ដោយៈ រ៉ាណេត
ភ្នំពេញៈ រយៈពេល៥ឆ្នាំចុងក្រោយនេះ វិស័យសំណង់បានបន្តរីកចម្រើនយ៉ាងខ្លាំង និងបានជម្រុញឱ្យមានកំនើន នៃចំនួនអាគារខ្ពស់ៗជាច្រើន នៅក្នុងរាជធានីភ្នំពេញ ប៉ុន្តែការប្រើប្រាស់សេវាធានារ៉ាប់រង ឬសេវាគ្រប់គ្រងអាគារ (Property Management) ហាក់មានកម្រិតនៅឡើយ។
នាយិកាប្រចាំប្រទេសក្រុមហ៊ុន CBRE Cambodia លោកស្រី អាន សុធីតា បានមានប្រសាសន៍ឱ្យដឹងនៅរសៀលថ្ងៃទី៣១ ខែកក្កដា ឆ្នាំ២០២០កន្លងមកថា តាមការសិក្សាស្រាវជ្រាវ របស់ក្រុមការងារជំនាញបានឱ្យដឹងថា គ្រាន់តែនៅក្នុងរាជធានីភ្នំពេញ សំណង់អាគារខ្ពស់ៗមានប្រមាណ៤៥០អាគារ ដែលភាគច្រើនសុទ្ធតែត្រូវការក្រុមហ៊ុនផ្តល់សេវាគ្រប់គ្រង។
លោកស្រីបានបន្តទៀតថា “ខ្ញុំមិនប្រាកដថា តើពួកគាត់ដែលជាម្ចាស់អាគារបានយល់ពីគុណតម្លៃនៃសេវា Property Management បានកម្រិតណានោះទេ ប៉ុន្តែបើនិយាយសម្រាប់ខ្ញុំវិញ គឺវាមានសារសំខាន់បំផុត។លោកស្រីពន្យល់ថា “ទោះបីជាមានអគារល្អប្រណីតយ៉ាងម៉េចក៏ដោយ បើសិនជាមិនមានអ្នកថែទាំនោះទេ វានឹងផ្តល់ផលប៉ះពាល់ ទៅដល់អ្នកដែលអភិវឌ្ឍន៍ខ្លួនឯង ប៉ះពាល់ទៅដល់អ្នកដែលរស់នៅក្នុងអគារ ហើយក៏ប៉ះពាល់ទៅដល់អ្នក ដែលកំពុងវិនិយោគរួមនៅក្នុងគម្រោងអគារទាំងមូលផងដែរ។
លោកស្រីអាន សុធីតាបានបន្តថា ការប្រើប្រាស់ និងជឿជាក់ឱ្យតម្លៃទៅលើសេវា Property Management នៅក្នុងស្រុកខ្មែរ បើប្រៀបធៀបទៅនឹងបណ្តាប្រទេសផ្សេងៗនៅក្នុងតំបន់ គឺនៅមានកម្រិតបំផុត។
លោកស្រីបន្ថែមថា “ខ្ញុំឧទាហរណ៍ថា ប្រសិនបើលំនៅដ្ឋានថ្មីដែលមានការប្រើប្រាស់ចាប់ពី២-៣ឆ្នាំឡើងទៅ មិនមានការលាបពណ៌ថ្មី មិនមានការរៀបចំ និងជួសជុលបន្ថែមនៅទីកន្លែង ដែលមានបញ្ហាដូចជាបណ្តាញទឹក ការសម្អាតបរិវេណជុំ ក៏ដូចជាបណ្តាញលូជាដើម” ។
យើងអាចសួរថា តើអគារមួយនោះ នៅតែមានគុណតម្លៃខ្ពស់ដូចដើមដដែល ឬយ៉ាងណា ហើយបើម្ចាស់ចង់លក់ចេញ តើមានទីផ្សារខ្ពស់ឬទេ ចម្លើយគឺថាអាចនឹងមិនមាន ដោយសារតែការថែទាំមិនត្រូវបានយកចិត្តទុកដាក់។
ក្រុមហ៊ុនផ្តល់សេវា Property Management នៅកម្ពុជានាពេលបច្ចុប្បន្ន ភាគច្រើន គឺផ្តោតសំខាន់តែទៅលើផ្នែកសន្តិសុខ អនាម័យ កាមេរ៉ាសុវត្ថិភាព និងសុវត្ថិភាពជណ្ដើរយន្តតែប៉ុណ្ណោះ ខណៈពេលដែលនៅតាមបណ្តាប្រទេសជឿនលឿន មួយចំនួនបានឈានដល់ការប្រើប្រាស់សេវាគ្រប់គ្រប់ ប្រព័ន្ធដំណើរការនៅក្នុងអគារទាំងមូលដែលផ្តល់ភាពជឿជាក់ថាមានសុខសុវត្ថិភាពខ្ពស់ និងជួយជម្រុញឱ្យតម្លៃនៃអគារទាំងមូលនៅតែរក្សាបានភាពល្អប្រសើរ ដោយការប្រើបច្ចេកវិទ្យាខ្ពស់ច្រើជាងការប្រើកម្លាំងមនុស្ស។
នៅពេលបច្ចុប្បន្ននេះ សម្រាប់ការវិនិយោគទៅលើសេវាគ្រប់គ្រង Property Management នៅកម្ពុជា គឺនៅមានឱកាសច្រើន ដោយសារតែទីផ្សារនៅមានភាពធំទូលាយ ប៉ុន្តែនៅក្នុងនោះឧបសគ្គមួយចំនួនក៏មានផងដែរ។ ការគ្រប់គ្រង់អចលនទ្រព្យ ឬការផ្តល់សេវាកម្ម Property Management គឺទាមទារឱ្យមានចំណេះដឹង ជំនាញ និងបទពិសោធន៍ខ្ពស់យ៉ាងពិតប្រាកដ ពាក់ព័ន្ធទៅនឹងការប្រប្រើប្រាស់ ប្រព័ន្ធគ្រប់គ្រងបច្ចេកវិទ្យាក្នុងអគារទាំងមូល ដែលត្រូវដឹង ត្រូវស្គាល់បរិក្ខា និងសម្ភារៈប្រើប្រាស់ចាំបាច់រួម ដែលពាក់ព័ន្ធទៅនឹងបណ្តាញប្រើប្រាស់នានា ជាពិសេសត្រូវមានការទំនាក់ទំនងជាមួយបណ្តាក្រុមហ៊ុនទទួលខុសត្រូវ ទៅលើផ្នែកនីមួយៗនៅក្នុងអាគាររួម ដើម្បីធ្វើការត្រួតពិនិត្យជាប្រចាំ។
អ្វីដែលរឹតតែសំខាន់ និងទាមទារឱ្យមានខាងតែបាន គឺជំនាញក្នុងការដោះស្រាយរាល់បញ្ហាផ្សេងដែលកើតមាន ទាំងកត្តាបច្ចេកទេសនៃសំណង់ ទាំងកត្តាមនុស្សដែលជាអតិថិជននៅក្នុងអគារ៕
