ដោយ ឧត្តម
កំពតៈ មន្ត្រីជាន់ខ្ពស់ផ្នែកទេសចរណ៍ខេត្តកំពតបានអះអាងថា គម្រោងសាងសង់សណ្ឋាគារ ផ្ទះសំណាក់ និងបឹងហ្គាលឡូង និងរមណីយដ្ឋានជាច្រើនបាន និងកំពុងកើតមាននៅក្នុងខេត្តកំពតជាច្រើនទីតាំង ដើម្បីឆ្លើយតតបទៅនឹងសេក្តី ត្រូវការរបស់ភ្ញៀវទេសចរណ៍ជាតិ និងអន្តរជាតិ ដែលបាននឹងកំពុងមានការចាប់អារម្មណ៍។
ប្រធានមន្ទីរទេសចរណ៍ខេត្តកំពត លោកសយ ស៊ីណុលបានប្រាប់ឲ្យដឹងតាមទូរស័ព្ទកាលពីថ្ងឌៃទី១ សីហាកន្លងមកថា នាពេលបច្ចុច្បប្ននេះ មានគម្រោងវិនិយោគលើវិស័យបដិសណ្ឋារកិច្ចជាច្រើនបាន នiងកំពុងកើតមានជាហូរហែនៅក្នុងខេត្តកំពត ជាពិសេសគម្រោងរមណីយដ្ឋាន សណ្ឋាគារ និងបឹងហ្គាឡូ នៅតាមដងព្រែកនានារបស់ខេត្តកំពត។
លោកបន្តថា “នៅពេលដែលមានគម្រោងវិនិយោគ ផ្នែកបដិសណ្ឋារកិច្ចច្រើននៅក្នុងខេត្តនាពេលនេះ បានឆ្លុះបញ្ចាំងនៃភាពល្អប្រសើរ និងជំរុញឱ្យមានការប្រកួតប្រជែងកាន់តែខ្លាំងក្លា នៅក្នុងវិស័យទេសចរណ៍របស់ប្រទេសកម្ពុជា និងធានាបាននូវគុណភាពខ្ពស់។ លោកបញ្ជាក់ថា “ធម្មតានៅក្នុងវិស័យពាណិជ្ជកម្ម ការប្រកួតប្រជែងសាងសង់នៅក្នុងវិស័យបដិសណ្ឋារកិច្ចច្រើនបែបនេះ នៅក្នុងខេត្ត វានឹងធានានូវគុណភាព និងស្តង់ដារអន្តរជាតិ” ។
បច្ចុប្បន្ននេះកម្ពុជា មិនមែនមានការប្រកួតប្រជែង តែនៅក្នុងស្រុកនៅទេ គឺកម្ពុជា បាននឹងកំពុងប្រកួតប្រជែងទាំងថ្នាក់តំបន់ និងពិភពលោក លើវិស័យបដិសណ្ឋារកិច្ចនេះ។
លោកសយ ស៊ីណុល បញ្ជាក់ទៀតថា “ក្នុងការទាក់ទាញភ្ញៀវទេសចរទាំងក្នុងស្រុក និងក្រៅស្រុក ទាមទាឱ្យមានគុណភាព និងស្តងដារចាំបាច់បំផុត ដូច្នេះ នៅពេលមានការប្រកួតប្រជែងកាន់តែច្រើនវាកាត់តែល្អ ហើយឆ្លើយតបទៅនឹងតម្រូវការភ្ញៀវទេសចរ និងជាតិអន្តរជាតិ” ។
អគ្គនាយកក្រុមហ៊ុនអចលទ្រព្យ R Investment Group លោកឧកញ៉ា តេង រិទ្ធី បានឱ្យដឹងថា ខេត្តកំពតបានទាក់ទាញ គម្រោងបណ្តាក់ទុនវិនិយោគជាច្រើនលានដុល្លារ ទៅលើការសាងសង់លំនៅដ្ឋាន បែបលំហែរកាយនៅក្នុងទឹកដីនៃខេត្ត ដ៏ទាក់ទាញផ្នែកទេសចរណ៍មួយនេះ ។
