សុខុម
ជប៉ុន: ក្រុមហ៊ុនហិរញ្ញវត្ថុយក្សជប៉ុន SoftBank Group Corp នៅថ្ងៃពុធ ទី១២ ឧសភា នេះបានបញ្ចេញរបាយការណ៍ប្រាក់ចំណេញ៤,០២៧ទ្រីលានយ៉េន (៣៦,៩៩ពាន់លានដុល្លារអាមេរិក) ទទួលបានពីមូលនិធិវិនិយោគ និងទទួលផលចំណេញមកវិញមានឈ្មោះថា វីសិនហ្វាន់ (Vision Fund) ដែលជាបុត្រសម្ព័ន្ធមួយរបស់ខ្លួននៅត្រីមាសទី៤ ចុងឆ្នាំ២០២០។
យោងតាមការចុះផ្សាយរបស់សារព័ត៌មាន The Edge Markets ឱ្យដឹងថា ការបញ្ចេញរបាយការណ៍ប្រាក់ចំណេញយ៉ាងច្រើនសន្ធឹកសន្ធាប់នេះ ធ្វើឡើងបន្ទាប់ពីបានចំណេញពីការវិនិយោគលើក្រុមហ៊ុន E-Commerce របស់កូរ៉េខាងត្បូង ដែលមានឈ្មោះថា Coupang ក្រោយពីទទួលរងការខាតបង់ធ្ងន់ធ្ងរបំផុតមិនធ្លាប់មាន។
ប្រាក់ចំណេញសុទ្ធរបស់ក្រុមហ៊ុន SoftBank Group ទទួលបាន៤,៩ទ្រីលានយ៉េន (៤៥,៨៨ពាន់លានដុល្លារអាមេរិក) ក្នុងឆ្នាំសារពើពន្ធបញ្ចប់ត្រឹមខែមីនា ដើមឆ្នាំ២០២១ បើធៀបនឹងការខាតបង់៩៦២ពាន់លានយ៉េន (៨,៨៤ពាន់លានដុល្លារអាមេរិក) ក្នុងឆ្នាំសារពើពន្ធមុននេះ។
សុទិដ្ឋនិយមនៅក្នុងទីផ្សារចំពោះភាគហ៊ុនបច្ចេកវិទ្យា បានជួយជំរុញការចុះបញ្ជីសាធារណៈនូវក្រុមហ៊ុន Coupang ដែលមានក្រុមហ៊ុនហិរញ្ញវត្ថុ SoftBank នៅពីក្រោយខ្នង និងវេទិកាជួញដូររថយន្តមួយទឹក Auto1 Group ហើយធ្វើឱ្យភាគហ៊ុនរបស់ក្រុមហ៊ុនហៅតាក់ស៊ីតាមទូរស័ព្ទដៃ Uber ហក់ឡើងអំឡុងត្រីមាសទី៤។
មូលនិធិ Vision Fund ទី១ មានតម្លៃសរុប១០០ពាន់លានដុល្លារ ហើយមូលនិធិ Vision Fund ទី២ មានតម្លៃសរុប១៥៤ពាន់លានដុល្លារត្រឹមដំណាច់ខែមីនា៕