ដោយៈគង់ ម៉ាលីនណា
ភ្នំពេញៈ គណកម្មការផ្សារនានានៅក្នុងរាជធានីភ្នំពេញ បានចាត់វិធានការណ៍ប្រុងប្រយ័ត្នកាន់តែខ្លាំង ក្រោយផ្ទុះកូវីដនៅផ្សារបឹងកេងកង ឆ្លងដល់អាជីវករ២៤៦នាក់។
ប្រធានគណៈកម្មការផ្សារទួលទំពូង លោកចំរើន សុខលីម បានមានប្រសាសន៍អោយដឹងនៅព្រឹកថ្ងៃទី២៩មិថុនានេះថា ក្រោយពីមានការផ្ទុះឡើង នៅផ្សារបឹងកេងកង សម្រាប់ផ្សារទួលទំពូងបានពង្រឹងការប្រុងប្រយ័ត្នទ្វេដង។
គណៈកម្មការផ្សារទាំងអស់យកចិត្តទុកដាក់បំផុត នៅពេលបើកផ្សាររដ្ឋឡើងវិញនេះគឺការអនុវត្តកាតព្វកិច្ចពាក់ម៉ាស កាតព្វកិច្ចរក្សាគម្លាតសុវត្ថិភាព ការធ្វើអនាម័យដើម្បីសម្លាប់មេរោគ ការវាស់កម្ដៅ ការស្កេន QR Code និងត្រូវអនុវត្តតាមការណែនាំរបស់ក្រសួងសុខាភិបាល ជាពិសេសត្រូវប្រកាន់ខ្ជាប់ជានិច្ចនូវវិធានការ “៣ការពារ និង៣កុំ”យ៉ាងខ្ជាប់ខ្ជួន។
ជាមួយគ្នានេះ លោក ហ៊ត វ៉ាន់ធី ប្រធានគណៈកម្មការផ្សារអូរឫស្សី ក៏អោយដឹងនៅព្រឹកថ្ងៃ២៩មិថុនានេះដែរថា សម្រាប់ផ្សារអូរឬស្សី ក៏កំពុងអនុវត្តនូវវិធានការយ៉ាងម៉ឺងម៉ាត់ ដើម្បីទប់ស្កាត់ជម្ងឺកូវីដ-១៩ លើពលរដ្ឋចេញ ចូលផ្សារ ត្រូវការពាក់ម៉ាស, រក្សាគម្លាតសុវត្ថិភាព, ធ្វើអនាម័យសម្លាប់មេរោគ, វាស់កម្ដៅ,ស្កេន QR Code។
លោកបន្តថា “ទោះប្រឹងប្រែងខ្លាំងយ៉ាងណាក៏ដោយ បើបងប្អូនប្រជាពលរដ្ឋមិនចូលរួមទេ គឺមិនបានជោគជ័យទេ”។ លោកបន្តថា “ចំណែកផ្សារផ្សេងៗទៀត បើតាមការពិនិត្យមើលស្ថានភាពជាក់ស្តែង គឺគ្រប់ផ្សារបានយកចិត្តទុកដាក់ណាស់ចំពោះវិធានការពារ “៣ការពារ និង៣កុំ” នេះ”។
ផ្សាររដ្ឋទាំងអស់នៅរាជធានីភ្នំពេញ ចាប់ផ្តើមអនុញ្ញាតិអាជីវករបើកលក់ដូរជាប្រក្រតីឡើងវិញ ចាប់ពីថ្ងៃទី១៥ ខែមិថុនា ឆ្នាំ២០២១តទៅ។ គ្រប់អាជីវកម្ម-ការលក់ដូរ ដែលត្រូវបានអនុញ្ញាតឲ្យបើកដំណើរការ ត្រូវអនុវត្តវិធានការសុវត្ថិភាព ផ្នែកសុខាភិបាលឲ្យបានម៉ឺងម៉ាត់ជាអាទិ៍ កាតព្វកិច្ចពាក់ម៉ាស, កាតព្វកិច្ចរក្សាគម្លាតសុវត្ថិភាព, ការធ្វើអនាម័យដើម្បីសម្លាប់មេរោគ, ការវាស់កម្ដៅ, ការស្កេន QR Code និងត្រូវអនុវត្តតាមការណែនាំរបស់ក្រសួងសុខាភិបាល ជាពិសេសត្រូវប្រកាន់ខ្ជាប់ជានិច្ចនូវវិធានការ “៣ការពារ និង៣កុំ”របស់សម្ដេចតេជោ ហ៊ុន សែន។
ប៉ុន្តែទោះបីជាយ៉ាងណាក្តី ក្នុងចំនួនផ្សាររដ្ឋទាំង២៥ មានផ្សារបឹងកេងកងមួយហើយ ដែលផ្ទុះនៅជម្ងឺកូវីដ-១៩ ដោយគិតមកត្រឹមព្រឹកថ្ងៃទី២៩មិថុនានេះ មានអ្នកវិជ្ជមាននៅក្នុងផ្សារនេះចំនួន២៤៦នាក់ ក្នុងចំណោមមនុស្សយកសំណាក១១០០នាក់៕