លោកបន្តទៀតថា “បច្ចុប្បន្ននេះមានអ្នកវិនិយោគជាច្រើន បានទម្លាក់ទុនធ្វើការអភិវឌ្ឍតំបន់មួយចំនួន ឱ្យក្លាយទៅជាតំបន់កម្សាន្តបែបកែច្នៃ និងធម្មជាតិ ជាពិសេសតំបន់ដែលស្ថិតនៅជាប់មាត់ព្រែក ជាប់សមុទ្រ និងតំបន់ក្បែរជើងភ្នំ។ លោកបន្តថា “ជាមួយនឹងសកម្មភាពដែលកំពុងអភិវឌ្ឍន៍ ក៏មានគម្រោងថ្មីបន្តបន្ទាប់ទៀត ដែលមិនយូរមិនឆាប់ខេត្តកំពត នឹងក្លាយទៅជាទីតាំងគោលដៅទេសចរណ៍ ដ៏មានប្រជាប្រិយភាពជាក់មិនខាន” ។
ជាមួយនឹងការបង្ហាញពីសក្ដានុពល ក្នុងការវិនិយោគខាងលើនេះ លោកឧកញ៉ា តេង រិទ្ធី បានបញ្ជាក់សម្រាប់ការអភិវឌ្ឍ លើវិស័យលំនៅដ្ឋានបែបលំហែរកាយ គឺត្រូវបានធ្វើឡើងជាច្រើនគម្រោង និងច្រើនកម្រិត ហើយតម្លៃក៏អាស្រ័យទៅតាមគម្រោងផងដែរ ដែលក្នុងនោះមានតម្លៃចាប់ពីជាង ៣-៤ម៉ឺនដុល្លារឡើងទៅ។
យោងតាមចក្ខុវិស័យដល់ឆ្នាំ២០៣០ នៃប្លង់គោលប្រើប្រាស់ដីក្រុងកំពត រដ្ឋាភិបាលកម្ពុជា កំពុងសំដៅរៀបចំ និងអភិវឌ្ឍ ក្រុងកំពតជាក្រុងគុជបៃតង ឆ្នេរសមុទ្រ ធម្មជាតិ វប្បធម៍ និងពាណិជ្ជកម្ម តាមរយៈការអភិវឌ្ឍន៍ជាទីក្រុង រមណីយដ្ឋានគុជទេសចរណ៍ឆ្នេរសមុទ្រ ធម្មជាតិ វប្បធម៍ ដែលស្អាតបំផុតលើសកលលោក។
តាមរយៈចក្ខុវិស័យនគររូបនីយកម្មនេះ ទីក្រុងកំពតនឹងអភិវឌ្ឍទៅជា មជ្ឈមណ្ឌលកែច្នៃផលិផល កសិកម្ម ឧស្សាហកម្ម ទីផ្សារអន្តរជាតិសម្រាប់ផលិតផលកសិកម្ម និងចែកចាយទំនិញ និងជាទីក្រុងទំនើបដែលមានហេដ្ឋារចនសម្ព័ន្ធ សេវាកម្មទីក្រុង និងគុណភាពបរិស្ថានរស់នៅប្រសើរ។
ក្រៅពីដំណាំកសិកម្មសក្តានុពល ម្រេច និងធុរេន និងវិស័យទេសចរណ៍ ការតភ្ជាប់ហេដ្ឋារចនាសម្ព័ន្ធ ផ្លូវថ្នល់ រថភ្លើង និងការតភ្ជាប់កំពងផែសមុទ្រ គឺជាធាតុផ្សំសំខាន់សម្រាប់ទីក្រុងកំពត និងខេត្តកំពតទាំងមូល៕