហេតុដែលលំនៅដ្ឋាន នៅតែមានតម្រូវការនោះ ដោយសារលំនៅដ្ឋានមួយចំនួនមានការលក់ប្រញាប់ ដូច្នេះហើយអាចមានឱកាសមានតម្លៃសមរម្យច្រើន ឬអាចក្រោមជាងទីផ្សារក៏មាន។
លោកស្រីបន្តថា “វិស័យលំនៅដ្ឋានបច្ចុប្បន្ន មានជាប្រភេទលំនៅដ្ឋាន សម្រាប់ប្រ
កបអាជីវកម្មផងដែរ ដែលអនុញ្ញាតឱ្យអ្នកជាវអាចប្រកបអាជីវកម្មបាន ឬបង្កើតមុខរបរបានទៀតផងដោយអាស្រ័យទៅតាមតំបន់ដែរ” ។
ចំណុចខ្លាំងរបស់លំនៅដ្ឋានមួយទៀតនោះ គឺលក្ខខណ្ឌបង់ប្រាក់ ព្រោះម្ចាស់លំនៅដ្ឋាន ឬម្ចាស់គម្រោងអភិវឌ្ឍលំនៅដ្ឋានមួយចំនួន បានផ្តល់ជូនលក្ខខណ្ឌបង់ប្រាក់ងាយស្រួលដូចជា ការបង់រំលស់ សម្រួលរយៈពេលបង់ឱ្យមានរយៈពេលវែង និងមានការយោគយល់ដល់អតិថិជនដោយបត់បែន ទៅតាមស្ថានភាពអតិថិជនទៀតផង។
ជាមួយគ្នានេះ លោក ហៃ រ៉ាវី នាយកគ្រប់គ្រងក្រុមហ៊ុន Daily Realty ធ្លាប់បានមានប្រសាសន៍ដែរថា ភាគច្រើនលំនៅដ្ឋានគឺមានតម្រូវការច្រើនជាងគេ ដោយសារតែអ្នកជាវត្រូវការ សម្រាប់យកមកប្រកបអាជីវកម្មផ្សេងៗ ឬក៏ចង់ទិញទុកយកផលចំណេញនៅពេលក្រោយមានភាពងាយស្រួលលក់។ ម្យ៉ាងវិញទៀត ដោយសារតែអតិថិជនមានបំណងចង់ជាវទុកសម្រាប់ឱ្យកូន ក្រែងលោត្រូវឡើងពីខេត្តមកសិក្សានៅទីក្រុង ឬក៏គូស្នេហ៍មួយចំនួនដែលទើបរៀបការ ដូច្នេះតម្រូវការមានផ្ទះរស់នៅគឺនៅតែមាន។
លោកបានបញ្ជាក់ថា “លំនៅដ្ឋានក្នុងបុរីគឺកំពុងទាក់ទាញខ្លាំង ដោយសារតែអ្នកជាវអចលនវត្ថុគិតថាគម្រោងលំនៅដ្ឋានបុរី មានគម្រោងច្បាស់លាស់” ។ លោកបន្ថែមថា “មិនតែប៉ុណ្ណោះ ការរចនាមានភាពស្រស់ស្អាត មិនថាផ្នែកខាងក្រៅ និងការឌីសាញខាងក្នុង ជាពិសេសមានសួនលំហែកាយជាដើម” ៕
