វិស័យ​មួយ​ដែល​មើលឃើញថា​មាន​តម្រូវការ​ខ្ពស់ ទោះ​ស្ថិតនៅក្នុង​វិបត្តិ​កូ​វីដ១៩

ដោយៈ​លក្ខិណា

ភ្នំពេញៈ នៅក្នុង​វិបត្តិ​នៃ​ជំងឺ​កូ​វីដ១៩គេ​មើលឃើញថា វិស័យ​ជាច្រើន​ត្រូវបាន​រង​ផលប៉ះពាល់ និង​មាន​ខ្លះ​កាត់បន្ថយ​បុគ្គលិក ខ្លះ​កាត់បន្ថយ​ប្រាក់ខែ​បុគ្គលិក ខ្លះទៀត​ផ្អាក​ដំណើរការ​ទាំងស្រុង​តែម្ដង ព្រោះតែ​មិនអាច​ទ្រាំទ្រ នឹង​ការចំណាយ​ដែល​គ្មាន​ចំណូល ប៉ុន្តែ​គេ​មើលឃើញថា វិស័យ​មួយ​មាន​តម្រូវការ​ខ្ពស់ ទោះបី​មាន​ការរីក​រាលដាល​នៃ​ជំងឺ​កូ​វីដ១៩ខ្លាំង​ប៉ុណ្ណា​ក៏ដោយ។

បើតាម​លោក​បណ្ឌិត​អ៊ិន ចាន់នី​ប្រធាន​សមាគម​ធនាគារ​នៅ​កម្ពុជា បាន​ថ្លែង​ក្នុង​វេទិកា​កាលពី​សប្ដាហ៍​មុននេះ​ថា នៅក្នុង​វិបត្តិ​នៃ​ការរីក​រាលដាល​នៃ​ជំងឺ​កូ​វីដ១៩ វិស័យ​ដែល​លោក​មើលឃើញថា នៅតែមាន​តម្រូវការ​ខ្ពស់​ពី​អ្នកប្រើប្រាស់​នោះ គឺ​វិស័យ​ទូរគមនាគមន៍ ដែល​វិស័យនេះអ្នកណាៗ ក៏​នៅតែ​ប្រើប្រាស់​ក្នុងពេល​បិទ​ខ្ទប់​តំបន់ ដែល​មានការ​ប្រឈម​ឆ្លង។

លោក​បន្តថា “សូម្បី​វិស័យ​ហិរញ្ញវត្ថុ ក៏ត្រូវ​ការប្រើប្រាស់​សេវាកម្ម​របស់​ទូរគមនាគមន៍​នេះដែរ ជាក់ស្ដែង​នៅពេលដែល​វិស័យ​ហិរញ្ញវត្ថុ ត្រូវការ​អភិវឌ្ឍន៍​ប​ច្ចេក​វិទ្យា​ទំនើប គឺ​ទាមទារ​ឱ្យមាន​អ៊ី​ន​ធើ​ណេ​ត ដើម្បី​អាចធ្វើ​ការទូទាត់​តាម​ប្រព័ន្ធ​ទូទាត់​អេឡិចត្រូនិក និង​តាម​ប្រព័ន្ធ​QR Codeជាដើម” ។ លោក​បន្តថា “នៅក្នុងពេល​មាន​តម្រូវការ​ខ្ពស់​បែបនេះ    វិស័យ​ទូរគមនាគមន៍ គឺអាច​ពង្រីក​នូវ​បណ្ដាញ​ប្រតិបត្តិការ​របស់ខ្លួន​ប​ន្ថែ​ម​ទៀត ដើម្បី​ជួយ​បំពេញបន្ថែម​នូវ​តម្រូវការ ដែលមាន​ខ្ពស់​នៅពេលនេះ និង​នៅពេល​អនាគត” ។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

បើតាម​បុគ្គលិក​មួយរូប នៃ​ក្រុមហ៊ុន​បណ្ដាញ​អ៊ី​ន​ធើ​ណេ​ត​មួយ បាន​និយាយ​ក្នុង​លក្ខ​ខ័​ណ្ឌ​មិន​បញ្ចេញ​ឈ្មោះ​បានឱ្យដឹងថា ចាប់តាំងពី​មានការ​បិទ​ខ្ទប់​នូវ​តំបន់ និង​ការ​តម្រូវឱ្យ​បុគ្គលិក សិស្ស​និស្សិត​ធ្វើការ​និង​សិក្សា​តាម​ផ្ទះ តម្រូវការ​អតិថិជន​ដែល​ត្រូវការ​សេវាកម្ម​អ៊ី​ន​ធើ​ណេ​ត​ឃើញថា មាន​កំណើន​ខ្ពស់ជាង​មុន ដោយសារតែ​ពួកគាត់​ត្រូវការ​អ៊ី​ន​ធើ​ណេ​ត ដើម្បី​អាចធ្វើ​ការ​បាន​ហើយ​ការសិក្សារ​របស់​សិស្ស​និស្សិត ក៏​ទាមទារ​ឱ្យមាន​ល្បឿន​អ៊ី​ន​ធើ​ណេ​ត​លឿន​ជាង​មុន​ផងដែរ។

បុគ្គលិក​រូបនេះ​ឱ្យដឹងថា​កាលពីមុន អ្នក​ដែល​ស្នើសុំ​ត​សេវា​អ៊ី​ន​ធើ​ណេ​ត​តាម​ផ្ទះ​ភាគច្រើន​ជា​អ្នកធ្វើការ​ច្រើន ដោយ​ពួកគាត់​ធ្វើការ​នៅ​ការិយាល័យ មិនទាន់​រួចមក​បំពេ​ញ​បន្ថែម​នៅផ្ទះ តែ​ពេលដែល​បិទ​ការិយាល័យ និង​តម្រូវឱ្យ​ធ្វើការ​នៅតាម​ផ្ទះ អតិថិជន​ស្នើសុំ​ត​បណ្ដាញ​សេវាកម្ម​អ៊ី​ន​ធើ​ណេ​ត កាន់តែច្រើន​បន្ថែម ព្រោះ​ក្នុង​មួយផ្ទះៗអាច​ត្រូវ​ការប្រើ​អ៊ី​ន​ធើ​ណេ​ត​ដើម្បី​ភ្ជាប់​ជាមួយ​កុំព្យូទ័រ​ច្រើន​គ្រឿង។

យ៉ាងណាក្ដី មានមតិ​ជាច្រើន​បានបង្ហាញ ពី​ការមិន​ពេញ​ចំពោះ​សេវាកម្ម​អ៊ី​ន​ធើ​ណេ​ត​ដែលមាន​ល្បឿន​យឺត មិនទាន់​ចិត្ត​ដែល​ចង់បាន ព្រោះ​ការងារ​ខ្លះ​ត្រូវការ​ល្បឿន​អ៊ី​ន​ធើ​ណេ​តលឿនៗ ដើម្បី​ធ្វើ​រហ័ស ទាំងនេះហើយ​ដែល​វិស័យនេះ​ត្រូវការ​អភិវឌ្ឍ​បន្ថែមទៀត​ដើម្បី​បំពេញតម្រូវការ​នៃ​កំណើន៕

LEAVE A REPLY

Please enter your comment!
Please enter your name here