ដោយៈ ម៉ាណេត
ភ្នំពេញៈ ក្រសួងផែនការ និងវិនិយោគវៀតណាមបានឱ្យដឹងថា ក្រុមហ៊ុនវៀតណាម បានវិនិយោគទឹកប្រាក់សរុបចំនួន៥៤៥,៩លានដុល្លារអាមេរិក នៅក្នុងគម្រោងក្រៅប្រទេស ក្នុងរយៈពេល៤ខែដំបូង ឆ្នាំ២០២១នេះ កើនឡើង៧,៩ដង ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមសារព័ត៌មាន CNA នៅថ្ងៃទី១០ ខែឧសភា ឆ្នាំ២០២១។
សហរដ្ឋអាមេរិក គឺជាទិសដៅធំបំផុតរបស់វៀតណាម ដែលបានបោះទុនវិនិយោគប្រមាណ៣០២,៣លានដុល្លារ ស្មើនឹង៥៥,៤ភាគរយ នៃការបោះទុនវិនិយោគសរុបរបស់វៀតណាម ខណៈប្រទេសកម្ពុជាឈរនៅលំដាប់លេខ២ ដែលវៀតណាមបោះទុនវិនិយោគប្រមាណ៨៩,១លានដុល្លារ បន្ទាប់មកគឺប្រទេសបារាំង កាណាដា អាល្លឺម៉ង់ និងហូឡង់។
ជាមួយគ្នានេះ វៀតណាមមានគម្រោងថ្មីចំនួន១៨ ដែលទទួលបានវិញ្ញាបនប័ត្រវិនិយោគនៅក្រោយប្រទេស ដែលមានដើមទុនចុះបញ្ជីសរុប១៤២,៨លានដុល្លារ កើនឡើង២,៧ដង ធៀបនឹងរយៈពេលដូចគ្នាកាលពីឆ្នាំមុន។
លើសពីនេះទៅទៀត ទុនវិនិយោគចំនួន៤០៣,២លានដុល្លារ ត្រូវបានបញ្ចូលទៅក្នុងគម្រោងចំនួន៩ ដែលមានស្រាប់នៅក្រៅប្រទេស កើនឡើង២៥.៥ដង។
ផ្នែកសំខាន់នៃលំហូរចេញមូលធន ដែលមានទំហំទឹកប្រាក់២៧០,៨លានដុល្លារត្រូវបានចាក់បញ្ចូល ទៅក្នុងគម្រោងបច្ចេកវិទ្យាវិទ្យាសាស្ត្រ ដែលមានចំនួន១៩,៦ភាគរយនៃតួលេខសរុប។ ការវិនិយោគលើគម្រោងលក់ដុំ និងរាយមានទំហំទុនវិនិយោគ១៤៧,៨លានដុល្លារ។
គិតត្រឹមថ្ងៃទី២០ ខែមេសា ប្រទេសវៀតណាមមានគម្រោងវិនិយោគក្រៅប្រទេសមានសុពលភាពសរុបចំនួន១.៤១៧ ដែលមានទឹកប្រាក់សរុប២១,៨ពាន់លានដុល្លារ ដែលភាគច្រើនលើតវិស័យរ៉ែ (៣៦ ភាគរយនៃមូលធនសរុប) និងកសិកម្ម៕